27/10/2026
ഗുരുദർശനത്തിന്റെ മഹത്തായ സന്ദേശം ലോകമെമ്പാടും എത്തിക്കണം: ചാണ്ടി ഉമ്മൻ എം.എൽ.എ.
ഒമാനിൽ എസ്.എൻ.ഡി.പി. യോഗം ഒമാൻ യൂണിയന്റെ നേതൃത്വത്തിൽ ഗുരുവർഷം 172 വിപുലമായി ആഘോഷിച്ചു.
ശ്രീനാരായണ ഗുരുദേവന്റെ 172-ാമത് ജയന്തിയോടനുബന്ധിച്ച് എസ്.എൻ.ഡി.പി. യോഗം ഒമാൻ യൂണിയന്റെ നേതൃത്വത്തിൽ സംഘടിപ്പിച്ച ഗുരുവർഷം 172 ആഘോഷം വൈവിധ്യമാർന്ന പരിപാടികളോടെ ഗൾഫ് കോളേജ് അങ്കണത്തിൽ നടന്നു. പുതുപ്പള്ളി എം.എൽ.എയും മുൻ കേരള മുഖ്യമന്ത്രി ഉമ്മൻ ചാണ്ടിയുടെ മകനുമായ ശ്രീ ചാണ്ടി ഉമ്മൻ മുഖ്യാതിഥിയായി പങ്കെടുത്തു. എസ്.എൻ.ഡി.പി. യോഗം കൗൺസിൽ അംഗം ശ്രീ പി.ടി. മന്മഥൻ, മലയാളം മിഷൻ സെക്രട്ടറി ശ്രീ അനു ചന്ദ്രൻ എന്നിവർ വിശിഷ്ടാതിഥികളായി സംബന്ധിച്ചു.
എസ്.എൻ.ഡി.പി. യോഗം ഒമാൻ യൂണിയൻ ചെയർമാൻ ശ്രീ എൽ. രാജേന്ദ്രന്റെ അധ്യക്ഷതയിൽ നടന്ന സാംസ്കാരിക സമ്മേളനത്തിന് യൂണിയൻ കൺവീനർ ശ്രീ ജി.രാജേഷ് സ്വാഗതം ആശംസിച്ചു. ജാതിയുടെയും മതത്തിന്റെയും അതിർവരമ്പുകൾക്കപ്പുറം പരസ്പരം സ്നേഹിക്കുന്ന മനുഷ്യഹൃദയങ്ങളുടെ സംഗമമായി ഗുരുവർഷം 172-നെ മാറ്റാൻ കഴിഞ്ഞതിൽ അതിയായ സന്തോഷമുണ്ടെന്ന് അദ്ദേഹം പറഞ്ഞു.
ശ്രീനാരായണ ഗുരുദേവന്റെ മഹത്തായ ദർശനങ്ങളും സന്ദേശങ്ങളും ലോകത്തിന്റെ വിവിധ ഭാഗങ്ങളിലേക്ക് എത്തിക്കേണ്ടത് തന്റെ ജീവിതലക്ഷ്യങ്ങളിലൊന്നാണെന്ന് സാംസ്കാരിക സമ്മേളനം ഉത്ഘാടനം ചെയ്ത ചാണ്ടി ഉമ്മൻ എം.എൽ.എ പറഞ്ഞു. ചെറുപ്പത്തിൽ പിതാവ് ഉമ്മൻ ചാണ്ടിയോടൊപ്പം ശിവഗിരി സന്ദർശിച്ച അനുഭവവും പിന്നീട് എം.എൽ.എയായ ശേഷമുള്ള ശിവഗിരി സന്ദർശനവും അദ്ദേഹം അനുസ്മരിച്ചു. ഗുരുദേവന്റെ ആശയങ്ങൾ കാലാതിവർത്തിയാണെന്നും മനുഷ്യസമൂഹത്തിന് ഇന്ന് ഏറ്റവും ആവശ്യമായ മാനവികതയുടെയും സാഹോദര്യത്തിന്റെയും സന്ദേശമാണ് അവ പകർന്നുനൽകുന്നതെന്നും അദ്ദേഹം വ്യക്തമാക്കി.
