PFUJ Secretariat Islamabad

17/06/2026

(پریس ریلیز)
سپریم کورٹ سے صحافیوں کی بے دخلی آزادی صحافت پر قدغن ہے، فیصلہ فوری واپس لیا جائے: راولپنڈی اسلام آباد یونین آف جرنلسٹس

اسلام آباد(پ ر) راولپنڈی اسلام آباد یونین آف جرنلسٹس (RIUJ) نے سپریم کورٹ آف پاکستان سے صحافیوں کی بے دخلی کے اقدام پر گہری تشویش کا اظہار کرتے ہوئے اسے آزادی صحافت، عوام کے حقِ معلومات اور جمہوری اقدار کے منافی قرار دیا ہے۔راولپنڈی اسلام آباد یونین آف جرنلسٹس کے صدر طارق عثمانی نے کہا ہے کہ سپریم کورٹ جیسے اہم قومی ادارے میں صحافیوں کی رسائی محدود کرنا نہ صرف میڈیا کے پیشہ ورانہ فرائض کی انجام دہی میں رکاوٹ ہے بلکہ اس سے شفافیت کے عمل پر بھی منفی اثرات مرتب ہوں گے۔ انہوں نے مطالبہ کیا کہ صحافیوں کو درپیش مشکلات کا فوری ازالہ کیا جائے اور ان کی پیشہ ورانہ ذمہ داریوں کی ادائیگی کے لیے سازگار ماحول فراہم کیا جائے۔ جنرل سیکرٹری رضوان غلیزئی نے کہا کہ صحافی ریاستی اداروں اور عوام کے درمیان ایک اہم پل کا کردار ادا کرتے ہیں۔ سپریم کورٹ سے صحافیوں کی بے دخلی کا فیصلہ نہ صرف قابلِ افسوس ہے بلکہ اس سے میڈیا برادری میں شدید بے چینی پائی جا رہی ہے۔ انہوں نے مطالبہ کیا کہ متعلقہ حکام اس فیصلے پر نظرثانی کرتے ہوئے صحافیوں کے تحفظات کو دور کریں۔نائب صدور محمد فیصل اعوان اور جویریہ صدیق نے اپنے مشترکہ بیان میں کہا کہ عدلیہ اور میڈیا دونوں جمہوری نظام کے مضبوط ستون ہیں۔ صحافیوں کی عدالتی کارروائیوں تک رسائی محدود کرنا شفافیت اور جوابدہی کے اصولوں سے مطابقت نہیں رکھتا۔ انہوں نے کہا کہ صحافتی تنظیمیں آزادی اظہار اور آزادی صحافت کے تحفظ کے لیے ہر آئینی و جمہوری فورم پر آواز بلند کرتی رہیں گی۔انفارمیشن سیکرٹری مدثر الیاس کیانی نے کہا کہ سپریم کورٹ کی رپورٹنگ کرنے والے صحافی برسوں سے قومی اہمیت کے مقدمات اور عدالتی کارروائیوں کی ذمہ دارانہ انداز میں کوریج کرتے آ رہے ہیں۔ ایسے میں صحافیوں کو ان کے پیشہ ورانہ ماحول سے دور کرنا انتہائی تشویشناک عمل ہے۔ انہوں نے کہا کہ صحافیوں کی رسائی کو محدود کرنے کے بجائے سہولیات میں اضافہ کیا جانا چاہیے تاکہ عوام تک بروقت، مستند اور درست معلومات کی فراہمی یقینی بنائی جا سکے۔ انہوں نے مزید کہا کہ راولپنڈی اسلام آباد یونین آف جرنلسٹس صحافیوں کے حقوق کے تحفظ کے لیے ہر سطح پر اپنا کردار ادا کرتی رہے گی اور اس معاملے پر دیگر صحافتی تنظیموں کے ساتھ مکمل یکجہتی کا اظہار کرتی ہے۔جوائنٹ سیکرٹریز عبد الوحید جنجوعہ اور خالد ملک نے اپنے مشترکہ بیان میں کہا کہ صحافیوں کے لیے پیدا کی جانے والی رکاوٹیں کسی صورت قابلِ قبول نہیں۔ انہوں نے مطالبہ کیا کہ صحافیوں کو فوری طور پر ان کے سابقہ ورکنگ ماحول اور سہولیات بحال کی جائیں تاکہ وہ اپنی پیشہ ورانہ ذمہ داریاں بلا رکاوٹ انجام دے سکیں۔راولپنڈی اسلام آباد یونین آف جرنلسٹس نے چیف جسٹس آف پاکستان اور متعلقہ حکام سے مطالبہ کیا ہے کہ اس معاملے کا فوری نوٹس لیا جائے، صحافی برادری کے تحفظات دور کیے جائیں اور سپریم کورٹ میں میڈیا کی مؤثر اور باوقار نمائندگی کو یقینی بنایا جائے۔

