07/10/2026
شیراز مسیح پر لگائی گئی توہین مذہب الزام بے بنیاد قرار!
متحدہ اسلامی کونسل مردان کی پانچ رکنی تحقیقاتی کمیٹی نے گورنمنٹ مڈل سکول باڑی چم، عیدگاہ روڈ مردان کے ٹیچر شیراز مسیح کی معطلی کے معاملے اور اسے توہین مذہب سے جوڑنے کی مکمل تحقیق کی۔ کمیٹی نے سکول انتظامیہ، متعلقہ اساتذہ اور انکوائری افسر سے ملاقات اور دستیاب ریکارڈ و بیانات کے جائزے کے بعد قرار دیا کہ شیراز مسیح کی معطلی محکمانہ و ڈسپلن کا معاملہ ہے، اس کا توہینِ مذہب سے کوئی تعلق ثابت نہیں ہوا۔ کمیٹی کے مطابق شیراز مسیح کے خلاف متعلقہ درخواست، معطلی کے نوٹیفکیشن، سکول انتظامیہ اور انکوائری میں توہینِ مذہب کا کوئی ذکر موجود نہیں۔ سوشل میڈیا پر اس حوالے سے گردش کرنے والی غیرمصدقہ نسبت بھی درست ثابت نہیں ہوئی۔ متحدہ اسلامی کونسل واضح کرتی ہے کہ توہینِ مذہب جیسے حساس معاملے میں بغیر تحقیق و تصدیق کسی شخص پر الزام عائد کرنا شرعاً، اخلاقاً اور قانوناً نامناسب اور سنگین معاملہ ہے۔ تمام ذمہ داران سے اپیل ہے کہ غیرمصدقہ خبروں سے اجتناب کرتے ہوئے صرف مستند معلومات نشر کی جائیں۔
متحدہ اسلامی کونسل تجویز کرتی ہے کہ شیراز مسیح کے خلاف توہینِ مذہب سے متعلق پھیلائی گئی افواہ اور بے بنیاد الزام کی واضح تردید اور ازالے کے لیے ڈی ای او صاحب اور متعلقہ حکام مؤثر اقدامات کریں، تاکہ شیراز مسیح بلاخوف و خطر اپنی ڈیوٹی انجام دے سکے اور محض افواہ کی بنیاد پر کسی کی جان، عزت یا سلامتی متاثر نہ ہو۔
تحقیقاتی کمیٹی کے ارکان:👇
1۔ مفتی عبدالوکیل اعوان قادری، صدر متحدہ اسلامی کونسل مردان
2۔ مولانا ندیم احمد حقانی، جنرل سیکرٹری مجلس تحفظ ختم نبوت مردان
3۔ جناب افتخار احمد صاحب (فرزند ارجمند سابقہ ڈپٹی اسپیکر خیبرپختونخوا جناب اکرام اللہ شاھد صاحب رحمۃ اللہ علیہ، نائب امیر متحدہ اسلامی کونسل مردان و رکن شوریٰ عالمی مجلس تحفظ ختم نبوت مردان)
4۔ مولانا امجد علی مردانوی، جنرل سیکرٹری متحدہ اسلامی کونسل مردان
5۔ ناظم جلیل الملک صاحب
