Kilusang Mayo Uno - National Capital Region

02/08/2026

PAHAYAG HINGGIL SA STATUS QOU ANTE ORDER (SQAO) NA NAG-UUTOS NA PANSAMANTALANAG PANATILIHING ₱695 ANG MINIMUM WAGE

Mariing kinokondena ng Kilusang Mayo Uno NCR ang pag-apruba ng Pasig City Regional Trial Court (RTC) Branch 152 sa SQAO para sa pagpapatigil ng pagtataas ng sahod sa NCR. Sa gitna ng walang humpay na pagtaas ng presyo ng pagkain, pamasahe, kuryente, tubig, upa at iba pang pangunahing pangangailangan, ang pagpigil sa dagdag-sahod ay isa na namang dagok sa milyon-milyong manggagawang Pilipino sa NCR na araw-araw na lumilikha ng yaman ng bansa.

Noong inaprubahan ng Regional Tripartite Wages and Productivity Board - NCR ang Wage Order No. 27 na nagbibigay ng 85 pesos na dagdag-sahod sa mga manggagawa sa NCR, ipinagmayabang pa ito ng sekretarya ng DOLE Francis Tolentino bilang diumanong historical na pagtaas ng sahod.

Ngunit historical din ang ginawa ng mga ganid na korporasyong Readycon Trading and Construction at Reghis Romeo ng R-II Builders at ng Pasig City RTC na patigil ang isang wage hike. Malinaw na nakasaad sa Artikulo 126 ng Labor Code na walang preliminary injunction o restraining order ang makakapigil sa implementasyon ng mga order ng Regional Wage Board.

MALIIT NA NGA AT HINDI NASASAPAT, INSTALLMENT PA ANG SINASABING "taas sahod" na 85 pesos. Kung tutuusin sa gitna ng patuloy na pagsirit ng presyo ng bilihin at kuryente dulot ng imperyalistang giyera sa Middle East at ang polisiya ng deregulasyon at pribitasyon ng ating mga pampublikong serbisyo, barya lamang itong 85 pesos sa taas ng cost-of-living dito sa NCR.

Nararapat pa ring ipanawagan at ipaglaban ang nakabubuhay nakakabuhay na sahod na 1200 family living wage.

ANG SAHOD AY HINDI SIMPLENG GASTOS NG NEGOSYO. Ito ay karapatan ng manggagawa na magkaroon ng sapat na kabuhayan at marangal na pamumuhay. Ang anumang hakbang na nag-aantala sa makatarungang umento sa sahod ay nagiging hadlang sa pagtataguyod ng karapatan ng mamamayan.

Habang patuloy na lumalaki ang kita ng malalaking korporasyon, ang mga manggagawa ay patuloy na pinipilit mabuhay sa sahod na hindi sapat upang tustusan ang pang-araw-araw na pangangailangan.

Ipinapakita lamang ng pangyayaring ito sa wage hike suspention, kung gaano kainutil ang kasalukuyang sistema ng regional wage setting at rehimen ni Marcos Jr. Nararapat lang singilin si Bongbong Marcos na #1 MAMBUBUDOL SA URING MANGGAGAWA at DAPAT NA RIN BUWAGIN ANG RTWPB at sa halip ay maglunsad ng isang national minimum wage na batay sa tunay na pangangailangan ng mga manggagawang Pilipino na mabuhay nang disente.

Kaya't nananawagan kami na agarang maalis ang mga hadlang sa implementasyon ng wage hike at igalang ang karapatan ng uring manggagawa sa makatarungan at sapat na sahod. Sama samang ipaglalaban ang sahod, tabaho, at karapatan sa disenteng pamumuhay!

1200 family living wage ipaglaban!
Sahod itaas, presyo ibaba!
Karapatan ng mamamayan ipaglaban!

02/08/2026

BBM = BIHASANG BUMUDOL NG MANGGAGAWA

Sa halip na tiyakin ang pagpapatupad ng wage hike, hinayaan ng administrasyong Marcos Jr. na muling mabimbin ang karampot na dagdag-sahod ng mga manggagawa.

Sa pangunguna ng Readycon Trading and Construction Corporation at R-II Builders, Inc., isinampa ang petisyon upang ipasuspinde ang pagpapatupad ng wage hike sa NCR.

Ito ay malinaw na pagtatangkang unahin ang tubo ng malalaking negosyo kaysa sa karapatan ng milyun-milyong manggagawa sa disenteng sahod.

PANAWAGAN SA LAHAT! ALL OUT MOB FOR THE WAGE SUSPENSION HEARING

Agosto 3 (Lunes)

Kondukta:
- 8:00 AM – Assembly sa Plaza Rizal, harap ng Pasig Church

Kasama natin sa pagkilos ang iba pang mga unyon at organisasyon ng paggawa. Panawagan ito sa mga manggagawa, kabataan, maralitang komunidad, taong simbahan, propesyunal at lahat ng demokratikong sektor.

Kapag ang sahod ng manggagawa ang inaatake, tungkulin ng buong sambayanan na lumaban!!

