23/09/2026
نیشنل یوتھ اسمبلی پاکستان گلگت بلتستان چیپٹر کی نئی کابینہ کا اعلان
گلگت: نیشنل یوتھ اسمبلی پاکستان نے گلگت بلتستان چیپٹر کے سال 2026-27 کے لیے نئی کابینہ اور مختلف عہدوں پر تقرریوں کا باضابطہ نوٹیفکیشن جاری کر دیا۔
نوٹیفکیشن کے مطابق شہریار کو یوتھ چیف منسٹر، انعام الحسن گوہر کو یوتھ گورنر، دلپذیر قادری کو یوتھ اسپیکر، حافظ حفیظ الرحمٰن خلیق کو ڈپٹی یوتھ اسپیکر جبکہ گلسیمہ بی بی کو ڈپٹی یوتھ چیف منسٹر مقرر کیا گیا ہے۔
انجینئر طارق اسد آزاد کو صوبائی آرگنائزر جبکہ عقیلہ بتول، ہانیہ شاہ سمیت دیگر اراکین کو مختلف ذمہ داریاں سونپی گئی ہیں۔ گلگت بلتستان کے مختلف اضلاع سے نوجوانوں کو فنانس، تعلیم، صحت، سیاحت، اطلاعات، قانون، ماحولیات، یوتھ افیئرز، آئی ٹی اور سائنس و ٹیکنالوجی سمیت مختلف شعبوں میں یوتھ وزراء کی ذمہ داریاں دی گئی ہیں۔
نوٹیفکیشن کے تحت پارلیمانی سیکرٹریز، مشیران اور اپوزیشن و ایسوسی ایٹ ممبران کا بھی اعلان کیا گیا ہے۔ رجب قمر کو ترجمان نیشنل یوتھ اسمبلی پاکستان گلگت بلتستان چیپٹر مقرر کیا گیا ہے، جبکہ یوتھ گورنر کے مشیران میں مبسم حسین وانی، کنیز فاطمہ اور سروت غفار شامل ہیں۔
انتظامی امور کے لیے زاہد حسین کو سیکرٹری کوآرڈینیشن جبکہ راجہ محمد مقپون کو ایڈیشنل سیکرٹری کوآرڈینیشن مقرر کیا گیا ہے۔
نیشنل یوتھ اسمبلی پاکستان کے مطابق نئی کابینہ کی نامزدگی تین ماہ کی پروبیشنری مدت کے لیے کی گئی ہے، جس میں توسیع بھی ممکن ہے۔ نوٹیفکیشن صدر نیشنل یوتھ اسمبلی پاکستان حنان علی عباسی کی منظوری سے جاری کیا گیا۔
نئی کابینہ سے توقع کی جا رہی ہے کہ وہ گلگت بلتستان کے نوجوانوں کی مؤثر نمائندگی، ان کے مسائل کو اجاگر کرنے اور نوجوانوں کی فلاح و ترقی کے لیے اپنا کردار ادا کرے گی۔
