https://www.facebook.com/253335181207546/

DILAT, Candoni (2026)

08/09/2026

📰 | 𝐌𝐚𝐭𝐚𝐠𝐮𝐦𝐩𝐚𝐲 𝐧𝐚 𝐏𝐚𝐠𝐝𝐢𝐫𝐢𝐰𝐚𝐧𝐠 𝐧𝐠 𝐁𝐮𝐰𝐚𝐧 𝐧𝐠 𝐖𝐢𝐤𝐚 𝟐𝟎𝟐𝟔 𝐬𝐚 𝐂𝐚𝐧𝐢𝐧𝐠𝐚𝐲 𝐍𝐚𝐭𝐢𝐨𝐧𝐚𝐥 𝐇𝐢𝐠𝐡 𝐒𝐜𝐡𝐨𝐨𝐥-𝐌𝐚𝐢𝐧
Ni: Sheena Lyn Toting

Masayang ipinagdiwang ng Caningay National High School-Main ang Buwan ng Wika 2026 nitong Setyembre 7, 2026, sa pamamagitan ng isang makulay at makabuluhang programa na may temang “Wikang Filipino at AI: Kasangkapan sa Pananaliksik at Tulay sa Yaman ng Impormasyon.”

Sinimulan ang programa sa isang mataimtim na panalangin, na sinundan ng pag-awit ng Pambansang Awit at DepEd Hymn. Nagbigay naman ng pambungad na pananalita si G. Edwin S. Vallagomesa, na sinundan ng panunumpa ng mga opisyal mula sa iba’t ibang sektor at organisasyon ng paaralan, kabilang ang Supreme Secondary Learner Government (SSLG) Youth for Environment in Schools Organization (YES-O), at iba pang mga club.

Isa sa mga tampok ng unang bahagi ng programa ang makulay na pagrampa ng mga mag-aaral na suot ang mga tradisyunal at makasaysayang kasuotan na kumakatawan sa iba’t ibang bahagi ng bansa mula sa Luzon, Visayas, at Mindanao. Ipinakita nito ang yaman at pagkakaiba-iba ng kulturang Pilipino. Kasabay nito ang Lamesang Pampinoy at Lutuing Pilipino kung saan ang unang putahi ay ang puso ng saging.

Matapos ang pagrampa, isinagawa ang iba’t ibang patimpalak tulad ng Pagsasatao, Vocal Solo, at Duet, kung saan ipinamalas ng mga mag-aaral ang kanilang talento, husay, at pagpapahalaga sa wikang Filipino. Matapos ang mga patimpalak, inanunsyo rin ang mga nagwagi kabilang ang mga naunang patimpalak kabilang ang Pagsusulat ng Tula, Spoken Word Poetry, at Sining sa Bilao na nagbigay ng karagdagang saya at sigla sa pagdiriwang.

Sa ikalawang bahagi ng programa, naghandog naman ng mga makabuluhang presentasyon na naghatid ng kaalaman ang dalawang seksyon mula sa baitang labing-isa. Tinalakay at ipinakita sa kanilang pagtatanghal ang mga kaalaman tungkol sa makulay na tradisyon ng mga Pilipino noon, gayundin ang mga kuwento tungkol sa kung paano nagsimula, umunlad, at patuloy na nagsisikap ang mga Pilipino tungo sa pag-unlad.

Sinundan ito ng mga larong nagbigay ng saya at aktibong pakikilahok sa mga mag-aaral, kabilang ang Pinoy Henyo, Going to the Market, at Tug of War. Bilang pangwakas na gawain, isinagawa ang isang masaya at makulay na Paint Party, na nagsilbing pagtatapos ng isang araw na puno ng kultura, talento, pagkakaisa, at kasiyahan.

Sa kabuuan, naging matagumpay ang pagdiriwang ng Buwan ng Wika sa CNHS-Main. Naging daan ang programa upang higit na maipakita ng mga mag-aaral ang kanilang pagpapahalaga sa wikang Filipino, kultura, tradisyon, at pagkakakilanlang Pilipino, habang kinikilala rin ang makabagong teknolohiya tulad ng Artificial Intelligence (AI) bilang isang kasangkapan sa pananaliksik at pagkatuto.