Ipaglaban ang wage hike!
Ibasura ang wage suspension!
Makibaka! Huwag matakot!

26/07/2026

𝗦𝗨𝗠𝗔𝗠𝗔 𝗦𝗔 𝗣𝗘𝗢𝗣𝗟𝗘'𝗦 𝗦𝗢𝗡𝗔!

Sa NCR, sentro ng produksyon at tubo, pinakamatingkad din ang krisis ng uring manggagawa. Habang araw-araw na nililikha ng manggagawa ang yaman ng lipunan, iilan lamang ang nakikinabang dito. Ito ang mukha ng sistemang pinaghaharian ng imperyalismo at burukrata kapitalismo.

Ang SONA ni BBM ay hindi ulat ng sambayanan. Ito ay ulat ng isang estado na patuloy na nagsisilbi sa interes ng malalaking dayuhan at lokal na naghaharing-uri. Ang tunay na SONA ay mababasa sa mababang sahod, kontraktwalisasyon, kawalan ng disenteng trabaho at patuloy na pag-atake sa karapatan ng mga manggagawa.

Hindi reporma ang kailangan ng uring manggagawa KUNDI ISANG LIPUNANG ANG YAMAN AY NILILIKHA AT PINAKIKINABANGAN NG NAKARARAMI AT HINDI NG IILAN.

Sumama sa People's SONA! Ipaglaban ang sahod, trabaho at karapatan!

30/06/2026

Isang bukas na liham para kay kasamang Romina “Shami” Astudillo sa kanyang kaarawan.

Sa araw na ito, hindi lamang namin inaalala ang iyong buhay at paglilingkod. Iniaalay namin ang liham na ito bilang pagpupugay sa iyong katatagan at bilang panibagong panata ng uring manggagawa na hindi titigil sa paggiit ng iyong kalayaan.

“Mas magaan sanang batiin ang iyong kaarawan kung malaya kang kapiling ng iyong mga mahal sa buhay. Ngunit habang ipinagkakait sa iyo ang kalayaan, ang aming pagbati ay magiging panawagan.”

Maligayang kaarawan, Kasamang Shami!

Palayain si Romina “Shami” Astudillo!

Palayain ang lahat ng bilanggong pulitikal!

30/06/2026

Mariin naming kinukundena sa Kilusang Mayo Uno (KMU) - NCR ang barya-baryang ₱85 na dagdag-sahod na inanunsyo ng Department of Labor and Employment. Isang malaking insulto sa milyong manggagawa sa Metro Manila na tawaging "historic" ang dagdag na ito samantalang malayung-malayo ito sa tunay na halaga ng disenteng pamumuhay.

1. Malayung-malayo sa nakabubuhay na sahod: Ang ₱85 ay hindi sasapat para tapatan ang ₱1,200 Family Living Wage na kailangan ng isang pamilyang may limang miyembro upang mabuhay nang may dangal araw-araw.

2. Napakababa ng halaga ng pera: Kung ang halaga nga ng isang milyong piso ngayon ay katumbas na lamang ng mahigit ₱600,000 dahil sa walang-preno na implasyon at pagbagsak ng purchasing power ng piso, paano pa aasahan ang mga manggagawang mamuhay sa kakarampot na dagdag na barya?

3. Pambabarya sa manggagawa: Ang barya na ito ay agad ding kakainin ng mataas na presyo ng bigas, pamasahe, kuryente, at tubig.

Hindi limos, kundi hustisyang pang-ekonomiya ang hiling ng mga manggagawa. Buwagin ang mga regional wage boards na nagpapanatili ng mababang pasahod at ipatupad ang pambansang nakabubuhay na sahod!

Ipaglaban ang ₱1,200 Family Living Wage sa buong bansa!
Sahod itaas, presyo ibaba!

28/06/2026

𝗠𝗜𝗟𝗬𝗢𝗡𝗚 𝗣𝗜𝗦𝗢, 𝗟𝗨𝗠𝗜𝗟𝗜𝗜𝗧 𝗔𝗡𝗚 𝗛𝗔𝗟𝗔𝗚𝗔; 𝗔𝗡𝗚 𝗠𝗜𝗡𝗜𝗠𝗨𝗠 𝗪𝗔𝗚𝗘, 𝗠𝗔𝗧𝗔𝗚𝗔𝗟 𝗡𝗔𝗡𝗚 𝗕𝗔𝗥𝗬𝗔!

Mariing ipinaglalaban ng Kilusang Mayo Uno - National Capital Region (KMU NCR) ang karapatan ng bawat manggagawa sa nakabubuhay na sahod sa gitna ng patuloy na pagtaas ng presyo ng mga bilihin at pagbagsak ng halaga ng piso. Kung ang P1 milyon ngayon ay may halaga na lamang na humigit-kumulang P680,000 kumpara noong nakaraang dekada dahil sa inflation, malinaw itong patunay na patuloy na kinakain ang tunay na halaga ng kita ng bawat Pilipino.

