16/10/2026
یتیم دلہن کی شادی، پورا ملک شریک❤️
صرف 2 مرغیاں مانگی تھیں، قوم نے شادی کو یادگار بنا دیا!
الجزائر کی یتیم لڑکی شہرزاد کی شادی کی تقریب بالآخر منعقد ہوگئی۔ الجزائریوں نے اسے یادگار و شاندار تقریب بنا دیا۔ اس لڑکی کے پاس شادی کی تیاری کے لیے کچھ بھی نہیں تھا، اس کی خوشیوں میں شریک ہونے کے لیے ملک بھر سے لوگ پہنچے۔ یوں محسوس ہوا جیسے ایک یتیم لڑکی کی خوشی پورے ملک کی خوشی بن گئی ہو۔
الجزائر کے صوبے عین الدفلی کے شہر سیدی لخضر سے تعلق رکھنے والی شہرزاد کی شادی میں چند باقی تھے، مگر وسائل نہ ہونے کی وجہ سے کچھ بھی تیاری نہ ہو سکی تھی۔ سماجی کارکن حمید ف*ج نے اس کے حالات بیان کرتے ہوئے لوگوں سے مدد کی اپیل کی۔ جب اس سے پوچھا گیا کہ اسے کیا چاہیے تو اس نے بس اتنا کہا:
’’مجھے اپنی شادی میں مہمانوں کے کھانے کے لیے صرف دو مرغیاں چاہئیں۔‘‘
لیکن اس معصوم خواہش نے لوگوں کے دلوں پر ایسا اثر کیا کہ مدد کا سلسلہ چل نکلا۔ کسی نے نقد رقم دی، کسی نے شادی کے کپڑے اور سامان فراہم کیا، کسی نے سونے کے زیورات تحفے میں دیئے، تو کسی نے شادی کے تمام اخراجات اٹھانے کی ذمہ داری لے لی۔
پھر شہرزاد کی شادی ایک شاندار تقریب میں بدل گئی۔ قیمتی گاڑیوں اور موٹر سائیکلوں کے جلوس کے ساتھ لوگ اس کی خوشیوں میں شریک ہونے پہنچے۔ دو مرغیوں کی خواہش رکھنے والی دلہن کے لیے مینڈھے اور بھیڑیں پیش کی گئیں۔ تقریب میں شریک بچوں اور مہمانوں کے لیے 3 ہزار روایتی سینڈوچ اور 200 روسٹ مرغیوں کا انتظام بھی کیا گیا۔ رخصتی کے وقت روایتی فنون کا بھی شاندار مظاہرہ کیا گیا۔
الجزائری میڈیا کے مطابق، ایک صاحبِ خیر نے خاندان کے لیے نیا گھر تعمیر کرانے کا اعلان کیا اور دلہن کی والدہ کے لیے ماہانہ مالی مدد کا وعدہ کیا، جبکہ دوسرے محسنوں نے سونے کے زیورات، رقم اور شادی کے دیگر اخراجات کی ذمہ داری اٹھائی۔ روایتی
یہ صرف ایک یتیم لڑکی کی شادی نہیں تھی، بلکہ اس بات کا مظاہرہ تھا کہ جب لوگ کسی مجبور انسان کا دکھ اپنا دکھ سمجھ لیں تو اس کی زندگی کی سب سے بڑی محرومی کو خوشی میں بدلا جاسکتا ہے۔ اسی سے معاشرہ جنت نظیر بن جاتا ہے۔
شہرزاد نے دو مرغیاں مانگی تھیں، مگر اسے کھانے پینے کا سامان، زیورات، شادی کے تحائف، مالی مدد اور سب سے بڑھ کر لوگوں کی محبت نصیب ہوئی۔ اس کی خوشی میں شریک ہونے والوں نے اسے احساس دلایا کہ وہ یتیم ضرور ہے، مگر تنہا نہیں، اس کے دکھ میں شریک ہونے اور اس کی خوشیوں کو دوبالا کرنے والے بھی موجود ہیں۔
اللہ تعالیٰ اس جوڑے کی زندگی محبت، سکون اور برکتوں سے بھر دے۔ آمین! ❤️
