08/02/2026
Linis Ilog sa Open Canal ng Gentri
isasagawa sa Araw ng mga Puso
Magsasagawa ang Barangay Pasong Camachile II, General Trias City katuwang ang Akbay Kalikasan Environmental Society Management Inc. (AKESMI), Green Earth Warriors Inc. (GEWI) at mga volunteer's ng “River Clean Up Drive” sa Cavite sa Araw ng mga Puso.
Nauna rito, matagumpay na naisagawa nina Prof. Julio Castillo, Chairman/President ng Akbay Kalikasan at EVP Alvin Fidelson ang Integrating Zero Waste and Source Sustainability Seminar noong February 07 bilang paghahanda ng komunidad sa paglilinis katuwang si Chairman Jowie Sinsay Carampot ng Brgy. Pascam II at Sangguniang Barangay (Brgy. Council).
Tinalakay dito ang mga detalye ng proyektong pangkalikasan na gaganapin sa Pebrero 14, bilang bahagi ng pagdiriwang ng Araw ng mga Puso.
Pinasalamatan din ni KonsiKap Jowie Carampot si Gentri City Mayor Jon Jon Ferrer, CENRO at City GSO sa kanilang agarang suporta sa programang ito.
Sa halip na tradisyunal na selebrasyon, layunin ng aktibidad na ipakita ang mas malalim na kahulugan ng pag-ibig—ang pagmamahal sa kalikasan at sa komunidad.
Sa temang “Pusong Kalikasan ni KonsiKap sa Pasong Camachile 2,” isasagawa ang programang “Linis Ilog sa Open Canal” na naglalayong linisin ang mga daluyan ng tubig bilang ambag sa pangangalaga sa kapaligiran.
Sa pamamagitan ng proyektong ito, hinihikayat ang lahat ng residente na makiisa at maging aktibong kalahok sa pagpapanatili ng kalinisan at kaayusan ng barangay.
Ayon kay Prof. Castillo, "sama-sama nating ipakita na ang tunay na diwa ng Araw ng mga Puso ay ang pagmamahal na may malasakit—hindi lamang sa kapwa, kundi pati sa ating inang kalikasan".
