27/08/2026
๐๐๐๐๐ง๐ | Mga Opisyal ng KAMDAFil, Dumalo sa Sine-Tertulya 2026
Dumalo ang mga opisyal ng Kapisanan ng mga Mag-aaral na Nagpapakadalubhasa sa Wikang Filipino (KAMDAFil) sa isinagawang Sine-Tertulya 2026 noong Agosto 27 sa Main Campus ng Ilocos Sur Polytechnic State College (ISPSC), bilang bahagi ng pagdiriwang ng Buwan ng Wikang Pambansa.
May temang โSine-Tertulya โ Pelikula, Wikang Filipino, at Artificial Intelligence,โ itinampok sa aktibidad ang pelikula bilang lunsaran ng makabuluhang talakayan hinggil sa wikang Filipino, kultura, panitikan, at mga makabagong teknolohiya. Tampok din sa programa ang mga piling pelikula at dokumentaryo ng direktor at film-maker na si Ginoong Dexter Macaraeg, na nagsilbing pangunahing tagapagsalita.
Sa pamamagitan ng Sine-Tertulya, nagkaroon ng pagkakataon ang mga dumalo, kabilang ang mga opisyal ng KAMDAFil, na mapalawak ang kanilang pag-unawa sa ugnayan ng pelikula, wika, kultura, at teknolohiya. Naging daan din ito upang higit na mapahalagahan ang pelikula bilang salamin ng karanasan, identidad, at kultura ng mga Pilipino.
Binigyang-diin ni Dr. Rommel Tabula, Dekano ng College of Teacher Education (CTE) sa Main Campus, ang kahalagahan ng pag-uugnay ng sine, tertulya, at artificial intelligence sa pagkatuto at pakikipagtalastasan. Samantala, binigyang-diin naman ni Dr. Ana Blesilda Atendido, na kumatawan kay Dr. Jocelyn Absolor, Vice President for Research, Development and Extension, ang mahalagang papel ng wikang Filipino bilang daluyan ng kaalaman, inobasyon, at pagkakakilanlan.
Ayon naman kay Dr. Monita Pops F. Ambrocio, Direktor ng Sentro ng Wika at Kultura, layunin ng Sine-Tertulya na mapalalim ang pagpapahalaga sa wikang Filipino sa pamamagitan ng pelikula, na aniya ay repleksyon ng kabuhayan, kultura, at pagiging Pilipino.
Sa talakayan, ibinahagi ni Direk Macaraeg ang kaniyang mga karanasan sa industriya ng sining at literatura, kasabay ng pagpapalabas ng ilan sa kaniyang mga obra gaya ng Protected Hill, Salidumay, Tata Pilo, at Am-amma (Heirloom). Itinatampok ng mga ito ang kuwento ng mga pamayanan, kulturang katutubo, pamanang kultura, at identidad.
Sa pakikiisa ng mga opisyal ng KAMDAFil sa Sine-Tertulya 2026, higit nilang nasaksihan ang kahalagahan ng patuloy na pagtataguyod sa wikang Filipino at sa mga anyo ng sining na nagsisilbing tinig ng kultura at karanasan ng mga Pilipino.
Sa kabuuan, nagsilbing makabuluhang espasyo ang Sine-Tertulya 2026 para sa pagkatuto, pakikipagtalastasan, at pagpapahalaga sa wika at kultura, kasabay ng pagharap sa mga oportunidad at hamon na dulot ng mabilis na pag-unlad ng artificial intelligence.