ഗുരുദേവന്റെ ദർശനങ്ങൾ കൂടുതൽ രാജ്യങ്ങളിലേക്കും ജനങ്ങളിലേക്കും എത്തിക്കാനുള്ള ശ്രമങ്ങളുടെ ഭാഗമായി വത്തിക്കാൻ, ഓസ്ട്രേലിയ, മൗറീഷ്യസ് ,യു എ ഇ തുടങ്ങിയ സ്ഥലങ്ങളിലെ സന്ദർശനങ്ങളും അനുഭവങ്ങളും അദ്ദേഹം പരാമർശിച്ചു. ഗുരുദേവൻ മുന്നോട്ടുവെച്ച സർവമത സൗഹാർദത്തിന്റെയും മനുഷ്യ ഐക്യത്തിന്റെയും ആശയങ്ങൾ ലോകത്തിന് മുന്നിൽ കൂടുതൽ ശക്തമായി അവതരിപ്പിക്കേണ്ടതുണ്ടെന്നും അദ്ദേഹം പറഞ്ഞു. ഗുരുദേവന്റെ ചരിത്രപ്രസിദ്ധമായ സർവമത സമ്മേളനത്തിന്റെ സന്ദേശം ഉൾക്കൊണ്ടുകൊണ്ട് ലോകത്തിന്റെ വിവിധ ഭാഗങ്ങളിൽ സർവമത സംഗമങ്ങൾ സംഘടിപ്പിക്കപ്പെടുന്നതിന്റെ പ്രാധാന്യവും അദ്ദേഹം ചൂണ്ടിക്കാട്ടി.
മനുഷ്യരെല്ലാം ഒന്നാണെന്ന ഗുരുദേവ ദർശനം ഇന്ത്യയുടെ മഹത്തായ കാഴ്ചപ്പാടിന്റെ ഭാഗമാണെന്ന് ചാണ്ടി ഉമ്മൻ അഭിപ്രായപ്പെട്ടു. വിദേശരാജ്യങ്ങളിൽ താൻ കണ്ടുമുട്ടിയ പല നേതാക്കളിലും സമാനമായ മാനവിക കാഴ്ചപ്പാട് കാണാൻ കഴിഞ്ഞിട്ടുണ്ടെന്നും ജാതി, മത, ഭാഷാ വ്യത്യാസങ്ങൾക്കപ്പുറം മനുഷ്യനെ മനുഷ്യനായി കാണുന്ന സമീപനമാണ് ലോകത്തിന് ആവശ്യമെന്നും അദ്ദേഹം പറഞ്ഞു.
കുട്ടികളെ ചെറുപ്പം മുതൽ ഗുരുദേവന്റെ പാത പിന്തുടരാൻ പ്രേരിപ്പിക്കേണ്ടതിന്റെ ആവശ്യകതയും ചാണ്ടി ഉമ്മൻ ചൂണ്ടിക്കാട്ടി. ഭക്തിയും ആത്മീയമൂല്യങ്ങളും ഇന്ത്യൻ സംസ്കാരത്തിന്റെ ഭാഗമാണെന്നും അവയുടെ മാനവികമായ ഉള്ളടക്കം കുട്ടികൾക്ക് പകർന്നുനൽകണമെന്നും അദ്ദേഹം പറഞ്ഞു.
മതസൗഹാർദത്തിന്റെ പ്രായോഗിക മാതൃകയായി എസ്.എൻ.ഡി.പി. ഒമാൻ യൂണിയന്റെ പരിപാടികളിൽ ഒരു മുസ്ലിം സഹോദരി അവതാരകയായി പ്രവർത്തിക്കുന്ന കാര്യം അദ്ദേഹം പ്രത്യേകം പരാമർശിച്ചു. ഗുരുദേവന്റെ ദർശനം പ്രസംഗങ്ങളിൽ മാത്രം ഒതുങ്ങാതെ ജീവിതത്തിൽ പ്രാവർത്തികമാക്കുന്നതിന്റെ നല്ല ഉദാഹരണമാണ് ഇത്തരം കൂട്ടായ്മകളെന്നും അദ്ദേഹം അഭിപ്രായപ്പെട്ടു.
