23/08/2026
शंखमूल हत्याप्रकरणमा होस्टल सञ्चालक पनि पक्राउ— काठमाडौंको शंखमूलस्थित भ्याली ब्वाइज होस्टलमा २२ वर्षीय वसन्त कालाथोकीको हत्या प्रकरणमा प्रहरीले होस्टल सञ्चालक आलोक ठाकुरलाई पनि पक्राउ गरेको छ।
प्रहरीका अनुसार ठाकुरलाई ज्यान मुद्दामा पक्राउ गरी अदालतबाट पाँच दिनको म्याद थप गरिएको छ। यसअघि घटनामा संलग्न भएको आरोपमा शेखर यादव र प्रमित पटेल पक्राउ परिसकेका थिए। पटेललाई भाग्ने क्रममा मकवानपुरबाट पक्राउ गरिएको बताइएको छ।
दाङको घोराही उपमहानगरपालिका–१७ का कालाथोकी शुक्रबार बिहान होस्टलको कोठामा गम्भीर घाइते अवस्थामा भेटिएका थिए। उपचारका क्रममा उनको सिभिल अस्पतालमा मृत्यु भएको थियो। प्रारम्भमा धारिलो हतियार प्रहार भएको आशंका गरिए पनि प्रत्यक्षदर्शीको बयानपछि टी–टेबलले टाउकोमा प्रहार गर्दा उनको मृत्यु भएको खुलेको प्रहरीको प्रारम्भिक अनुसन्धानले देखाएको छ।
प्रारम्भिक अनुसन्धानअनुसार बिहीबार राति मृतक र आरोपितहरूबीच सामान्य विवाद भएको थियो। सोही विवादका क्रममा आवेगमा आएर कुटपिट भएको हुनसक्ने प्रहरीको आशंका छ। घटनामा होस्टल व्यवस्थापनतर्फ पनि गम्भीर लापरबाही देखिएको भन्दै सञ्चालकलाई अनुसन्धानको दायरामा ल्याइएको हो।
घटनापछि मृतककी आमाको समेत मृत्यु भएको छ। समाचारअनुसार उनले आत्महत्या गरेको आशंका गरिएको छ। मृतकका बुबा भने वैदेशिक रोजगारीका क्रममा मलेसियामा रहेका छन्।