جاری کردہ:
مدثر الیاس کیانی
انفارمیشن سیکرٹری
راولپنڈی اسلام آباد یونین آف جرنلسٹس (RIUJ)
+92-321-6866670

12/06/2026

۔۔۔پریس ریلیز۔۔۔

لاہور۔ پاکستان فیڈرل یونین آف جرنلسٹس (پی ایف یو جے) نے میٹرو ون نیوز ٹی وی چینل کی نشریات کی بندش اور ان کے سینکڑوں ملازمین کے بے روزگار ہونے پر اپنے شدید تحفظات کا اظہار کرتے ہوئے حکومت سے مطالبہ کیا ہے کہ وہ نہ صرف ان ملازمین کوایڈجسٹ کرائے بلکہ ان کے بقایاجات کی ادائیگی بھی یقینی بنائی جائے۔ پی ایف یو جے کے صدر رانا محمد عظیم، سیکرٹری شکیل احمد، فنانس سیکرٹری شہر بانو اور ارکان فیڈرل ایگزیکٹو کونسل نے میٹرو ون نیوز کی نشریات کی بندش پر اپنے تحفظات اور اس کے ملازمین کے بے روز گار ہونے پر ان کے ساتھ اظہار یک جہتی اور گہری تشویش کا اظہار کیا ہے۔ ان کا کہنا ہے کہ پاکستان میڈیا انڈسٹری اور میڈیا ورکرز پہلے ہی مشکلات کا شکار ہیں۔ اس ماحول میں کسی چینل کی بندش اور سٹاف کی بے روزگاری انتہائی تشویش کا باعٹ اور ورکر دشمن عمل ہے۔ پی ایف یو جے لیڈر شپ نے کہا ہے کہ نیوز چینل کے سٹاف کو قوانین کے مطابق بقایاجات کی عدم ادائیگی ناقابل قبول ہے۔ پی ایف یو جے لیڈر شپ نے حکومت پاکستان اور پیمرا کے ذمہ داران پر زور دیا ہے کہ وہ فوری طور پر بے روز گار ہونے والے صحافیوں کو ایڈجسٹ کرائے جبکہ میٹرو ون نیوز کے اثاثہ جات بیچ کر صحافی کارکنوں اور دیگرعملہ کےبقایاجات ادا کئے جائیں تاکہ صحافیوں میں پائی جانے والی بے چینی ختم ہو سکے۔

