13/05/2025
Mga higala ug igsoon ko sa Davao de Oro,
Buot nakong ipaabot akong kinasingkasing nga pagpasalamat sa libo-libong Dabawenyo nga misalig ug misuporta sa akong kandidatura alang sa Kongreso nga Para sa Tao, Para sa Tanan. Ang inyong kusog ug kadasig, maoy hinungdan ngano nakabarug ako hangtud sa katapusan.
Nasayud ko nga adunay kasubo nga atong gibati sa karon, apan dili kana angay mamahimong rason nga mawad-an kita og paglaom. Sama sa akong giingon: madaog man o mapilde, ang akong mga programa para sa Davao de Oro akong ipadayon. Dili kana mausab.
Congratulations to our Vice Governor-elect Dorothy Gonzaga sa iyang kadaugan. Makasalig kita nga ang maayong pagdumala sa lehislatibong bahin sa probinsya magpadayon. Ako usab nga pagtimbaya sa tanan natong kaubanan nga lideres sa Government Works sa ilang kalampusan niining eleksyon, gikan sa Board Members to Mayors to Vice Mayors and Councilors, congratulations!
Labaw sa tanan, kinasingkasing nga pagpasalamat sa atong mga manlilihok, gikan sa pagplastar ug pagtaod sa mga campaign material, print og mga t-shirt, pasiugda sa serbisyo caravans ug medical outreach, mga nag-organisa sa pulong-pulong, small rallies paingon sa big rallies. Sa tanan nga misalig kanako ug migahin sa ilang oras, kusog, ug gugma, daghan kaayong salamat.
Sa akong mga kapamilya, trabahente, paryente, ug mga higala nga miuban sa akong paglawig, salamat sa inyong gugma kanako. Sa magtiayon nga Congressman Ruwel Peter Gonzaga ug Governor Dorothy "Dotdot" M. Gonzaga, dako kamo nga inspirasyon sa probinsya. Padayon lang sa inyong kaayo ning atong katilingban. Sa pamilyang Uy nga wala mibiya, gikan sa sinugdanan hangtud sa katapusan, Papa Gov Arturo Uy, Vice Gov Tyron Uy, ug Cathy, kaninyong tanan, salamat kaayo.
Distrito Dos, atong suportahan ang Congressman-elect Jhong Ceniza sa iyang kapalaran isip sunod nga representante sa Distrito Dos ngadto sa 20th Congress. Hinaot nga uban sa grasya sa atong buhi nga Diyos, iyang mapatuman ang saad nga progreso diin kauban ang matag-usa.
Magpadayon kita sa pagsuporta sa atong nasyunal ug lokal nga gobyerno, ug sa paghupot niini sa tinuod nga katungdanan.
Kalinaw. Panaghiusa. Kaayohan. Ipasibaw nato ang mga prinsipyo nga nagbugkos kanato ning tibuok byahe.
Sa makausab, daghang salamat sa inyong tanan.
Ang Ginoo kanunay maga-uban.
Inyong higala,
Noe “Butchoy” Taojo
