Pirkot Youth Welfare

06/04/2026

انا للہ وانا الیہ راجعون

انتہائی رنج و غم کے ساتھ اطلاع دی جاتی ہے کہ پڑکوٹ یوتھ ویلفیئر کے معزز ممبر، کامران شبیر ولد محمد شبیر ہم میں نہیں رہے۔ ان کی وفات نہ صرف ان کے اہلِ خانہ بلکہ پوری پڑکوٹ برادری اور ویلفیئر تنظیم کے لیے ایک بڑا صدمہ ہے۔

مرحوم ایک نیک سیرت، خوش اخلاق اور فلاحی جذبے سے سرشار انسان تھے، جن کی کمی ایک عرصہ تک محسوس کی جاتی رہے گی۔

پڑکوٹ یوتھ ویلفیئر مینجمنٹ اس غم کی گھڑی میں سوگوار خاندان کے ساتھ دلی ہمدردی اور تعزیت کا اظہار کرتی ہے اور دعا گو ہے کہ اللہ تعالیٰ مرحوم کو جنت الفردوس میں اعلیٰ مقام عطا فرمائے اور لواحقین کو صبر جمیل نصیب کرے۔

نماز جنازہ آج شام 6 بجے مرحوم کے گھر کے قریب ادا کی جائے گی۔ تمام اہلِ علاقہ سے شرکت کی گزارش ہے۔

اللہ تعالیٰ مرحوم کی مغفرت فرمائے۔ آمین

10/02/2026

ہم تو عید کی تیاریاں کریں گے... مگر کیا غریب کے بچے صرف دیکھیں گے؟ 🌙💔

رمضان کی برکتیں سمیٹتے ہوئے ہم اکثر بھول جاتے ہیں کہ ہمارے آس پاس کچھ ایسے سفید پوش گھرانے بھی ہیں جو اپنی ضرورت کسی کو بتاتے نہیں، لیکن ان کی خاموشی بہت کچھ کہہ رہی ہوتی ہے۔ ہم تو اپنے بچوں کے لیے بہترین جوڑے اور پکوان خریدیں گے، مگر کیا ان کے گھر میں بھی عید کی خوشبو آئے گی؟

پڑکوٹ یوتھ ویلفیئر نے بیڑا اٹھایا ہے کہ اس بار عید صرف ہماری نہیں، ان کی بھی ہوگی۔ ہمارا ارادہ ہے کہ 15 رمضان تک ان ضرورت مندوں تک عید کا سامان پہنچا دیا جائے تاکہ ان کے بچے بھی وہی خوشی محسوس کریں جو ہمارے بچے کرتے ہیں۔

💳 عطیات کے لیے تفصیلات:
• نام: محمد سہیل خان
• بینک: یونائیٹڈ بنک لیمیٹڈ (UBL)
• اکاؤنٹ نمبر: PK70UNIL010900335271881

آپ کا ایک چھوٹا سا تعاون، کسی کی پوری عید بدل سکتا ہے۔

05/02/2026

الحمد للّٰہ! ایک خواب مکمل ہوا، ایک گھر آباد ہوا

پڑکوٹ یوتھ ویلفئر کے غیور اور مخلص ساتھیو! ہمیں یہ بتاتے ہوئے بے حد مسرت اور دلی سکون محسوس ہو رہا ہے کہ پڑکوٹ یوتھ ویلفیئر کی اپیل پر آپ سب کے بھرپور تعاون اور بے مثال جذبے کی بدولت، مرحوم سراج سرور صاحب کے اہل خانہ کے گھر کی تعمیر کا کام اپنے پایہ تکمیل کو پہنچ چکا ہے۔

وہ گھر جو کل تک صرف دیواروں کا ایک ادھورا ڈھانچہ تھا، آج آپ کی سخاوت اور ہمدردی سے ایک محفوظ چھت میں بدل چکا ہے۔ اب مرحوم کی بیوہ اور یتیم بچے اپنے ذاتی اور محفوظ گھر میں منتقل ہو سکیں گے۔

اس مہم میں جس بھائی نے ایک روپیہ دیا، جس نے دیگر کسی طرح تعاون کیا اور جس نے دعاؤں سے نوازا، اللہ پاک ان تمام احباب کی کاوشوں کو اپنی بارگاہ میں قبول فرمائے۔ آپ سب نے ثابت کر دیا کہ انسانیت اور بھائی چارے کا رشتہ سب سے مضبوط ہے۔

23/07/2025

سلام عقیدت ان عظیم طلبہ و اساتذہ کو!

