27/08/2026
हार्दिक समवेदना
हिजो आएको विनाशकारी बाढीका कारण भएको मानवीय क्षतिले हामी सबैलाई दुःखी बनाएको छ। यस दुःखद घडीमा ज्यान गुमाउनुहुने सम्पूर्णप्रति हार्दिक श्रद्धाञ्जली तथा शोकसन्तप्त परिवारजनमा गहिरो समवेदना व्यक्त गर्दछौँ। दिवंगत आत्माहरूले शान्ति पाऊन्।
आफ्नो प्रियजन गुमाएका परिवारको पीडा कम गर्न सायद कुनै शब्द पर्याप्त हुँदैन। अझै सम्पर्कविहीन रहनुभएका धेरैजना सुरक्षित रूपमा आफ्ना परिवार र प्रियजनको सम्पर्कमा फर्किनुहोस् भन्ने हाम्रो हार्दिक कामना छ। घाइते तथा प्रभावित सबैको शीघ्र स्वास्थ्यलाभको कामना गर्दछौँ।
उद्धार तथा राहत कार्यमा आफ्नो ज्यानको जोखिम मोलेर खटिनुभएका सुरक्षाकर्मी, स्वयंसेवक, स्थानीयवासी तथा सम्पूर्ण उद्धारकर्मीहरूप्रति हार्दिक आभार। उहाँहरूको सुरक्षा र सफलताको लागि पनि हामी प्रार्थना गर्दछौँ।
हामी सबैले आ–आफ्नो ठाउँबाट सहयोग गरौँ। घटनास्थलमै पुगेर सहयोग गर्न सम्भव नहुन सक्छ, तर सहयोग गर्ने धेरै बाटाहरू छन्। प्रधानमन्त्री दैवी प्रकोप उद्धार कोषलगायत आधिकारिक राहत तथा उद्धार प्रयासमा आफ्नो क्षमताअनुसारको सानो योगदानले पनि कसैको जीवनमा ठूलो फरक पार्न सक्छ।
सहयोग सानो वा ठूलो हुँदैन, संकटमा साथ दिनु नै सबैभन्दा ठूलो मानवता हो।
यस कठिन समयमा Supportive Action Towards Humanity का सम्पूर्ण सदस्यहरूको मन, विचार र प्रार्थना प्रभावित सबै परिवार तथा समुदायसँगै छ।
ईश्वरले सबैको रक्षा गरून्। 🙏