ആശംസാപ്രസംഗത്തിൽ എസ്.എൻ.ഡി.പി. യോഗം കൗൺസിൽ അംഗം ശ്രീ പി.ടി. മന്മഥൻ, ശ്രീനാരായണ ഗുരുദേവൻ ലോകത്തിന് നൽകിയ സമഗ്രമായ സംഭാവനകൾ എന്നും സ്മരിക്കപ്പെടേണ്ടതാണെന്ന് അഭിപ്രായപ്പെട്ടു. ഒരു നൂറ്റാണ്ടിലേറെ കാലം പിന്നിട്ടിട്ടും ഗുരുദേവ ദർശനങ്ങൾക്ക് ലോകമെമ്പാടും പ്രസക്തിയും സ്വീകാര്യതയും വർധിച്ചുവരുന്നതിന്റെ പ്രധാന കാരണം, ജാതി, മത, വർഗ വ്യത്യാസങ്ങൾക്കതീതമായി മനുഷ്യരെല്ലാം ഒന്നാണെന്ന മഹത്തായ ലോകദർശനമാണെന്ന് അദ്ദേഹം ചൂണ്ടിക്കാട്ടി.
ശ്രീനാരായണ ഗുരുദേവനെപ്പോലുള്ള മഹാനായ ആത്മീയ ആചാര്യന്മാരെ വിലയിരുത്തേണ്ടത് അവരുടെ സന്ദേശങ്ങളിലുടെ അല്ല മറിച്ച് അവർ ലോകത്തിന് മുന്നിൽ തുറന്നു വച്ച ദർശനത്തിലൂടെ ആകണമെന്ന് ശ്രീ മന്മഥൻ വ്യക്തമാക്കി.
ജാതിഭേദവും മതദ്വേഷവും ഇല്ലാതെ എല്ലാവരും സാഹോദര്യത്തോടെ ജീവിക്കുന്ന ഒരു സമൂഹമാണ് ഗുരുദേവൻ സ്വപ്നം കണ്ടതെന്ന് അദ്ദേഹം ഓർമിപ്പിച്ചു. ആലുവ അദ്വൈതാശ്രമത്തിൽ സംഘടിപ്പിച്ച സർവമത സമ്മേളനത്തിന്റെ പ്രാധാന്യവും അദ്ദേഹം വിശദീകരിച്ചു. വിവിധ മതങ്ങളുടെ പ്രതിനിധികളെ ഒരുമിച്ചിരുത്തിയ ആ സമ്മേളനം, മതങ്ങൾ തമ്മിലുള്ള തർക്കങ്ങൾക്കും മത്സരങ്ങൾക്കുമപ്പുറം അവയുടെ അന്തഃസത്ത തിരിച്ചറിയുകയും പരസ്പരം മനസ്സിലാക്കുകയും ചെയ്യേണ്ടതിന്റെ ആവശ്യകത ലോകത്തിന് മുന്നിൽ അവതരിപ്പിച്ച ചരിത്രസംഭവമായിരുന്നുവെന്ന് അദ്ദേഹം പറഞ്ഞു.
ഗുരുദേവൻ ആ സമ്മേളനത്തിന്റെ ലക്ഷ്യം വ്യക്തമാക്കിയത് “വാദിക്കുവാനും ജയിക്കുവാനുമല്ല, അറിയുവാനും അറിയിക്കുവാനുമാണ്” എന്ന സന്ദേശത്തിലൂടെയാണെന്നും ശ്രീ മന്മഥൻ ചൂണ്ടിക്കാട്ടി. വ്യത്യസ്ത മതവിശ്വാസങ്ങൾ പിന്തുടരുന്നവർ തമ്മിൽ പരസ്പര ബഹുമാനവും അറിവും വളർത്തുകയാണ് ഇത്തരം കൂട്ടായ്മകളുടെ യഥാർഥ ലക്ഷ്യം.
വെള്ളത്തിന് മലയാളത്തിൽ ‘വെള്ളം’ എന്നും തമിഴിൽ തണ്ണി ’ എന്നും ഹിന്ദിയിൽ ‘പാനി’ എന്നും ഇംഗ്ലീഷിൽ ‘വാട്ടർ’ എന്നും വ്യത്യസ്ത പേരുകളുണ്ടെങ്കിലും അവയെല്ലാം ഒരേ വസ്തുവിനെയാണ് സൂചിപ്പിക്കുന്നത്. അതുപോലെ, വിവിധ മതവിശ്വാസികൾ ദൈവത്തെ വ്യത്യസ്ത പേരുകളിൽ വിളിച്ചാലും അവയ്ക്കപ്പുറം മനുഷ്യരെ ഒന്നിപ്പിക്കുന്ന ആത്മീയ സത്യവും മാനവികതയും തിരിച്ചറിയണമെന്നതാണ് ഗുരുദേവ ദർശനത്തിന്റെ അന്തഃസത്തയെന്ന് അദ്ദേഹം വിശദീകരിച്ചു. മുസ്ലിം വിശ്വാസികൾ അല്ലാഹുവെന്നും ക്രൈസ്തവർ കർത്താവെന്നും ഹൈന്ദവർ കൃഷ്ണനെന്നും വിളിക്കുമ്പോൾ, പേരുകളിലെ വ്യത്യാസങ്ങൾക്കപ്പുറം മനുഷ്യരെ തമ്മിൽ അകറ്റാതെ അടുപ്പിക്കുന്ന ഐക്യബോധമാണ് വളർത്തേണ്ടതെന്ന് അദ്ദേഹം അഭിപ്രായപ്പെട്ടു.