Ang matagumpay na programa ay pinangunahan ng Filipino Club officers, sa pangunguna ng kanilang mga tagapayo na sina Gng. Lyndell Grace Torres at Gng. Aireen Gicana, kasama ang mga g**o at mag-aaral na naging bahagi ng makabuluhang pagdiriwang.

28/08/2026

𝐀𝐈 𝐚𝐭 𝐖𝐢𝐤𝐚𝐧𝐠 𝐅𝐢𝐥𝐢𝐩𝐢𝐧𝐨: 𝐓𝐚𝐦𝐩𝐨𝐤 𝐬𝐚 𝐒𝐢𝐧𝐢𝐧𝐠 𝐬𝐚 𝐁𝐢𝐥𝐚𝐨

Saya, pananabik, at halong kaba ang naramdaman ng mga kalahok habang nagsisimulang magpinta sa isang bilao gamit lamang ang tatlong pangunahing kulay. Noong Agosto 25, 2026, ganap na alas-7:30 ng umaga nang simulan ng mga kalahok ang paligsahan sa pagpipinta na may temang “Wikang Filipino at AI: Kasangkapan sa Pananaliksik at Tulay sa Yaman ng Impormasyon.”

Anim na kalahok mula Baitang 7 hanggang Baitang 12 ang lumahok sa paligsahan. Bawat grupo ay binubuo ng tatlong mag-aaral na nagsanib-puwersa upang makalikha ng isang masining at kaakit-akit na obra gamit lamang ang tatlong pangunahing kulay at isang maliit na bilao. Sa pamamagitan nito, naipamalas ng mga mag-aaral hindi lamang ang kanilang husay sa pagpipinta, kundi maging ang kanilang malawak na pag-iisip, pagkamalikhain, at kakayahang bumuo ng iba’t ibang kulay.

Pinatunayan ng bawat grupo na ang kooperasyon, pagkakaisa ng isip, at pagtanggap sa opinyon ng bawat isa ay mahalaga sa mabilis at maayos na pagpaplano at paggawa. Makikitang determinado ang bawat pangkat na makalikha ng isang malikhaing obra upang makamit ang tagumpay. Higit pa sa isang paligsahan, naging daan ito upang mahubog ang pagpapahalaga ng mga mag-aaral sa sining, gayundin ang pagmamahal sa bayan, sariling wika, at kultura.

Habang tumatagal ang paligsahan, lalo namang umiigting ang kanilang pagsisikap na matapos ang kanilang obra bago sumapit ang itinakdang oras na alas-9:30 ng umaga. Bawat hagod ng kanilang mga brush ay tila nagsasalaysay ng kanilang mga ideya, damdamin, at pananabik na maipakita ang kanilang pinakamahusay na likha.

Matapos ang kompetisyon, ibinahagi ng mga kalahok ang kanilang naramdaman bago at habang isinasagawa ang paligsahan.
Ayon kay Yrral Marie Diaz, isa sa mga kalahok:
“Habang nagpipinta ako kasama ang aking grupo, nakaramdam ako ng saya na may halong kaba at pananabik. Dahil sa hindi lang ito paligsahan para sa amin, naging daan ang pagpipinta sa bilao upang maipakita namin ang aming pagmamahal sa sining.”

Sa bawat hagod ng pintura at bawat larawang nabuo sa bilao, hindi lamang kulay ang kanilang iniwan kundi isang kuwentong sumasalamin sa kanilang pagkakakilanlan. Naging daan ang pagpipinta sa bilao upang maipakita ng mga mag-aaral ang kanilang pagmamahal sa sining at kulturang Pilipino.

Sa huli, ang bilao ay hindi lamang naging sisidlan ng kanilang sining. Naging salamin ito ng kulturang patuloy na pinahahalagahan, ipinagmamalaki, at binubuhay ng kabataan sa makabagong panahon.

