Kilusang Mayo Uno - National Capital Region

03/06/2026

RTWO (RETURN TO WORK ORDER) KAY SP CAYETANO

Mariing kinokondena ng Kilusang Mayo Uno (KMU) NCR ang patuloy na pagliban ng mayorya sa Senado, kaya naman ipinapanawagan ang agarang pagbabalik sa trabaho upang unahin ang mga panukalang batas lalo na para sa manggagawa sa halip na unahin ang pulitikal na bangayan.

Habang lalong naghihirap ang mangagawang Pilipino sa mababang pasahod at mataas na presyo ng bilihin, mariing kinokondena ng Kilusang Mayo Uno (KMU) NCR ang kawalan ng sesyon at ang hindi pagpasok ng mayorya sa Senado.

Hindi matatanggap na ginagawang dahilan ang 'protesta' o proteksyon sa kapwa politiko upang isakripisyo ang interes ng mamamayan.

Ang 'return to work order' ay hindi lamang panawagan ng mamamayan kundi utos ng nagpapasahod sa inyo—ang sambayanang manggagawa. Kalampag namin kay Senate President Alan Peter Cayetano, magbitiw ka na kung hindi mo magagampanan ang trabaho at sa buong Senado: Itigil ang teleserye ng agawan sa kapangyarihan.

Magtrabaho kayo at harapin ang mga nakabinbing batas, partikular ang nakalambitin na pambansang dagdag-sahod na P1200 na siyang tunay na pangangailangan ng pamilyang Pilipino!

01/06/2026

26/05/2026

Pahayag ni spox Chito Guevara kaugnay sa pagkakahirang ng bagong kalihim ng Department of Labor and Employment (DOLE). Iginiit din niya na dapat itaas ang sahod tungo sa family living wage para sa mga manggagawa.

24/05/2026

TUWING ANG KUMPANYA GUSTO MAGTIPID,
ANG MANGGAGAWA PALAGI ANG UNANG NAGBABAYAD

Tinatayang nasa 30-40 na manggagawang biktima ang natabunan matapos gumuho ang ginawang gusali sa Angeles City, Pampanga kaninag alas-tres ng madaling araw.

Habang nagtatrabaho ang mga manggagawa, buhay nila ang isinugal dahil sa sistematikong kapabayaan, kawalan ng safety measures, at maluwag na pagpapatupad ng occupational safety and health standards.

Sa bawat pagtitipid sa materyales, sa bawat paglabag sa safety protocols, sa bawat pagpapabaya sa health and safety standards, manggagawa ang direktang inilalagay sa bingit ng kamatayan. Kaya hindi ito matatawag na “aksidente” lamang.

Mula sa sunog sa Kentex factory fire hanggang sa sunod-sunod na aksidente sa mga construction site at pabrika sa bansa, iisa ang ugat: kasakiman ng mga kapitalista at kapabayaan ng estado.

Hindi maikakaila ang pananagutan ng administrasyong ni Bongbong Marcos sa nagpapatuloy na pagyurak sa karapatan at kaligtasan ng mga manggagawa. Habang bilyon-bilyong piso ang ginagastos sa mga proyektong pabor sa malalaking negosyante at dayuhang kapitalista, nananatiling inutil at maluwag ang pagpapatupad ng mga batas para sa kaligtasan sa paggawa. Sa ilalim ng ganitong sistema, pinahihintulutang kumita ang mga kumpanya kahit kapalit ay buhay ng manggagawa.

Hindi sapat ang pakikiramay matapos ang sakuna. Kagyat na dapat ilaan ang lahat ng kinakailangang rekurso para sa search and rescue operations ng mga manggagawa at iba pang biktima ng trahedyang ito. Kasabay nito, kailangang magsagawa ng malalim na imbestigasyon upang mapanagot ang mga nagbulag-bulagan sa paglabag sa mga pamantayan sa kaligtasan sa paggawa. Hindi na dapat pinapalampas ang ganitong kapabayaan at panahon nang ituring na kriminal na paglabag ang pagsasantabi sa occupational safety and health standards na naglalagay sa buhay ng manggagawa sa panganib.

Sa harap ng patuloy na pang-aabuso at kapabayaan, higit kailanman kinakailangan ang pagkakaisa at sama-samang pagkilos ng uring manggagawa. Walang ibang magtatanggol sa karapatan at kaligtasan ng manggagawa kundi ang mismong organisadong lakas ng mamamayan. Manawagan tayo para sa ligtas na paggawa, makataong kundisyon sa trabaho, at pananagutan sa mga kumpanyang kumikita mula sa dugo at pawis ng manggagawa. Hindi dapat buhay ng manggagawa ang kabayaran sa tubo ng mga kapitalista.

20/05/2026

Mga kasama, mga maralita, manggagawa, at sambayanang nakikibaka!

Ngayong araw, nagtitipon tayo hindi upang magluksa, kundi upang payabungin ang apoy ng liyab na iniwan ng isa sa mga naging haligi ng kilusan ng uring manggagawa. Ginugunita natin ngayon ang anibersaryo ng pagpanaw ni Ka Bel—si Crispin Beltran—ang kamao ng anakpawis, ang tinig ng walang tinig, at ang walang-pagod na pinuno ng tunay, palaban, at militanteng unyonismo sa Pilipinas!

