15/06/2026
Pinamigay na ng Angat Kabataan Obando ng 40 pirasong water filtration system na kaloob ng Waves For Water para sa tatlong sitio ng Barangay Salambao noong araw ng Sabado.
Ang water filtration set na ito ay kayang salain ang anumang maruming tubig na may mikrobyo nang hanggang sa 99.9%. Nakatanggap nito ang piling mga residente ng Sitio Rafael, Tukol, at Tapatan, kung saan personal itong iniabot at ipinaliwanag ng mga volunteers kung paano gamitin.
Bukod sa demonstrasyon ng paggamit, nagkaroon din ng maikling seminar tungkol sa SDG 6: Clean Water & Sanitation o kahalagahan ng malinis na tubig na pinangunahan ng volunteer na si Carl Edrian. Aniya, “clear water is not always clean water”. Ipinaalala niyang maging maingat sa pag-inom ng tubig at ibinahagi niya ang mga sakit na makukuha sa mga kontaminadong tubig, pati na ang mga paraan kung paano ito malulunasan.
Nagpapasalamat ang mga residenteng nakatanggap ng water filtration system. Ayon sa kanila, malaking tulong ito para sa mga kagaya nilang walang access sa malinis na inuming tubig. Lahat sa kanila ay kinakailangan pang mamangka para bumili ng mineral water o di kaya’y pagtyagaan ang tubig-poso para lang makainom, kaya naman malaking kaginhawaan ito para sa kanila.
Nagpapasalamat naman ang Angat Kabataan Obando sa pagpili sa Bayan ng Obando bilang recipient. Pasasalamat din sa pagtitiwalang ito sa organisasyon na maging daluyan ng pag-asa at maging katuwang sa ganitong makabuluhang proyekto.