Isinulat ni: Ashley Mae Estores

17/08/2026

Editoryal📰 | 𝙋𝘼𝙓 𝙎𝙄𝙇𝙄𝘾𝘼
Ni: Ashly Mae Estores

‎Sa bawat tunog ng mga makina klik...klakk...vruum ang walang tigil na ugong sa likod ng pagbabago. Sa loob ng pasilidad, ang daan-daang server at bentilador ay lumilikha ng malakas, tuloy-tuloy na ugong na parang daluyong ng hangin na hindi tumitigil. Kahit sa labas, maririnig ang mabigat na kalansing at huni ng mga kagamitang nagpapalamig, na tila nagpapaalala na ang bawat pag-usad ng teknolohiya ay may kasamang ingay.
‎
‎Usap-usapan ngayon sa social media ang Pax Silica. Ano nga ba ang tinatawag na Pax Silica?Ang salitang "pax" ay galing sa Latin na ibig sabihin ay kapayapaan, at ang "silica" ay mula sa silicon na ginagamit sa mga computer chip. Bakit sobrang init nito ngayon mapa balita at social media man? at bakit libo- libong katao ang hindi sumasang-ayon sa proyektong ito? Opisyal na sumali at pumirma si Pangulong Ferdinand Marcos Jr. sa Pax Silica initiative noong Abril 16, 2026. Ang kasunduang ito ay pinangunahan ng Estados Unidos upang palakasin ang suplay ng semiconductor at artificial intelligence (AI). Ang pax silica ay isang proyekto tungkol sa mga AI, ang proyekto ay balak ipatayo sa isang 4,000-acre o tinatayang 1,619-hectare na pasilidad sa hilagang bahagi ng New Clark City Capas sa lalawigan ng Tarlac, sa loob ng Luzon Economic corridor.
‎
‎Ang tanong, ang tinatawag bang kapayapan o "pax" ay literal na mapayapa kapag na ipinatayo na ang proyektong ito dito sa pilipinas?
‎May maiiinom paba tayong malinis na tubig? ‎Basi sa mga balitang aking na papa- kinggan tinatayang 65 million hanggang 90 milyong litro ng tubig kada araw ang kinakailangang konsumo para sa planong Pax Silica industrial hub. Kinakailangan ng milyon-milyong tubig ng Pax Silica Hub dahil sa pagpapalamig ng mga nag-ooverheat na supercomputers, servers, at AI hardware sa mga data center nito.
‎
‎Basi sa aking mga nasagap na balita galing sa isang netizen, "buti pa ang mga machines at pagpapatayo ng Pax silica ay nagawa nyo pag-isipan kung ano sila kahalaga kapag na walan sila ng tubig , kami kayang mga tao ni isa inisip nyo bang kailangan rin namin ng malinis na tubig araw-araw, minu-minuto at buwan-buwan?". Ni isa hindi man lang tayo na gawang isipin ng gobyerno, hindi rin tayo tinanong kung sumasang-ayon ba tayo sa kanilang desisyon o mga plano para sa Pilipinas. Hindi rin muna nila ito inisip nang mabuti kung mas malaki ba ang tyansa ng posibong kalalabasan ng kanilang pag desisyon para sa bansa.
‎
‎

09/08/2026

📰 | 𝘼𝙡𝙮𝙖𝙣𝙨𝙖 𝙨𝙖 𝙏𝙚𝙠𝙣𝙤𝙡𝙤𝙝𝙞𝙮𝙖: 𝙎𝙤𝙡𝙪𝙨𝙮𝙤𝙣 𝙤 𝘽𝙖𝙜𝙤𝙣𝙜 𝙃𝙖𝙢𝙤𝙣?
Ni: Renalyn Grace T. Espelita

Sa patuloy na pag-unlad ng teknolohiya, lalong nagiging mahalaga ang pagkakaroon ng matatag at ligtas na suplay ng semiconductors, critical minerals, at iba pang mahahalagang teknolohiya. Dahil dito, nabuo ang Pax Silica, isang pandaigdigang alyansa na naglalayong palakasin ang kooperasyon ng mga bansa sa teknolohiya at supply chains. Ngunit sa paglahok ng Pilipinas, isang mahalagang tanong ang bumabangon: Ito ba ay tunay ngang solusyon para sa pag-unlad, o maaari rin itong magdulot ng mga bagong hamon sa ating bansa?

