07/10/2026
لاہور: پاکستان مسلم لیگ یوتھ کے زیر اہتمام آل پاکستان یوتھ لیڈرشپ کانفرنس کا انعقاد کیا گیا جس کا مرکزی موضوع “کیا پاکستان میں نئے صوبوں کی ضرورت ہے؟” تھا۔ کانفرنس میں پاکستان بھر سے مختلف سیاسی و مذہبی جماعتوں کے یوتھ ونگز، طلبہ تنظیموں، سماجی و غیر سیاسی نوجوان رہنماؤں اور مختلف شعبہ ہائے زندگی سے تعلق رکھنے والی شخصیات نے شرکت کی۔
تقریب کی میزبانی مرکزی صدر پاکستان مسلم لیگ یوتھ محمد کامران سعید عثمانی نے کی جبکہ کانفرنس کی صدارت چوہدری سالک حسین، سینئر نائب صدر پاکستان مسلم لیگ و وفاقی وزیر برائے اوورسیز پاکستانیز و ہیومن ریسورس ڈویلپمنٹ نے بطور چیئرمین کی۔
کانفرنس کا آغاز کرتے ہوئے محمد کامران سعید عثمانی نے ہاؤس کو اوپن کیا اور نئے صوبوں کے قیام کے حوالے سے مختلف سیاسی، انتظامی اور عوامی پہلوؤں پر بحث کا آغاز کیا۔
کانفرنس میں مجیب الرحمن شامی، ڈاکٹر ناصر بیگ، اسداللہ طارق، رانا وحید مرکزی صدر منہاج یوتھ لیگ، فرحان اعجاز مرکزی صدر مصطفوی موومنٹ، بلال ربانی ایم ایس او، یاسر عباسی جنرل سیکرٹری ایم ایس ایف (ن)، حاشر منہاس ڈپٹی جنرل سیکرٹری آئی ایس ایف، شعیب بٹالوی صدر ینگ ایکسپورٹرز ایسوسی ایشن، بیرسٹر امارت، شیزا قریشی، حافظ عمر مرکزی صدر اہل حدیث یوتھ فورس، رانا عثمان صدر طلبہ محاذ و صدر جمعیت طلبہ اسلام، وقاص والانہ، سعد الرحمن ڈکی بھائی یوٹیوبر، غازی بابر چیئرمین اسٹار ایشیا، موسیٰ کھوکھر صدر پی ایس ایف پنجاب، حافظ امیر شہزاد نائب صدر پی ایس ایف، چوہدری محمد اطہر چیئرمین لسٹ یونیورسٹی، یاسر شامی ،فادر بشارت سراج مسیحی برادری سمیت پاکستان بھر سے مختلف سیاسی و غیر سیاسی یوتھ تنظیموں کے مرکزی رہنماؤں نے شرکت کی۔
کانفرنس کے دوران مختلف سیاسی و مذہبی جماعتوں اور تنظیموں کے نوجوان رہنماؤں نے نئے صوبوں کے قیام کے حوالے سے اپنے اپنے مؤقف پیش کیے۔ مقررین نے انتظامی امور، وسائل کی منصفانہ تقسیم، عوام تک حکومتی سہولیات کی رسائی، آبادی کے پھیلاؤ اور نوجوانوں کے مستقبل سمیت مختلف پہلوؤں پر تفصیلی گفتگو کی۔
شرکاء کے درمیان موضوع پر کھلی بحث اور مکالمہ ہوا اور مختلف رہنماؤں نے نئے صوبوں کے قیام اور اس کی ضرورت کے حوالے سے اپنی آراء پیش کیں۔