پڑکوٹ بوائیز ہائی اسکول کے ہونہار طلبہ نے میٹرک کے امتحان میں شاندار کامیابی حاصل کر کے نہ صرف اپنے اساتذہ اور والدین کا سر فخر سے بلند کیا ہے بلکہ پورے علاقے کا نام بھی روشن کیا ہے۔ سو فیصد کامیابی کا یہ نتیجہ ان بچوں کی محنت، ان کے اساتذہ کی شب و روز کی لگن اور اس خواب کی تعبیر ہے جو ہر طالب علم اپنے روشن مستقبل کے لیے دیکھتا ہے۔

ہم پڑکوٹ یوتھ ویلفئیر کی جانب سے تمام طلبہ، ان کے والدین، اور اساتذہ کرام کو دل کی گہرائیوں سے مبارکباد پیش کرتے ہیں۔ آپ کی کامیابی ہم سب کے لیے باعثِ فخر ہے اور ثابت کرتی ہے کہ اگر جذبہ صادق ہو تو حالات کی سختیاں بھی راستہ نہیں روک سکتیں۔

لیکن یہ خوشی ادھوری ہے!

یہ ایک تلخ سچائی ہے کہ جن بچوں نے آج شاندار نتائج دے کر تاریخ رقم کی، وہ گزشتہ کئی برسوں سے ایسی عمارت میں تعلیم حاصل کر رہے ہیں جو خود ایک مستقل خطرہ بن چکی ہے۔ وہ عمارت جسے بیس سال پہلے آنے والے زلزلے نے ناقابلِ استعمال کر دیا تھا، آج بھی وہی ملبہ نما حالت میں کھڑی ہے۔ یہ نہ صرف حکومت کی غفلت بلکہ عوامی نمائندوں کی بے حسی اور وعدہ خلافی کا کھلا ثبوت ہے۔

بیس سال گزرنے کے باوجود کیا حکومت کو اس درسگاہ کی تباہ حالی نظر نہیں آئی؟
کیا اسمبلی میں بیٹھے نمائندے صرف ووٹ لینے کے لیے آتے ہیں اور پھر اگلے زلزلے تک سو جاتے ہیں؟
کیا تعلیم کا حق صرف شہروں کے بچوں کا ہے؟ کیا دیہات کے بچے انسان نہیں؟

ہم شرمندہ نہیں، غصے میں ہیں!

ہم حکومتی اداروں اور عوامی نمائندوں سے پوچھتے ہیں کہ کیا یہ بچے مزید بیس سال کھنڈر میں بیٹھ کر تعلیم حاصل کریں گے؟ اگر ان کھنڈرات میں کوئی سانحہ رونما ہو جائے تو کیا اُس وقت بھی آپ “نوٹس لے لیا گیا ہے” کی گردان دہرائیں گے؟

ہم خبردار کرتے ہیں کہ اگر فوری طور پر اس اسکول کی نئی عمارت کی تعمیر یا کم از کم مرمت کا عمل شروع نہ کیا گیا تو پڑکوٹ یوتھ ویلفئیر عوام کے ساتھ مل کر بھرپور احتجاج کا آغاز کرے گی۔ یہ صرف اسکول کی بات نہیں، یہ ہمارے بچوں کے مستقبل، ان کی جانوں، اور ان کے حقِ تعلیم کی بات ہے۔

ہم نہ خاموش رہیں گے، نہ رُکیں گے۔

آخر میں، ایک بار پھر ان بچوں اور اساتذہ کو سلام جنہوں نے نامساعد حالات کے باوجود کامیابی کی ایسی مثال قائم کی جس پر تمام اہلیانِ پڑکوٹ کو ناز ہونا چاہیے۔

پڑکوٹ کے بچوں نے اپنا کام کر دیا ہے، اب حکومت کی باری ہے۔

والسلام
پڑکوٹ یوتھ ویلفئیر

09/07/2025

۔
"جن دیواروں نے دیے تھے ہمارے خوابوں کو پر،
آج وہی دیواریں گر رہی ہیں بے خبر۔"

