03/05/2025
Pagbasa ng Pelikula, Pagpapalawak ng Kaalaman: Film Appreciation Seminar sa Lagro High School
Lagro High School – Pebrero 27, 2025
Isang makabuluhang seminar na may temang “Film Appreciation: Paano Bumasa ng Pelikula” ang isinagawa sa Lagro High School Audio-Visual Room upang mapalawak ang kaalaman ng mga mag-aaral sa sining ng pelikula. Pinangunahan ito ng kilalang direktor at Cinemalaya filmmaker, Propesor Richard Soriano Legaspi, kasama ang HASIKAN Club Adviser na si Ginoong Geraldo Jumawan.
Sa pamamagitan ng inisyatiba ni G. Jumawan, inimbitahan si Prop. Legaspi upang ipanood sa mga piling mag-aaral mula sa Grade 11 HUMSS at STEM strands ang isa sa kanyang mga pelikula na "Bakit ako sinusundan ng buwan". Sinundan ito ng isang talakayan tungkol sa film literacy kung paano mas epektibong basahin at unawain ang isang pelikula.
Si Prop. Legaspi, isang premyadong direktor at iskolar ng UNESCO Laureate, ay nagbahagi ng kanyang malawak na kaalaman at karanasan sa industriya ng pelikula. Kanyang ipinaliwanag ang proseso ng paggawa ng isang makabuluhang pelikula at ang iba't ibang hamon na kanyang hinarap bilang isang filmmaker. Nagkaroon din ng open forum kung saan malayang nakapagtanong ang mga mag-aaral tungkol sa sining, teknikalidad, at kahalagahan ng storytelling sa pelikula.
Ang programa ay matagumpay na pinamunuan ng mga emcee na sina Zyril Garma at Rheyen Abria, na nagbigay ng sigla at kaayusan sa buong seminar.
Ayon kay G. Jumawan, layunin ng programang ito na hikayatin ang mga mag-aaral na magkaroon ng mas malalim na pagpapahalaga sa pelikula bilang isang anyo ng sining at midyum ng pagpapahayag.
"Ang pelikula ay hindi lang basta aliwan, ito rin ay isang salamin ng realidad at isang mabisang kasangkapan sa pagpapahayag ng kwento at damdamin," ani Prop. Legaspi sa kanyang pananalita.
Sa pagtatapos ng programa, ipinahayag ng mga mag-aaral ang kanilang pasasalamat at paghanga sa bagong kaalamang kanilang natamo.
Marami ang nagsabing mas lalo nilang naunawaan ang kahalagahan ng pagbasa ng pelikula at ang proseso ng paglikha nito.
Ang Film Appreciation Seminar na ito ay isang patunay na ang sining ng pelikula ay hindi lamang para sa entertainment kundi isa ring epektibong paraan upang palawakin ang perspektibo at kamalayan ng mga mag-aaral sa mas malalim na mensaheng hatid ng sining.
Isinulat ni: Zyril Trish Garma