മനുഷ്യസമൂഹത്തെ വിഭജിക്കുന്ന ജാതി, മത, വർഗ വ്യത്യാസങ്ങൾ ഇല്ലാതാക്കി സമത്വത്തിലും സാഹോദര്യത്തിലും അധിഷ്ഠിതമായ ലോകം സൃഷ്ടിക്കണമെന്ന ഗുരുദേവന്റെ സന്ദേശമാണ് അദ്ദേഹത്തിന്റെ മഹത്വവും കാലാതിവർത്തിയായ പ്രസക്തിയും വ്യക്തമാക്കുന്നത്. ഈ ദർശനമാണ് ഗുരുദേവന്റെ പേരിൽ ലോകത്തിന്റെ വിവിധ ഭാഗങ്ങളിൽ സർവമത സമ്മേളനങ്ങളും മാനവിക കൂട്ടായ്മകളും സംഘടിപ്പിക്കപ്പെടുന്നതിന് പ്രചോദനമാകുന്നതെന്നും ശ്രീ മന്മഥൻ പറഞ്ഞു.
മലയാളം മിഷൻ സെക്രട്ടറി ശ്രീ അനു ചന്ദ്രൻ, ഗുരുദേവന്റെ ദാർശനിക കൃതിയായ ആത്മോപദേശശതകത്തിലെ മാനവിക മൂല്യങ്ങളും ജീവിതദർശനവും ഹൃദയസ്പർശിയായി വിശദീകരിച്ചു. വ്യക്തിയുടെ ആത്മസുഖം മറ്റുള്ളവരുടെ സുഖത്തിനും നന്മയ്ക്കും ഉപകരിക്കണമെന്ന ഗുരുദേവ സന്ദേശത്തിന്റെ ആഴം അദ്ദേഹം സദസ്സിന് മുന്നിൽ അവതരിപ്പിച്ചു.
“അവനവനാത്മസുഖത്തിനാചരിക്കുന്നവ അപരന്നു സുഖത്തിനായ് വരേണം” എന്ന ഗുരുദേവ വചനത്തെ ആസ്പദമാക്കി, മനുഷ്യൻ സ്വന്തം സന്തോഷത്തിനും നന്മയ്ക്കുമായി ചെയ്യുന്ന പ്രവർത്തനങ്ങൾ മറ്റുള്ളവർക്കും പ്രയോജനകരമാകണമെന്നതാണ് ഗുരുദേവൻ പഠിപ്പിക്കുന്നതെന്ന് അദ്ദേഹം വിശദീകരിച്ചു. സ്വന്തം ജീവിതത്തിന്റെ സുഖവും സംതൃപ്തിയും മാത്രം ലക്ഷ്യമാക്കാതെ സഹജീവികളുടെ ക്ഷേമവും സന്തോഷവും പരിഗണിക്കുന്ന ജീവിതശൈലിയാണ് യഥാർഥ മാനവികതയെന്നും അദ്ദേഹം ഓർമിപ്പിച്ചു.
വിദ്യാഭ്യാസ രംഗത്തും കായിക-കലാ മേഖലകളിലും മികവ് തെളിയിച്ച പ്രതിഭകളെ ആദരിക്കുന്ന ചടങ്ങും ഗുരുവർഷം 172-ന്റെ പ്രധാന ആകർഷണമായി. എസ്.എൻ.ഡി.പി. ഒമാൻ യൂണിയനു കീഴിലുള്ള വിവിധ ശാഖകളിൽനിന്ന് എസ്.എസ്.എൽ.സി., പ്ലസ് ടു, ഉൾപ്പെടെയുള്ള പരീക്ഷകളിലും ബിരുദ പരീക്ഷകളിലും ഉന്നത വിജയം നേടിയ വിദ്യാർത്ഥികളെ ചടങ്ങിൽ ആദരിച്ചു.
