13/08/2026
28 صفر المظفر 1448ھ، بمطابق 12 اگست 2026ء بروز بدھ، مرکز الاقتصاد الاسلامی اور حلال اکنامی ایڈوائزری سینٹر کی نئی بلڈنگ کا افتتاح خلیفۂ امیرِ اہلِ سنت، مولانا عبید رضا عطاری نے فرمایا۔
اس بلڈنگ میں دونوں اداروں کی مختلف سروسز انجام دینے کے لیے وسیع جگہ کی گنجائش موجود ہے، جہاں ایک طرف پبلک ڈیلنگ اور آن لائن میٹنگ کا سلسلہ ہوگا، تو دوسری طرف تحقیقی شعبے کے لیے ایک بہت بڑی لائبریری بھی قائم کی گئی ہے۔ علاوہ ازیں، ایک جاذبِ نظر بہت بڑا ورک اسٹیشن بھی فتاویٰ لکھنے اور مختلف پروجیکٹس پر کام کرنے والوں کے لیے مہیا کیا گیا ہے۔
یہ بلڈنگ عالمی مدنی مرکز فیضانِ مدینہ سے متصل پلاٹ پر قائم ہے، جہاں مرکز الاقتصاد الاسلامی کے نام سے یہ ادارہ پہلے کم حجم والی جگہ میں قائم کیا گیا تھا۔
افتتاحی تقریب کا آغاز تلاوتِ قرآنِ پاک اور نعتِ رسولِ مقبول صلی اللہ علیہ وسلم سے ہوا۔ اس کے بعد مفتی علی اصغر صاحب نے مرکز الاقتصاد الاسلامی اور حلال اکنامی ایڈوائزری سینٹر کے بنیادی مقاصد پر مختصر گفتگو فرمائی۔
بعد ازاں خلیفۂ امیرِ اہلِ سنت نے تاجروں کے لیے نصیحت آموز کلمات ارشاد فرمائے اور آخر میں دعا بھی فرمائی۔ اس تقریب میں دارالافتاء اہلِ سنت سے مفتی سجاد صاحب، مفتی محمد حسان صاحب، مفتی کفیل صاحب اور مفتی شفیق صاحب نے خصوصی طور پر شرکت فرمائی۔
اراکینِ شوریٰ میں سے حاجی امین عطاری، حاجی فضیل عطاری، حاجی شاہد مدنی عطاری اور سائیں برکت عطاری نے بھی خصوصی طور پر شرکت فرمائی۔
حلال اکانومی ایڈوائزری سینٹر کے ڈائریکٹر، ماہرِ معیشت اور دارالمدینہ یونیورسٹی کے وائس چانسلر ڈاکٹر دانش اور متعدد علمائے کرام نے بھی اس پروگرام میں شرکت فرمائی۔ نیز، مختلف کاروباری اور سماجی شخصیات بھی اس تقریب میں شریک ہوئیں۔
مفتی علی اصغر صاحب اور ادارے کے دیگر افراد نے مہمانوں کا استقبال کیا۔