Sumali ang Pilipinas sa Pax Silica noong Abril 2026, bilang bahagi ng pandaigdigang pagsisikap na palakasin ang kooperasyon sa teknolohiya at seguridad ng supply chain. Sa pamamagitan nito, inaasahang magkakaroon ang bansa ng mas maraming oportunidad sa larangan ng semiconductors, artificial intelligence (AI), at iba pang mahahalagang teknolohiya. Ngunit kasabay ng mga iba’t ibang oportunidad na ito ay mga hamon na kailangang paghandaan ng Pilipinas upang matiyak na ang pakikilahok nito ay tunay na makatutulong sa pag-unlad ng bansa.

Ang pagsali ng Pilipinas sa Pax Silica ay may parehong mabuti at masamang epekto. Maaari itong magbigay ng mas maraming oportunidad sa trabaho, pamumuhunan, at pag-unlad ng teknolohiya, pati na rin ang mas matibay na ugnayan sa ibang bansa. Gayunpaman, maaari rin itong magdulot ng matinding polusyon, banta sa mga bundok at lupain, gigising na lamang tayo na wala nang malinis na tubig sa ating paligid, unti-unting nasisira ang ating kapaligiran, at ang sarili nating likas na yaman ay napapakinabangan ng iba, panganib sa kalusugan kung hindi maayos na mapapangasiwaan ang mga industriya at pagmimina.

Sa kabuuan, ang Pax Silica ay maaaring maging daan para sa pag-unlad ng teknolohiya at ekonomiya ng Pilipinas, ngunit hindi dapat isantabi ang mga posibleng epekto nito sa kalikasan at kalusugan. Ang tunay na hamon ay kung paano makikinabang ang bansa sa mga oportunidad na hatid nito nang hindi isinasakripisyo ang likas na yaman, kaligtasan, at kapakanan ng mga Pilipino.

17/02/2026

PRINCESS KEZIA M. VENTURA, NAGWAGI NG IKATLONG PUWESTO BILANG BEST NEWS PRESENTER SA DIVISION SCHOOLS PRESS CONFERENCE

Pontevedra National High School, Pebrero 16, 2026 - Nagtapos na ang Division Schools Press Conference sa Pontevedra National High School, kung saan 13 paaralan ang naglaban para sa kompetisyon sa Radio Scriptwriting and Broadcasting.

Si Princess Kezia M. Ventura, isang grade 12 - CSS na mag-aaral sa Caningay National High School, ay nagwagi ng Ikatlong Puwesto bilang Best News Presenter. Siya ay nagpakita ng husay sa pagtatanghal ng balitang pampalakasan, na nagbigay sa kaniya ng karangalan. Ang kaniyang tagumpay ay isang patunay ng sipag at dedikasyon sa larangan ng broadcasting.

Ang kaniyang tagapagsanay ay si Mrs. Julie Mae P. Retarino.

Ang kompetisyon ay naglalayong ipakita ang mga kasanayan ng mga mag-aaral sa pagsulat ng script at pagbrobroadcast ng mga balita sa radyo. Ang mga kalahok ay nagpakita ng kanilang mga talento sa paghahanda at pagtatanghal ng mga balita sa isang makatotohanang paraan.

Ang Caningay National High School ay nagpapasalamat sa mga magulang sa walang sawang pagbibigay ng suporta at sa mga mag-aaral na nakilahok sa kompetisyon, at umaasa na ang mga karanasan na ito ay magiging inspirasyon sa mga mag-aaral na patuloy na magpakita ng kanilang mga talento sa larangan ng broadcasting.

