31/07/2026
सामाजिक सद्भाव, सहिष्णुता र शान्ति कायम राख्न सार्वजनिक अपिल
विगत केही समयदेखि तराई–मधेसका विभिन्न स्थानहरूमा धार्मिक आस्था तथा सामाजिक संवेदनशीलतासँग जोडिएका विषयलाई लिएर उत्पन्न तनाव, अविश्वास र हिंसात्मक घटनाहरूप्रति नेपाल युवा परिषद् गहिरो दुःख र चिन्ता व्यक्त गर्दछ। विशेष गरी सुनसरी, सिराहा, र जनकपुर लगायतका क्षेत्रमा भएका दुःखद् घटनामा ज्यान गुमाउनु भएका सम्पूर्ण मृतकहरूप्रति हार्दिक श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्दछौँ। साथै, घटनामा घाइते हुनुभएका नागरिकहरूको शीघ्र स्वास्थ्यलाभको कामना गर्दछौँ।
नेपाल बहुजातीय, बहुभाषिक र बहुसांस्कृतिक विशेषताले युक्त सुन्दर राष्ट्र हो। विविधता बीचको एकता, आपसी भाइचारा र धार्मिक सहिष्णुता नै हाम्रो मुख्य पहिचान र शक्ति हो। नेपालको संविधानले सुनिश्चित गरेका धार्मिक स्वतन्त्रता, समानता, समावेशिता र मानव अधिकारको संरक्षण गर्नु हामी सबै नागरिकको साझा दायित्व हो। कुनै पनि विवाद वा मतभेदको समाधान हिंसाबाट सम्भव छैन यसको एकमात्र विकल्प संवाद, सहिष्णुता र पारस्परिक सम्मान नै हो भन्नेमा नेपाल युवा परिषद् दृढ विश्वास राख्दछ।
यस संवेदनशील परिस्थितिमा नेपाल युवा परिषद् सम्पूर्ण सरोकारवाला निकायहरूसँग निम्नअनुसार अपिल गर्दछौः
✅ बालबालिका तथा युवा सुरक्षाः धार्मिक वा सामाजिक अशान्तिका कारण बालबालिकाको शिक्षा, सुरक्षा, मानसिक स्वास्थ्य र समग्र विकासमा गम्भीर असर पर्ने भएकाले राज्यका नियमनकारी निकाय तथा स्थानीय प्रशासनलाई विशेष संवेदनशीलता अपनाउन आग्रह गर्दछौँ।
✅ नागरिक समाज र समुदायको भूमिकाः शान्ति, सामाजिक सद्भाव र विविधताको सम्मानका लागि विद्यालय, शिक्षक, अभिभावक, सञ्चारमाध्यम, धार्मिक तथा सामुदायिक नेतृत्व र नागरिक समाजलाई जिम्मेवार नागरिकको भूमिका निर्वाह गर्न अनुरोध गर्दछौँ।
✅ युवा शक्तिको सकारात्मक परिचालनः सामाजिक अशान्ति र भ्रम फैलाउने तत्वहरूबाट सचेत रहँदै युवाहरूलाई सद्भाव कायम राख्ने, युवा नेतृत्व प्रवद्र्धन गर्ने र उद्यमशीलता मार्फत समृद्धिको बाटोमा अघि बढ्न प्रोत्साहन गर्न आग्रह गर्दछौँ।
✅ शान्ति र नागरिक शिक्षाः वर्तमान परिस्थितिले विद्यालय, समुदाय र सार्वजनिक जीवनमा शान्ति शिक्षा, मानव अधिकार शिक्षा, नागरिक कर्तव्य तथा अन्तरधार्मिक समझदारीलाई प्रभावकारी रूपमा अगाडि बढाउनुपर्ने आवश्यकता उजागर गरेको छ।
अन्ततः, एउटा सुरक्षित, समावेशी, विभेदरहित र शान्तिपूर्ण समाज निर्माणका लागि सम्पूर्ण युवाहरू, धार्मिक गुरुहरू, राजनीतिक नेतृत्व तथा आम नागरिकहरूलाई एकताबद्ध भई अन्तरधार्मिक सद्भाव र सामाजिक एकता कायम राख्न नेपाल युवा परिषद् हार्दिक अपिल गर्दछ।
सरोज बानियाँ
संस्थापक एवं केन्द्रीय अध्यक्ष
मितिः २०८३। ०४। १५ गते
#सरोजबानियाँ
