04/08/2026
संयुक्त एम्बुलेन्स चालक संघ नेपाल : जिम्मेवार, मर्यादित र अधिकारमुखी ट्रेड युनियन :
संयुक्त एम्बुलेन्स चालक संघ नेपाल एम्बुलेन्स चालकहरूको मात्र होइन, एम्बुलेन्स सेवासँग प्रत्यक्ष वा अप्रत्यक्ष रूपमा आबद्ध सम्पूर्ण श्रमिकहरूको साझा ट्रेड युनियन संस्था हो। यस संस्थामा एम्बुलेन्स चालकहरू, अस्पताल कर्मचारीहरू, पेरामेडिक्स तथा एम्बुलेन्स सेवासँग सम्बन्धित अन्य श्रमिकहरू सदस्य बन्न सक्ने व्यवस्था रहेको छ। हाम्रो उद्देश्य कुनै व्यक्ति वा संस्थाको विरोध गर्नु होइन, बरु स्वास्थ्य सेवालाई अझ मर्यादित, व्यवस्थित, सुरक्षित र जनउत्तरदायी बनाउनु हो।
एम्बुलेन्स सेवा स्वास्थ्य प्रणालीको अत्यन्त संवेदनशील अंग हो। बिरामीको जीवन र समयसँग प्रत्यक्ष जोडिएको यस सेवामा कार्यरत जनशक्तिको पेशागत सम्मान, सुरक्षा, हक–अधिकार र क्षमता अभिवृद्धि सुनिश्चित हुनु आवश्यक छ। यही विश्वासका साथ संयुक्त एम्बुलेन्स चालक संघ नेपाल स्थापना भएको हो।
हाम्रो संगठनको मूल सिद्धान्त स्पष्ट छ। राज्यले ल्याएका सकारात्मक नीति, कानुन र सुधारका कार्यक्रमहरूको हामी सधैँ स्वागत र समर्थन गर्छौं। तर श्रमिकको हक–अधिकार, पेशागत मर्यादा वा जनहितविपरीत जाने कुनै पनि निर्णय, नीति वा अभ्यासप्रति हामी लोकतान्त्रिक र रचनात्मक ढंगले असहमति जनाउँछौं। हाम्रो भूमिका सधैँ संवाद, सहकार्य र समाधानको पुल बन्ने हो, द्वन्द्व सिर्जना गर्ने होइन।
हामीले कुनै पनि व्यक्तिलाई अन्धो समर्थन गर्ने नीति लिएका छैनौँ र ब्यक्तिगत फाइदाका लागि कुनै गतिविधि गर्दैनौ र गर्न पनि दिदैनौ । यदि हाम्रो आफ्नै संगठनका कुनै सदस्य, एम्बुलेन्स चालक वा अन्य कुनै सरोकारवाला गलत कार्यमा संलग्न भएको पाइन्छ भने त्यसको हामी स्पष्ट रूपमा विरोध गर्छौँ। गलतलाई संरक्षण गर्नु ट्रेड युनियनको धर्म होइन। अनुशासन, पारदर्शिता, इमानदारी र सेवाभाव हाम्रो संगठनका मूल आधार हुन्। त्यसैले सहीलाई साथ दिने र गलतलाई सच्याउने संस्कृतिको विकासमा हामी प्रतिबद्ध छौँ।
हाम्रो विश्वास छ कि स्वस्थ श्रम सम्बन्ध, जिम्मेवार सेवा प्रवाह र राज्यसँगको सहकार्यबाट मात्रै गुणस्तरीय एम्बुलेन्स सेवा सम्भव हुन्छ। त्यसैले हामी सरकार, स्वास्थ्य संस्था, स्थानीय तह, अस्पताल, एम्बुलेन्स सञ्चालक र सम्पूर्ण स्वास्थ्यकर्मीहरूसँग हातेमालो गर्दै नागरिकले सहज, सुरक्षित र विश्वसनीय एम्बुलेन्स सेवा पाउने वातावरण निर्माण गर्न निरन्तर लागिपरेका छौँ।
संयुक्त एम्बुलेन्स चालक संघ नेपाल कुनै स्वार्थ समूह होइन, यो पेशागत सम्मान, सामाजिक उत्तरदायित्व र जनसेवाको भावनाले प्रेरित संस्था हो। हामी अधिकारसँगै कर्तव्यलाई पनि उत्तिकै महत्व दिन्छौँ। श्रमिकको आवाजलाई सम्बन्धित निकायसम्म पुर्याउने, आवश्यक सुधारका लागि पहल गर्ने र स्वास्थ्य सेवाको गुणस्तर अभिवृद्धिमा योगदान गर्ने हाम्रो निरन्तर प्रतिबद्धता रहनेछ।
अन्त्यमा, सम्पूर्ण एम्बुलेन्स चालक, अस्पताल कर्मचारी, पेरामेडिक्स तथा स्वास्थ्य क्षेत्रका श्रमिकहरूलाई यस साझा अभियानमा एकताबद्ध हुन हार्दिक आह्वान गर्दछु। हामी सबै मिलेर मर्यादित, व्यवस्थित, पारदर्शी र जनविश्वासयुक्त एम्बुलेन्स सेवा निर्माण गर्न सक्षम हुनेछौँ भन्ने विश्वास व्यक्त गर्दछु। साथै आउदा दिनहरु अझ जटिल हुँदै जाने भएकोले सबैको साथ राय र सल्लाहमा यसलाई उचाइमा पुर्याउदै संघका उद्देश्य पूरा गर्न कटिबद्ध रहेको समेत स्पष्ट पार्न चाहन्छु ।
मुक्ति काफ्ले
महासचिव