27/01/2026

𝗜𝗽𝗶𝗻𝗮𝗽𝗮𝗸𝗶𝗹𝗮𝗹𝗮 𝗮𝗻𝗴 𝗺𝗴𝗮 𝗢𝗽𝗶𝘀𝘆𝗮𝗹𝗲𝘀 𝗻𝗮 𝗯𝘂𝗺𝘂𝗯𝘂𝗼 𝘀𝗮 𝗣𝗮𝗺𝗽𝗮𝗮𝗿𝗮𝗹𝗮𝗻𝗴 𝗣𝗮𝗵𝗮𝘆𝗮𝗴𝗮𝗻 𝗻𝗴 𝗠𝗮𝘁𝗮𝗮𝘀 𝗻𝗮 𝗣𝗮𝗮𝗿𝗮𝗹𝗮𝗻 𝗻𝗴 𝗖𝗮𝗻𝗶𝗻𝗴𝗮𝘆. 🏫📰

Ang 𝐃𝐈𝐋𝐀𝐓 ay magsisilbing mata at tinig ng katotohanan—magmumulat sa isipan, maghahatid ng makabuluhang balita, kuwento, at napapanahong kaganapan na magbibigay-liwanag at saysay sa ating paaralan. ✨

Sa bawat salita at pahina, layon ng 𝐃𝐈𝐋𝐀𝐓 na ipahayag ang katotohanan, palakasin ang boses ng kabataan, at maging gabay sa isang mas mulat at responsableng komunidad ng mag-aaral.

27/01/2026

📰 | 𝐔𝐧𝐚𝐧𝐠 𝐀𝐫𝐚𝐰 𝐬𝐚 𝐈𝐦𝐦𝐞𝐫𝐬𝐢𝐨𝐧 𝐧𝐠 𝐓𝐕𝐋-𝐂𝐒𝐒
Ni: Althea Grazel Genova

Enero 26,2026 opisyal nang sinimulan ng piling Grade 12 CSS students ang kanilang unang araw ng work immersion sa Local Disaster Risk Reduction and Management Office o LDRRMO-Candoni.

Ang programa ay nagsimula sa isang orientation na pinangunahan nina Ma’am Jennifer Magada at Sir Stephen Ojales. Sa nasabing orientation, ipinaliwanag ang mga alituntunin, tungkulin, at mga inaasahang gawain ng mga mag-aaral sa loob ng kanilang pananatili sa tanggapan, bilang paghahanda sa kanilang magiging aktwal na karanasan sa larangan ng disaster risk management.

Samantala, sa hapon ay sumailalim naman ang mga mag-aaral sa isang session tungkol sa Basic Life Support. Dito, natutunan nila ang mahahalagang kaalaman at kasanayan tulad ng tamang pagresponde sa emerhensiya, pagbibigay ng paunang lunas, at wastong paraan ng pagsasagawa ng CPR.

Layunin ng work immersion program na mahubog ang kaalaman, disiplina, at kakayahan ng mga mag-aaral, at maihanda sila sa mga hamon ng tunay na mundo ng trabaho.

Ito ay patunay na patuloy na isinusulong ng paaralan at ng LDRRMO-Candoni ang pagbibigay ng makabuluhang karanasan sa mga kabataan tungo sa isang mas handang kinabukasan.

11/01/2026

📰 | 𝑳𝒊𝒘𝒂𝒏𝒂𝒈 𝒔𝒂 𝑫𝒊𝒍𝒊𝒎: 𝑪𝒂𝒎𝒑𝒇𝒊𝒓𝒆 𝑷𝒓𝒐𝒈𝒓𝒂𝒎 𝒏𝒈 𝑮𝑺𝑷 𝒂𝒕 𝑩𝑺𝑷, 𝑵𝒂𝒈𝒑𝒂𝒔𝒊𝒌𝒍𝒂𝒃 𝒏𝒈 𝑷𝒂𝒈𝒌𝒂𝒌𝒂𝒊𝒔𝒂
Ni: Sheena Lyn Toting

Isinagawa ang GSP & BSP Joint District Rally na may temang “Empowering the Youth, Building the Nation” sa Candoni Central Elementary School noong Enero 9–10, 2026 sa Distrito ng Candoni. Dinaluhan ito ng mga Girl Scouts at Boy Scouts mula sa antas elementarya at sekondarya bilang bahagi ng pagpapatibay ng pagkakaisa, disiplina, at pamumuno ng kabataan.

