12/07/2026
پریس ریلیز
تاریخ۔ 12-07-2026
الحمدللہ! سعدی ٹاؤن میں پاکستان رینجرز (سندھ) کی مستقل چوکی کے قیام کی جانب ایک اہم پیش رفت
اہلِ سعدی ٹاؤن کے لیے یہ ایک خوش آئند خبر ہے کہ اللہ تعالیٰ کے فضل و کرم سے ہوم ڈیپارٹمنٹ کی جانب سے سعدی ٹاؤن میں پاکستان رینجرز (سندھ) کی مستقل چوکی کے قیام کے لیے منظوری کی درخواست، انکوائری نمبر کے ساتھ، پاکستان رینجرز (سندھ) کو ارسال کر دی گئی ہے۔
ابتدائی مرحلے میں پاکستان رینجرز (سندھ) کا آپریشنل ونگ مجوزہ مقام کا تفصیلی سائٹ انسپیکشن کرے گا تاکہ مقام، جغرافیائی ترتیب، دستیاب سہولیات اور مستقل رینجرز پوسٹ کے قیام کی انتظامی و عملی امکانات کا جامع جائزہ لیا جا سکے۔ ان شاء اللہ، انسپیکشن کے بعد تمام قانونی اور انتظامی تقاضے مکمل ہونے پر سعدی ٹاؤن میں رینجرز چوکی کے قیام کی راہ مزید ہموار ہوگی۔
اس موقع پر میں سعدی ٹاؤن ریزیڈنٹ اینڈ ویلفیئر آرگنائزیشن کے تمام عہدیداران، معززینِ علاقہ اور اہلِ سعدی ٹاؤن کا تہہ دل سے شکر گزار ہوں جنہوں نے اس قومی مفاد کے منصوبے میں اپنا بھرپور تعاون کیا۔ اب بھی میری تمام رہائشیوں سے مؤدبانہ درخواست ہے کہ اس مشن کو کامیاب بنانے کے لیے اپنا بھرپور کردار ادا کریں تاکہ ہمارا علاقہ امن، قانون کی بالادستی اور محفوظ ماحول کی بہترین مثال بن سکے۔
تمام والدین سے خصوصی گزارش ہے کہ اپنے بچوں کی سرگرمیوں پر گہری نظر رکھیں۔ اگر کسی بچے کے پاس الیکٹرانک سگریٹ (ویپ)، نشہ آور اشیاء یا کوئی مشکوک چیز موجود ہو تو فوری طور پر اس کی روک تھام کریں۔ نوجوان نسل ہمارا مستقبل ہے، اسے منشیات اور جرائم کی لعنت سے محفوظ رکھنا ہم سب کی مشترکہ ذمہ داری ہے۔
اگر کسی بھی شہری کو اپنے علاقے میں منشیات فروشی، نوجوانوں کو نشہ آور اشیاء فراہم کرنے، یا کسی بھی غیر قانونی سرگرمی کے بارے میں مستند معلومات حاصل ہوں تو براہِ راست مجھ سے رابطہ کریں۔ فراہم کی جانے والی ہر اطلاع کو مکمل رازداری کے ساتھ متعلقہ قانون نافذ کرنے والے اداروں تک پہنچایا جائے گا تاکہ قانونی کارروائی عمل میں لائی جا سکے۔
ان شاء اللہ، رینجرز چوکی کے قیام کے بعد قانون نافذ کرنے والے اداروں کے ساتھ مکمل تعاون کیا جائے گا اور معاشرے کو نقصان پہنچانے والے عناصر کے خلاف قانون کے مطابق کارروائی میں کسی قسم کی رعایت نہیں برتی جائے گی۔ ہمارا مقصد کسی فرد کو نشانہ بنانا نہیں بلکہ سعدی ٹاؤن کو ایک محفوظ، پُرامن اور منشیات سے پاک علاقہ بنانا ہے۔
سید غفران ہاشمی
سیکیورٹی اینڈ میڈیا سیل کوآرڈینیٹر
سعدی ٹاؤن ریزیڈنٹ اینڈ ویلفیئر آرگنائزیشن
مرکزی وائس چیئرمین
پاکستان میڈیا ایسوسی ایشن
جنرل سیکرٹری
قومی امن کمیٹی
ڈائریکٹر آپریشنز
انٹرنیشنل ہیومن رائٹس موومنٹ