احتشام الحق سیکرٹری اطلاعات پی ایف یو جے

08/06/2026

14/05/2026

احتجاجی مظاہرہ

لاہور۔ پاکستان فیڈرل یونین آف جرنلسٹس (پی ایف یو جے) کے صدر رانا محمد عظیم، پی یو جے کے صدر میاں شاہد ندیم اور صحافی رہنما شہباز آرائیں نے کہا ہے کہ مختلف ادارے ورکنگ صحافیوں کو غیرقانونی طور پر جبری برطرفیاں کر رہے ہیں جو کسی صورت قبول نہیں ہیں اور وہ اس کے خلاف حکومت اور میڈیا ہاؤسز مالکان کو باور کراتے ہیں کہ وہ اس طرح کے ہتھکنڈوں سے باز رہیں اور برطرف کئے گئے صحافیوں کو فوری بحال کریں ورنہ نہ صرف ان کےدفاتر کے باہر مظاہرے کئےجائیں گے بلکہ عید کے اجتماعات میں ان کے خلاف بھر پور مہم چلائی جائےگی۔ پنجاب یونین آف جرنلسٹس (پی یو جے) کی جانب سے دی گئی کال پر پنجاب اسمبلی کے سامنے الفلاح چوک میں منعقدہ احتجاجی مظاہرہ سے خطاب کرتے ہوئے پی ایف یو جے کے صدر رانا محمد عظیم نے کہا کہ وہ ہمیشہ صحافیوں کے خلاف اٹھائے گئے اقدامات کے سامنے ڈٹ کر کھڑے ہوتے ہیں اور اب بھی پی ایف یو جے سنو نیوز، آج نیوز، جنگ گروپ اور دیگر اداروں سے نکالے گئے صحافیوں کے ساتھ کھڑے ہیں اور ان کی بحالی کے لئے جدو جہد کریں گے۔ انہوں نے مزید کہا کہ وہ حکومتی ذمہ داران سے بھی مطالبہ کرتے ہیں کہ وہ اخبارات اور الیکٹرانک میڈیا
سے غیر قانونی چھانٹیاں کرنے والے اداروں کے خلاف فوری کارروائی کرتے ہوئے ان کے اشتہارات بند کریں اور پشت پناہی ختم کریں۔ انہوں نے اعلان کیا کہ عید سے قبل صحافیوں کی تنخواہیں ادا نہ کرنے اور چھانٹیاں کرنے والے اداروں کے مالکان کو عید کے اجتماعات میں بے نقاب کریں گے۔ پی یو جے کے صدر میاں شاہد ندیم نے کہا کہ سنو نیوز سمیت مختلف ادارے نہ صرف صحافیوں کی تنخواہوں کی عدم ادائیگی میں ملوث ہیں بلکہ جبری چھانٹیاں بھی کی جا رہی ہیں جو برداشت نہیں کی جائیں گے اور ہم ان اداروں کے باہر احتجاجی مظاہرے کریں گے۔ انہوں نے کہا کہ وہ پی ایف یو جے کے صدر رانا محمد عظیم کی کال پر لبیک کہیں گے اور ان کے ساتھ مل کر بھر پور احتجاجی مہم چلائیں گے۔ صحافی رہنما شہباز آرائیں نے کہا کہ عید کے موقع پر صحافیوں کو اداروں سے نکالنا نہ صرف غیر قانونی ہے بلکہ ان کے خاندانوں کا معاشی قتل ہے جس کی اجازت اخلاقایات یا کوئی قانون نہیں دیتا۔ انہوں نے کہا کہ وہ پی ایف یو جے کے صدر کی کال پر ان کے ساتھ مل کر احتجاجی مہم میں بھر پور کردار ادا کریں گے۔

11/05/2026

Special Edition Daily Awami Mission Dated 11-5-2026

Zuliana Lainez Otero elected President of IFJ, Nasser Abu Baker elected Senior Vice President, while Zied Dabbar and Jennifer Moreau elected Vice Presidents; Raffaele Lorusso chosen as Honorary Treasurer

IFJ Global Advisory Body includes Adhwan Al-Ahmari, Mohamed Al Araimi, Rashid Al Hamer, Maria Antoniadou, Laura Davison, Samira de Castro, Carla Gaudensi, Mylène Girardeau, Adriana Hurtado, Park Jong Hyun, Joachim Kreibich, Marion Medjo Obam, Adam Portelli, Guruh Dwi Riyanto, Maria Luisa Rogério, Jonathan Schleuss and María Ángeles Samperio, while Rana Muhammad Azeem elected member of the IFJ Executive Council

09/05/2026

پاکستان کے لیے ایک اور اہم اعزاز اس وقت سامنے آیا جب پیرس میں ساؤتھ ایشیا جرنلسٹس کے اہم اجلاس کا انعقاد کیا گیا۔ اجلاس کی صدارت پاکستان سے تعلق رکھنے والے شکیل احمد نے کی، جو ساؤتھ ایشیا فیڈریشن کے جنرل سیکرٹری بھی ہیں۔ اجلاس میں جنوبی ایشیا کے مختلف ممالک سے آئے ہوئے صحافتی نمائندگان نے شرکت کی اور خطے میں صحافیوں کو درپیش چیلنجز، آزادیٔ صحافت، میڈیا ورکرز کے تحفظ، انتخابی امور، صحافتی تنظیموں کے باہمی تعاون اور علاقائی سطح پر مشترکہ جدوجہد کے فروغ پر تفصیلی تبادلۂ خیال کیا گیا۔

اجلاس کے دوران اس عزم کا اظہار بھی کیا گیا کہ حالیہ انتخابات کے بعد تشکیل پانے والے تمام صحافتی پلیٹ فارمز اور تنظیموں کو مزید فعال اور مضبوط بنایا جائے گا، جبکہ جنوبی ایشیائی صحافیوں کے درمیان تعاون، رابطوں اور مشترکہ مہمات کو مزید مؤثر انداز میں آگے بڑھایا جائے گا۔

شرکاء نے اس امر کو پاکستان اور جنوبی ایشیائی صحافتی برادری کے لیے ایک اہم پیش رفت قرار دیا کہ عالمی سطح پر منعقدہ اس اہم اجلاس کی قیادت پاکستان کے نمائندے کے سپرد کی گئی، جو خطے میں پاکستانی صحافیوں کے بڑھتے ہوئے کردار، اعتماد اور مؤثر عالمی نمائندگی کا مظہر ہے۔