കായികരംഗത്തും കലാരംഗത്തും ശ്രദ്ധേയമായ നേട്ടങ്ങൾ കൈവരിച്ച കുട്ടികളെയും ചടങ്ങിൽ അനുമോദിച്ചു. ചാണ്ടി ഉമ്മൻ എം.എൽ.എ വിജയികൾക്ക് ഉപഹാരങ്ങൾ കൈമാറി. കുട്ടികളുടെ കഴിവുകളെ അംഗീകരിക്കുകയും കൂടുതൽ ഉയരങ്ങളിലേക്ക് മുന്നേറാൻ പ്രോത്സാഹിപ്പിക്കുകയും ചെയ്യുന്നതിലൂടെ വിദ്യാഭ്യാസത്തിനും വ്യക്തിത്വവികസനത്തിനും പ്രാധാന്യം നൽകുന്ന ഗുരുദേവ ദർശനത്തെ പ്രാവർത്തികമാക്കുകയാണ് ഈ ആദരവിലൂടെ ലക്ഷ്യമിടുന്നതെന്ന് സംഘാടകർ വ്യക്തമാക്കി.
ഒമാനിലെ വിവിധ എസ്.എൻ.ഡി.പി. ശാഖകളിലെ കുട്ടികളും മുതിർന്നവരും അവതരിപ്പിച്ച കലാപരിപാടികൾ ആഘോഷത്തിന് കൂടുതൽ നിറവും ചാരുതയും പകർന്നു. ശാഖാതലങ്ങളിൽനിന്നുള്ള അംഗങ്ങളുടെ സജീവ പങ്കാളിത്തം പരിപാടിയെ ഒരു സംഘടനാ ആഘോഷത്തിനപ്പുറം പ്രവാസി മലയാളികളുടെ സാംസ്കാരിക കൂട്ടായ്മയാക്കി മാറ്റി.
ഫ്ലവേഴ്സ് ടി.വിയിലൂടെ ശ്രദ്ധേയരായ ഗായകരായ സബാ മൂണും ദേവനാരായണനും അവതരിപ്പിച്ച സംഗീതവിരുന്ന് പരിപാടിയുടെ പ്രധാന ആകർഷണങ്ങളിലൊന്നായി. ഹൃദ്യമായ ഗാനാവതരണങ്ങളിലൂടെ അവർ സദസ്സിനെ സംഗീതസാന്ദ്രമാക്കി.
എസ്.എൻ.ഡി.പി. യോഗം ഒമാൻ യൂണിയൻ കോർ കമ്മിറ്റി അംഗങ്ങളായ ശ്രീ ഡി. മുരളീധരൻ, ശ്രീ .കെ.ആർ റിനേഷ്, ശ്രീ ബി. ഹർഷകുമാർ, പ്രോഗ്രാം കമ്മിറ്റി കൺവീനർ ശ്രീ വസന്തകുമാർ എന്നിവരടക്കം യൂണിയൻ ഭാരവാഹികളും വിവിധ ശാഖാ പ്രതിനിധികളും പ്രവർത്തകരും പരിപാടിയുടെ വിജയത്തിനായി സജീവമായി പ്രവർത്തിച്ചു.
ഗുരുദേവന്റെ മാനവികതയുടെയും സമത്വത്തിന്റെയും മതസൗഹാർദത്തിന്റെയും സന്ദേശങ്ങൾ പുതുതലമുറയിലേക്ക് പകർന്നുനൽകുന്നതിനൊപ്പം, ഒമാനിലെ പ്രവാസി മലയാളികൾക്കിടയിൽ ഐക്യവും സാഹോദര്യവും ശക്തിപ്പെടുത്തുന്ന വേദിയായി ഗുരുവർഷം 172 മാറി. ജാതിയുടെയും മതത്തിന്റെയും വ്യത്യാസങ്ങൾക്കപ്പുറം മനുഷ്യസ്നേഹമാണ് ഏറ്റവും വലിയ മൂല്യമെന്ന ഗുരുദേവ സന്ദേശം ജീവിതത്തിൽ പകർത്താനുള്ള ആഹ്വാനത്തോടെയാണ് ആഘോഷം ശ്രദ്ധേയമായത്.
