22/08/2026
नेसनल प्याब्सन मधेस प्रदेशको भेला सम्पन्न
मिति: २०८३/०५/०६
मधेस प्रदेश — नेसनल प्याबसन मधेस प्रदेशको आयोजनामा “उच्च शिक्षा छात्रवृत्ति, शिक्षा ऐन, शैक्षिक तालीम र संगठनका आगामी योजना लगायतका विषयमा अन्तरक्रिया कार्यक्रम” भव्य रूपमा सम्पन्न भएको छ।
कार्यक्रममा प्रस्तावित शिक्षा ऐन, शिक्षक तथा शैक्षिक जनशक्तिका लागि आवश्यक तालीम, निजी विद्यालयका समसामयिक समस्या तथा संगठनलाई आगामी दिनमा थप प्रभावकारी बनाउने योजनालगायतका विषयमा विस्तृत अन्तरक्रिया तथा छलफल गरिएको थियो।
कार्यक्रममा संविधान सभा सदस्य तथा नेसनल प्याब्सनका राष्ट्रिय अध्यक्ष माननीय गीता क्षेत्री राणाको गरिमामय प्रमुख आतिथ्यता रहेको थियो। उहाँले निजी तथा संस्थागत विद्यालयको शैक्षिक विकास, गुणस्तरीय शिक्षा र विद्यालय क्षेत्रका चुनौती समाधानका लागि संगठनको भूमिका महत्वपूर्ण रहेको बताउनुभयो।
भेलामा नेसनल प्याब्सनका पदाधिकारी, मधेस प्रदेश तथा विभिन्न जिल्लाका प्रतिनिधि, विद्यालय सञ्चालक तथा शिक्षाकर्मीहरूको उल्लेखनीय सहभागिता रहेको थियो। सहभागीहरूले शिक्षा क्षेत्रमा देखिएका वर्तमान चुनौती, अवसर तथा आगामी दिनमा संगठनले लिनुपर्ने रणनीतिबारे आफ्ना धारणा र सुझाव प्रस्तुत गरेका थिए।
अन्तरक्रियाबाट प्राप्त सुझाव तथा निष्कर्षलाई संगठनको आगामी कार्ययोजना निर्माणमा समेट्दै निजी तथा संस्थागत विद्यालयको हकहित, शैक्षिक गुणस्तर अभिवृद्धि र समग्र शिक्षा क्षेत्रको विकासमा थप प्रभावकारी रूपमा अघि बढ्ने प्रतिबद्धता व्यक्त गरिएको छ।
कार्यक्रमले मधेस प्रदेशका निजी तथा संस्थागत विद्यालयहरूबीच सहकार्य, समन्वय र साझा मुद्दामा एकताका लागि थप ऊर्जा प्रदान गरेको आयोजकले जनाएको छ।
