21/06/2026
Tay, para sa akin, hindi ka lang basta ama—ikaw po ang pinakamabuting Tatay sa buong mundo, at habangbuhay kong ipagpapasalamat sa Diyos na ako ang naging anak mo.
Madalas po ay hindi natin napapag-usapan ang mga bagay-bagay. Marahil dahil pareho po tayong hindi sanay sa mga madamdaming pahayag, o dahil sapat na po ang isang tango at ngiti para magkaintindihan tayo. Pero ngayong Araw ng mga Ama, gusto ko pong isulat ang lahat ng isinisigaw ng puso ko na madalas ay hindi ko po masabi nang harapan.
Nakikita ko po, Tay. Nakikita ko po ang bawat patak ng pawis mo, ang bigat po ng mga pasanin mo na pilit mong itinatalikod para lang po hindi ko makita ang lungkot o pagod sa mga mata mo. Alam ko po ang mga sakripisyong ginagawa mo po nang tahimik—yung mga sandaling pinipili mo pong magtiis para lang masigurong maayos po ang kalagayan ko at may magandang kinabukasan ako. Ang bawat kulubot sa po iyong kamay at ang pagod sa iyong mga hakbang ay patunay po ng walang-kapantay mong pagmamahal. Ikaw po ang haligi na hinding-hindi natitinag, kahit gaano pa po kalakas ang bagyo sa buhay natin.
Sa tuwing nadarapa ako o nawawalan ng pag-asa, ang maalala lang na nandiyan ka ay sapat na para tumayo po akong muli. Sa piling mo, pakiramdam ko po ay ligtas ako sa lahat ng gulo ng mundo. Ang iyong simpleng presensya ang nagbibigay po sa akin ng lakas ng loob na mangarap at lumaban, dahil alam ko pong anuman ang mangyari, may isang Tatay na laging nakatayo sa likod ko, handang sumalo sa akin.
Maraming salamat po, Tay. Salamat sa pag-unawa sa mga panahong mahirap po akong intindihin. Salamat po sa proteksyon, sa gabay, at sa pag-ibig na hinding-hindi ko po kinailanganing limusan dahil kusa mo po itong ibinigay mula noong unang araw na nasilayan ko ang mundong ito.
Kung may isang bagay po ako na ipagmamalaki ko sa buong buhay ko, iyon ay ang katotohanang ikaw po ang Tatay ko. Wala nang hihigit po sa iyo. Mahal na mahal po kita, Tay, higit pa sa kayang sabihin ng anumang salita. Happy Father's Day sa aking natatanging bayani!
- Jennylyn Dalistan✨
