12/02/2026
Phander Polo Ground par honay wala yeh ijlas awaam ke ghair-mamooli josh aur ittehad ki wajah se ek powershow ki haisiat de gya.. teru, Barsat, Handrap, Gulakhmuli, Chashi aur Shamaran se bari tadaad mein logh yahan pohanchay aur Phander ki zameen ne ek martaba phir apni siyasi zinda dili ka izhar kiya.
Is mauqe par sabiq Nigran Wazir-e-Taleem Abdul Jahan ne Phander Polo Ground se apni baqaida siyasi sargarmiyon ka aaghaz karte hue kaha:
“Wa tu‘izzu man tasha — izzat dene wali sirf Allah ki zaat hai, jo jis ko chahta hai izzat deta hai.”
Unhon ne kaha ke mashawarat wahi hoti hai jahan baray, buzurg, behn-bhai mojood hon, aur Phander ki awaam ne is ijlas ko kamyab bana kar is baat ko sabit kar diya.
Abdul Jahan ne jazbati andaaz mein kaha:
“Phander mera ghar hai. Yehi wo jagah hai jahan se meri taleem ka safar shuru hua yehi parhna meri pehchan hai.”
Unhon ne isi khush-qismat zameen par, awaam ki mojoodgi mein, apni siyasi muhim ka aaghaz karte hue elan kiya ke:
“Aaj isi muqaddas aur azeez jagah se main apni siyasi sargarmiyon ka aaghaz kar raha hoon. Yeh muqabla Gulapor se Barsat tak ke umeedwaron se hai.”
Ijlas ke dauran jo awaami josh, bharpoor shirkat aur ittehad nazar aaya, us ne is baat ko wazeh kar diya ke Phander apna faisla khud karne ke liye tayar hai.
Yeh ijlas sirf aik gathering nahi tha yeh Phander ki collective awaaz, siyasi bedari aur mustaqbil ka elaan tha.
Phander jaag chuka hai , aur Polo Ground se yeh paighaam poore ilaqe tak pohnch chuka hai.