Isa sa mga tampok na gawain ng rally ang Campfire Program na pinagkaisa ang mga Scout mula sa iba’t ibang paaralan. Sinimulan ito sa isang makulay at masiglang Torch Parade, kung saan masayang itinataas ng mga kabataan ang kanilang mga sulo na nagsilbing liwanag sa kanilang daraanan habang buong lakas na isinisigaw ang kani-kanilang yells. Matapos ang parada, tahimik at may paggalang na pinatay ang mga sulo pagpasok sa paaralan bago sila bumuo ng bilog sa paligid ng campfire.

Apat na sulo lamang ang nanatiling may liwanag, na kumakatawan sa Hilaga, Timog, Silangan, at Kanluran simbolo ng pagkakaisa ng mga Scout mula sa iba’t ibang direksyon. Sinimulan ni Ginoong Jordan Pabera ang programa sa pamamagitan ng Ode to the Fire, na sinundan ng awiting “Campfire’s Burning.” Pagkatapos nito, pormal na pinaliyab ang campfire ng mga kinatawan ng apat na direksyon.

Nagbigay rin ng makabuluhang mensahe si Ginang Darlene Grace Malsi, PSDS, na nagsilbing inspirasyon at motibasyon sa mga kabataan upang ipagpatuloy ang diwa ng pagkakaisa, serbisyo, at pamumuno. Ipinamalas naman ng mga kalahok mula sa elementarya at sekondarya ang kanilang tatlong minutong palabas na binubuo ng yells at sayaw na nagpapakita ng tindig, saya, at determinasyon bilang mga Scout.

Lalong pinatingkad ang diwa ng programa sa pag-awit ng commitment song na “Liwanag sa Dilim” ni Rico Blanco, na nagsilbing paalala sa mga GSP at BSP na maging huwaran at gabay sa kapwa. Opisyal namang idineklara ni Ginoong Arvin Torreblanca ang pagsasara ng Campfire Program, at sunod si Ginoong Jopre Pillado sa pagbigay ng Benediction.

Sa kabuuan, ang kaganapang ito ay tumatak sa puso’t isipan ng mga kabataan, isang paalala na sila ay tinatawag na maging mas matapang, mas magkaisa, at maging tunay na Liwanag sa Dilim sa kanilang komunidad at sa bayan.

13/12/2025

𝐂𝐚𝐧𝐢𝐧𝐠𝐚𝐲 𝐍𝐇𝐒-𝐌𝐚𝐢𝐧, 𝐍𝐚𝐩𝐮𝐧𝐨 𝐧𝐠 𝐈𝐛𝐚’𝐭 𝐈𝐛𝐚𝐧𝐠 𝐊𝐚𝐫𝐚𝐤𝐭𝐞𝐫 𝐬𝐚 𝐂𝐨𝐬𝐩𝐥𝐚𝐲 𝐅𝐞𝐬𝐭𝐢𝐯𝐚𝐥 𝐨𝐟 𝐓𝐚𝐥𝐞𝐧𝐭𝐬.
Ni: Althea Grazel Genova

CANDONI, Negros Occidental – Tila naging isang malaking entablado ng pelikula at anime ang Caningay National High School (CNHS) Main noong Disyembre 12, matapos bumida ang Cosplay Competition bilang pangunahing kaganapan sa idinaos na Festival of Talents.

