17/02/2026
अक्षरबाट आत्मविश्वासतर्फ : दुप्चेश्वरको कक्षाकोठाबाट उठेको उज्यालो
दुप्चेश्वर गाउँपालिकाको लगानी, रुडेक नेपाल र रुम टु रिड को प्राविधिक सहयोगमा गाउँपालिका भित्रका ४२ वटा सामुदायिक विद्यालयमा लागू गरिएको पठन सीप विकास साक्षरता तालिम कुनै साधारण तालिम थिएन यो त बालमनमा उज्यालो बाल्ने अभियान थियो। त्यसपछिको प्रभाव मूल्यांकन र कक्षाकोठा सम्म सीप प्रवाह केवल कागजमा सीमित नबनी बालबालिकाको आँखामा चम्किएको आत्मविश्वासमा परिणत भएको अनुभूति भयो।
२०८२ साल फागुन ४ गते, दुप्चेश्वर–५ स्थित महादेव माध्यमिक विद्यालयमा आयोजित Refresher Networking Workshop का क्रममा जब म कक्षाकोठामा पुगेँ, त्यहाँ मैले किताब पढिरहेका विद्यार्थी मात्र देखिनँ—मैले भविष्य पढिरहेको नेपाल देखेँ।
कक्षा १ का बाबुनानीहरू नेपाली भाषा सरर पढिरहेका थिए, बिना डर, बिना हिचकिचाहट। उनीहरूको आँखामा जिज्ञासा थियो, आवाजमा आत्मबल र व्यवहारमा सिक्न चाहने उत्सुकता।
त्यो दृश्यले एउटा गहिरो सत्य सम्झाइदियो—दृढ इच्छाशक्ति, लगन र कर्तव्यबोध भए असम्भव भन्ने शब्द आफैँ हार मान्छ।
केवल ५/६ महिनाको छोटो अवधिमा कक्षा १ का विद्यार्थीहरूलाई पढ्न सक्ने बनाउनु, कक्षाकोठालाई सिकाइमैत्री, आकर्षक र जीवन्त बनाउनु—यो कुनै चमत्कार होइन, यो शिक्षाप्रति समर्पित मनहरूको अथक मेहनतको परिणाम हो।
यो परिवर्तनको पछाडि रोष्टर प्रशिक्षकहरू थिए, शिक्षकहरू थिए, विद्यालय व्यवस्थापन थियो, अनि सबैभन्दा माथि—बालबालिकाको उज्यालो भविष्यप्रति साझा प्रतिबद्धता थियो।
आज दुप्चेश्वरका कक्षाकोठामा अक्षर मात्र होइन, आत्मविश्वास, सपनाहरू र सम्भावनाहरू पढाइँदै छन्। पठन सीप विकास खोजी सम्भावनाको
यस सफल यात्रामा साथ दिनुहुने सम्पूर्ण रोष्टर प्रशिक्षक, शिक्षक, विद्यालय परिवार तथा सरोकारवालाहरू सबैप्रति हार्दिक धन्यवाद र गहिरो आभार व्यक्त गर्दछु।
शिक्षा भनेको पाठ्यपुस्तक मात्र होइन—
शिक्षा भनेको बालबालिकाको आँखामा भविष्य देख्ने कला हो।
र आज दुप्चेश्वरले त्यो कला जीवन्त बनाएर देखाउने प्रयत्न गरेको छ यसको लागि सबैमा धन्यवाद !!🌱
शिक्षा शाखा, दुप्चेश्वर गाउँपालिका ।