Si Ka Bel ay hindi simpleng lider-manggagawa; siya ang ehemplo ng walang-kompromisong pagtindig. Mula sa pagiging tsuper ng taksi hanggang sa pagiging Kinatawan sa Kongreso, hinding-hindi niya tinalikuran ang kanyang pinagmulan. Sa loob ng piitan ng diktadura man o sa liyab ng mga welga sa kalsada, nanatili siyang matatag. Noong pilit siyang iginapos at ikinulong ng rehimeng nagtangkang magpatahimik sa kanya, ang kanyang sagot ay mas malakas na sigaw para sa katarungan at pambansang demokrasya!

Ngayong 2026, sa gitna ng patuloy na krisis, mababang pasahod, talamak na kontraktwalisasyon, at panunupil sa mga unyon, mas lalong umaalingawngaw ang panawagan ni Ka Bel. Sa panahon ngayon, mahalaga maitanong natin, ano ang gagawin ni ka bel para sa uring manggagawa sa kasalukuyan pandaigdigang krisis, ang tanging sagot dito ay ang walang humpay na pakikibaka para labanan ng imperyalismo.

Ang kanyang buhay ay nagpapatunay na ang tunay na pagbabago ay hindi ibinibigay sa itaas—ito ay ipinaglalaban at inaagaw ng nagkakaisang lakas ng masa mula sa ibaba!

Hindi namamatay ang isang bayani kung ang kanyang mga prinsipyo ay isinasabuhay ng susunod na henerasyon. Ang bawat welga, bawat barikada, bawat martsa para sa nakabubuhay na sahod, at bawat pagtindig laban sa imperyalismo at pasismo ay pagpapatuloy ng laban ni Ka Bel.
Mga kasama, hawakan natin nang mahigpit ang pulang bandila ng pakikibaka! Huwag tayong papayag na manatiling busabos sa sarili nating bayan!

Mabuhay ang dakilang alaala at aral ni Ka Bel!
Mabuhay ang uring manggagawa!
Manggagawa, magkaisa, ituloy ang laban para sa pambansang demokrasya at tunay na kalayaan!

-Ka Gerry Serue
Kilusang Mayo Uno NCR
(Pahayag sa anibersaryo ng kamatayan ni Crispin Beltran)

13/05/2026

Tahasan ang ginagawang pagmaniobra ng Senado para protektahan sina Sara Duterte at Bato dela Rosa mula sa pananagutan. Habang patuloy na naghihirap ang mamamayan, inuuna pa rin ng mga nasa kapangyarihan ang pagtatakip at pagsasanggalang sa kapwa nila opisyal.

Ngayon mismo, lantad ang krisis sa loob ng Senado, may mga putok na narinig sa gitna ng tensyon kaugnay ng pag-aresto kay Bato dela Rosa. Sa halip na harapin ang panawagan para sa pananagutan, pilit inililihis ng ilang pulitiko ang usapan at ginagamit ang drama at personalang bangayan para tabunan ang tunay na isyu: ang dugo at korapsyon na matagal nang ipinapasan ng taumbayan.

Hindi lang sina Sara at Bato ang dapat managot. Dapat ding singilin si Bongbong Marcos sa nagpapatuloy na korapsyon, paglustay sa kaban ng bayan, at mga pag-atake at pagpaslang sa mamamayan sa ilalim ng kanyang administrasyon.

Hindi titigil ang mamamayan hangga’t walang napapanagot. Sa mga susunod na araw, mas lalo tayong magkaisa at lumabas sa lansangan upang kalampagin at panagutin ang mga nasa kapangyarihan.

01/05/2026

MATAGUMPAY ANG ATING SAMA-SAMANG PAGKILOS NGAYONG ARAW NG PAGGAWA!

Sa kabila ng tumitinding krisis sa kabuhayan, mababang sahod, kontraktwalisasyon at patuloy na pagyurak sa karapatan ng manggagawa, napatunayan nating hindi matitinag ang lakas ng nagkakaisang uring anakpawis. Ang lansangan ay muling pinuno ng tinig ng paglaban, isang patunay na pahayag na hindi tayo papayag sa sistemang nagsasamantala sa ating pawis at buhay!

Hindi dito nagtatapos ang laban. Ang Mayo Uno ay paalala na ang kasaysayan ay hinuhubog ng uring manggagawa. Sa ating pagkakaisa at militansya, itutulak natin ang makabuluhang pagbabago para sa nakabubuhay na sahod, seguridad sa trabaho at pambansang soberanya.

Mabuhay ang uring manggagawa!
Ibagsak ang imperyalismo, pyudalismo at burukrata kapitalismo!
Isulong ang pambansa-demokratikong pakikibaka!

30/04/2026

KMU NCR PRODUCTION WORK FOR LABOR DAY RALLY!

30/04/2026

PAHAYAG NI SPOKESPERSON CHITO GUEVARRA KAUGNAY SA MAPANLOKONG PRESS RELEASE NG DOLE NA PAG-AARALAN ANG ₽1200 NATIONAL MINIMUM WAGE SA NCR.

30/04/2026

Sa gitna ng lumalalang krisis at gera, malinaw kung sino ang nakikinabang at sino ang pinapahirapan.

Mariing kinokondena ng mga manggagawa ang patuloy na agresyon ng US-Israel na kumikitil sa buhay ng mamamayan at naglalatag ng mas malawak na digmaan para sa interes ng mga naghaharing-uri.

Ngayong Mayo Uno, sama-sama nating igiit: WAKASAN ANG GYERANG AGRESYON NG US-ISRAEL! IMPERYALISMO IBAGSAK!