Sa halip na mga tradisyunal na patimpalak, ibinuhos ng mga mag-aaral ang kanilang oras at pagkamalikhain sa pagbibihis-anyo bilang kanilang mga paboritong karakter. Mula sa mga sikat na anime heroes, superheroes, movie icons, hanggang sa mga book characters, nagningning ang mga estudyante sa kanilang makukulay at detalyadong kasuotan.
Ayon sa mga g**o, ang aktibidad ay hindi lamang tungkol sa pagsuot ng costume, kundi pagpapakita rin ng "character projection" at kumpiyansa sa sarili.
"Nakakamangha ang naging diskarte ng mga bata. Kahit sa simpleng materyales, nagawa nilang gayahin ang mga idolo nilang karakter. Ipinakita nila na ang talento ay maipapahayag din sa pamamagitan ng sining ng pananamit at pag-arte," pahayag ng isa sa mga tagapamahala ng event.

Naging agaw-eksena ang mga rumampa sa entablado kung saan ipinakita ng mga cosplayers ang kani-kanilang "signature pose" at "famous lines." Ang ilan ay gumamit ng recycled materials para sa kanilang props, na lalong nagpahanga sa mga manonood at hurado.

Labis naman ang tuwa at hiyawan ng mga kapwa
mag-aaral habang pinapanood ang kanilang mga kaklase na nag-transform sa ibang katauhan. Naging pagkakataon din ito para sa masayang photo ops sa buong campus.

Ang mga nanalo sa patimpalak ay hinirang base sa ganda ng costume, pagkakahawig sa karakter, at sa kung paano siya nakakakuha ng atensyon sa mga manonood.. Ang matagumpay na Cosplay event na ito ay patunay na buhay na buhay ang imahinasyon at pagkamalikhain ng mga estudyante ng Caningay National High School.

01/12/2025

𝐂𝐚𝐧𝐢𝐧𝐠𝐚𝐲 𝐍𝐇𝐒-𝐌𝐚𝐢𝐧, 𝐍𝐚𝐠𝐝𝐢𝐰𝐚𝐧𝐠 𝐧𝐠 𝐍𝐚𝐭𝐢𝐨𝐧𝐚𝐥 𝐑𝐞𝐚𝐝𝐢𝐧𝐠 𝐌𝐨𝐧𝐭𝐡
Ni: Je-Ann Mamigo

Ipinagdiwang ng Caningay National High School–Main ang National Reading Month noong Nobyembre 27, 2025, sa isang programang ginanap sa paaralan na may temang “Tulay ang Pagbasa sa Bukas na Puno ng Pag-asa.”

Sinimulan ang programa sa isang panalangin at mga mensahe na inilahad ng mga g**o.

Tampok sa pagdiriwang ang iba’t ibang aktibidad na layuning palakasin ang kultura ng pagbabasa sa mga mag-aaral. Isa sa mga ito ang Mystery Reader Challenge, kung saan hinulaan ng mga estudyante ang personalidad na nagbasa ng isang piling akda. Sinundan ito ng storytelling activity na inilunsad ng anim na mag-aaral mula sa iba’t ibang antas ng grado.

Ang mga piling kalahok na nagbahagi ng kwento ay sina Vimcelle Marie Rose Diaz, Kristoffer Eli Nitor, Beryll Klaye Malunes, Querzhelle Palparan, Sheena Lyn Toting, at Althea Grazel Genova. Binigyang-pugay sila sa pamamagitan ng sertipiko.

Kasunod nito ay isinagawa ang Q&A session tungkol sa mga binasang kwento, kung saan ang unang estudyanteng makasagot nang tama ay agad na binigyan ng premyo. Nagbigay ito ng dagdag na sigla at kompetitibong espiritu sa mga kalahok.

Sa kabuuan, naging matagumpay ang selebrasyon at nag-iwan ng mahalagang paalala sa mga mag-aaral tungkol sa kahalagahan ng pagbabasa bilang tulay tungo sa mas maliwanag na kinabukasan.

DILAT

08/09/2026

28/08/2026

17/08/2026

09/08/2026

17/02/2026

27/01/2026

27/01/2026

11/01/2026

13/12/2025

01/12/2025

Address

Website

Alerts

Shortcuts

Share

Listing takedown request