18/06/2026
ہم گومل یونیورسٹی انتظامیہ سے مطالبہ کرتے ہیں کہ طلبہ کے معاشی حالات کو مدنظر رکھتے ہوئے فیسوں میں حالیہ اضافے پر فوری نظرثانی کی جائے اور ایسے فیصلے کیے جائیں جو طلبہ کے تعلیمی مستقبل کو بہتر بنانے میں معاون ثابت ہوں، نہ کہ ان کی مشکلات میں مزید اضافہ کریں۔
گزشتہ سال سمر سمسٹر کی رجسٹریشن فیس 3000 روپے تھی جسے اس سال بڑھا کر 4000 روپے کر دیا گیا ہے۔ اسی طرح امتحانی فیس فی مضمون 1000 روپے سے بڑھا کر 1250 روپے کر دی گئی ہے۔ موجودہ مہنگائی کے دور میں یہ اضافہ طلبہ پر اضافی مالی بوجھ ڈالنے کے مترادف ہے۔
تعلیم ہر طالب علم کا بنیادی حق ہے، لیکن فیسوں میں مسلسل اضافہ طلبہ اور ان کے والدین کے لیے شدید مشکلات پیدا کر رہا ہے۔ اکثر طلبہ متوسط اور غریب گھرانوں سے تعلق رکھتے ہیں، جن کے لیے پہلے ہی تعلیمی اخراجات پورے کرنا ایک بڑا چیلنج ہے۔ ایسے حالات میں مزید مالی بوجھ ان کے تعلیمی سفر کو متاثر کر سکتا ہے۔
لہٰذا یونیورسٹی انتظامیہ سے اپیل ہے کہ طلبہ کے مفاد کو ترجیح دیتے ہوئے اس فیصلے پر نظرثانی کرے اور فیسوں میں اضافے کو واپس لے تاکہ طلبہ یکسوئی کے ساتھ اپنی تعلیم جاری رکھ سکیں۔
Press secretary paroa student unity IRFAN BALOCH
