11/09/2025
سپیکر پنجاب اسمبلی ملک محمد احمد خاں نے عوامی خدمت کمیٹی کی جانب سے سیلاب متاثرین کے لیے امدادی سامان پر مشتمل راشن ٹرک روانہ کیا۔ اس موقع پر عوامی خدمت کمیٹی کے عہدیداران اور کارکنان بھی موجود تھے جنہوں نے سیلاب متاثرین کے لیے اپنی خدمات کو خدمتِ خلق کا عظیم فریضہ قرار دیا۔
سپیکر پنجاب اسمبلی نےعوامی خدمت کمیٹی کے جذبہ خدمت کو سراہتے ہوئے کہا کہ مشکل وقت میں قوموں کی اصل پہچان سامنے آتی ہے اور یہی جذبہ اتحاد و یکجہتی پاکستان کی اصل روح ہے۔
سپیکر پنجاب اسمبلی نے کہا کہ عوامی خدمت کمیٹی کے رضاکار سیلابی علاقوں میں نہ صرف امدادی سرگرمیوں میں بڑھ چڑھ کر حصہ لے رہے ہیں بلکہ وہاں موجود متاثرہ خاندانوں کو ہر ممکن سہولت فراہم کرنے کے لیے بھی کوشاں ہیں۔
راشن ٹرک میں آٹا، چاول، دالیں، گھی، خشک دودھ، پینے کا صاف پانی اور دیگر ضروری اشیائے خورونوش شامل تھیں۔