ہمارے گاؤں کا ایک گورنمنٹ بوائز انٹر کالج پرکوٹ، جو ماضی میں علم کا ایک روشن چراغ تھا، آج اپنی تباہ حالی پر آنسو بہا رہا ہے۔ وہی اسکول جہاں سے نکل کر ہمارے گاؤں کے نوجوان استاد، وکیل، جج اور سرکاری افسر بنے، آج شکستہ دیواروں، ٹوٹی کھڑکیوں، اور خستہ حال فرنیچر کی تصویر بنا ہوا ہے۔

یہ ایک ایسا علمی ادارہ ہے جس کی عمارت دیکھ کر یوں محسوس ہوتا ہے جیسے زلزلے کے بعد کوئی ملبہ باقی رہ گیا ہو۔ چھتوں سے پانی ٹپک رہا ہے، دیواریں اپنی بنیادوں سے لڑکھڑا رہی ہیں، اور کلاسوں میں موجود بینچ اس قدر پرانے اور ٹوٹے ہوئے ہیں کہ بچوں کو زمین پر بیٹھ کر پڑھنا پڑتا ہے۔ بلیک بورڈ مٹی سے اٹے ہوئے ہیں، اور بجلی و پانی کی سہولیات نہ ہونے کے برابر ہیں۔

انتظامیہ کی غفلت، عوامی نمائندوں کی بے حسی، اور محکمہ تعلیم کی لاپروائی نے ایک علم گاہ کو ویرانے میں بدل دیا ہے۔ حیرت کی بات یہ ہے کہ اسی شکستہ عمارت سے نکلنے والے لوگ آج معاشرے میں عزت اور مقام رکھتے ہیں۔ یہ اساتذہ اور طلبہ کی محنت کا نتیجہ تھا، نہ کہ حکومت کی کسی کوشش کا۔

یہ سوال آج ہر ذی شعور انسان کے ذہن میں اُبھرتا ہے کہ کیا ہمارے بچوں کا مستقبل انہی کھنڈرات میں پروان چڑھے گا؟ کیا تعلیم کا حق صرف شہروں تک محدود ہے؟ دیہاتی بچوں کے ساتھ یہ ناانصافی کیوں؟

ضرورت اس امر کی ہے کہ حکومت اور مقامی نمائندے اس اسکول کی حالت زار پر فوری توجہ دیں۔ اگر آج ہم نے اپنے تعلیمی اداروں کو بحال نہ کیا، تو کل ہم اپنے بچوں کے مستقبل سے ہاتھ دھو بیٹھیں گے۔

اختتامیہ:
یہ کالج محض اینٹوں اور سیمنٹ کی عمارت نہیں، بلکہ یہ ہماری نسلوں کی تقدیر لکھنے والی جگہ ہے۔ اسے یوں برباد نہ ہونے دیں۔ علم کا چراغ بجھ گیا تو اندھیرا صرف ایک کالج تک محدود نہ رہے گا، بلکہ پورے معاشرے کو نگل جائے گا

09/07/2025

الحمدللہ ہم ایسے معاشرے کا حصہ ہیں جہاں ہمارے نوجوان مالی پوزیشن نہ ہونے کے باوجود اپنی تنخواہوں میں سے حصہ ڈال کر اپنے پچوں اور بھائیوں کے لیے بنچ مہیا کیے۔
یاد رہے یہ ایک سرکاری انٹر کالج ہے۔
سلام پڑکوٹ یوتھ

25/06/2025

09/06/2025

السلام علیکم ورحمۃ اللہ وبرکاته

پڑکوٹ یوتھ ویلفیئر کی جنرل میٹنگ کا انعقاد کیا جا رہا ہے۔ اس اجلاس کا بنیادی مقصد ویلفیئر کی تنظیمی ڈھانچے کی دوسری سطح کی تشکیل، موجودہ کارکردگی کا جائزہ، اور مستقبل کے لائحہ عمل پر مشاورت ہے۔

📅 تاریخ: پیر، 9 جولائی 2025
🕒 وقت: سہ پہر 3 بجے
📍 مقام: جناب عاصم شبیر صاحب کا گھر

تمام معزز ممبران سے گزارش ہے کہ اس اہم اجلاس میں اپنی شرکت کو یقینی بنائیں۔ آپ کی موجودگی اور قیمتی مشاورت ویلفیئر کے مؤثر اور فعال مستقبل کی ضمانت ہے۔