Kung ang P1 milyon ay hindi na maituturing na malaking halaga, paano pa ang milyon-milyong manggagawang nabubuhay sa minimum wage? Ang P1 milyon ay katumbas ng halos limang taong sahod ng isang minimum wage earner at iyan ay kung wala siyang ginagastos sa pagkain, pamasahe, upa, kuryente, edukasyon o pagpapagamot. Sa reyalidad, hindi pa man natatanggap ang sahod, nakalaan na ito sa mga pangunahing pangangailangan.

Kaugnay nito, lalong dumarami ang mga manggagawang nalulubog sa utang. Hindi ito dahil hindi sila marunong humawak ng pera kundi dahil ang kanilang sahod ay sadyang hindi sapat upang matugunan ang batayang pangangailangan ng kanilang pamilya. Habang patuloy na tumataas ang presyo ng pagkain, pamasahe, upa, kuryente, tubig at gamot, nananatiling napakababa ng sahod. Kaya ang pangungutang ay hindi bunga ng pagiging magastos kundi desperadong paraan upang mabuhay. Hindi ito personal na pagkukulang kundi bunga ng isang sistemang nagpapanatiling mababa ang sahod habang hinahayaan ang walang tigil na pagtaas ng presyo ng mga pangunahing bilihin.

Hindi katanggap-tanggap na ang mga manggagawang lumilikha ng yaman ng bansa ang siyang nananatiling baon sa kahirapan at utang. Hindi luho ang aming hinihingi. Katarungan ang aming ipinaglalaban. Karapatan ng bawat manggagawa ang nakabubuhay na sahod na sapat sa tunay na halaga ng pamumuhay at nagbibigay ng disenteng buhay sa kanilang pamilya.

Hindi maaaring patuloy na bumaba ang halaga ng piso habang nananatiling barya ang halaga ng sahod. Panahon nang itama ang sistemang nagpapahirap sa uring manggagawa!

Sahod Itaas, Presyo Ibaba!
Ipaglaban ang Nakabubuhay na Pambansang Minimum Wage!

11/06/2026

HUWAD NA KALAYAAN!

Hindi tunay na malaya ang bayang nananatiling nakagapos sa tanikala ng imperyalismo, pagsasamantala at paghahari ng iilan. Habang patuloy na isinusuko ng rehimeng Marcos-Duterte ang ekonomiya, likas-yaman at soberanya ng bansa sa dayuhang interes, pinapasan naman ng uring manggagawa at sambayanan ang mababang sahod, mataas na presyo, kawalan ng trabaho at lumalalang kahirapan at kagutuman.

Walang tunay na kalayaan hanggat ang patuloy ang pananamantala sa uring manggagawa, at ang yaman na kanilang nililikha ay tanging ang iilan lamang ang nakikinabang.

Ang kalayaan ay hindi lamang paggunita sa nakaraan kundi pagputol sa mga tanikalang pumipigil sa bayan na tunay na makapagpasya para sa sarili at mamuhay nang may dignidad.

Wakasan ang imperyalismo at pagsasamantala!
Ipagtanggol ang pambansang soberanya!
Sa pamumuno ng uring manggagawa, isulong ang tunay na pambansang soberanya at panlipunang paglaya!

SUMAMA SA PAGKILOS!
- Kalaw, Maynila
- Hunyo 12 | 9:00 AM

03/06/2026

RTWO (RETURN TO WORK ORDER) KAY SP CAYETANO

Mariing kinokondena ng Kilusang Mayo Uno (KMU) NCR ang patuloy na pagliban ng mayorya sa Senado, kaya naman ipinapanawagan ang agarang pagbabalik sa trabaho upang unahin ang mga panukalang batas lalo na para sa manggagawa sa halip na unahin ang pulitikal na bangayan.

Habang lalong naghihirap ang mangagawang Pilipino sa mababang pasahod at mataas na presyo ng bilihin, mariing kinokondena ng Kilusang Mayo Uno (KMU) NCR ang kawalan ng sesyon at ang hindi pagpasok ng mayorya sa Senado.

Hindi matatanggap na ginagawang dahilan ang 'protesta' o proteksyon sa kapwa politiko upang isakripisyo ang interes ng mamamayan.

Ang 'return to work order' ay hindi lamang panawagan ng mamamayan kundi utos ng nagpapasahod sa inyo—ang sambayanang manggagawa. Kalampag namin kay Senate President Alan Peter Cayetano, magbitiw ka na kung hindi mo magagampanan ang trabaho at sa buong Senado: Itigil ang teleserye ng agawan sa kapangyarihan.

Magtrabaho kayo at harapin ang mga nakabinbing batas, partikular ang nakalambitin na pambansang dagdag-sahod na P1200 na siyang tunay na pangangailangan ng pamilyang Pilipino!

01/06/2026

26/05/2026

Pahayag ni spox Chito Guevara kaugnay sa pagkakahirang ng bagong kalihim ng Department of Labor and Employment (DOLE). Iginiit din niya na dapat itaas ang sahod tungo sa family living wage para sa mga manggagawa.