14/06/2026
हालै सम्पन्न एसियन गेम्स छनोट प्रक्रियामा भएको हस्तक्षेप, नियमविपरीत निर्णय तथा पारदर्शिताको अभावले नेपाली साइक्लिङ समुदाय गम्भीर रूपमा आहत र निराश भएको छ।
यसअघि उल्लेख गरिएका प्रश्नहरूको जवाफ दिनु त परको कुरा, नेपाल साइक्लिङ संघले खेलाडी तथा सरोकारवालाहरूका जायज जिज्ञासाप्रति कुनै चासो वा उत्तरदायित्व देखाएको छैन। झन् पछिल्लो छनोट प्रक्रियामा भएको अनियमितता र मनपरीले वर्तमान नेतृत्वप्रति रहेको विश्वासलाई थप कमजोर बनाएको छ।
यदि नेपाल साइक्लिङ संघले खेलाडीहरूको हित, अधिकार, अवसर र भविष्यको संरक्षण गर्न सक्दैन भने यस्तो संस्थाको औचित्य के रहन्छ? संघको अस्तित्व खेलाडी र खेलको विकासका लागि हो कि केही सीमित व्यक्तिहरूको स्वार्थ पूरा गर्नका लागि?
आज अवस्था यस्तो बनेको छ कि अधिकांश खेलाडीहरू नेपाल साइक्लिङ संघलाई आफ्नो संस्थाका रूपमा अनुभूति गर्न सकिरहेका छैनन्। विश्वास, अपनत्व र पारदर्शिताको आधारमा निर्माण हुनुपर्ने सम्बन्ध पूर्ण रूपमा कमजोर बन्दै गएको छ। जब खेलाडीहरूले आफ्नै संघमाथि भरोसा गर्न सक्दैनन्, तब खेलको दीर्घकालीन विकास कसरी सम्भव हुन्छ?
हामी स्पष्ट रूपमा भन्न चाहन्छौं कि वर्तमान नेतृत्वले आफ्नो नैतिक, संस्थागत तथा खेलप्रतिको जिम्मेवारी पूरा गर्न असफल भएको देखिन्छ। त्यसैले नेपाल साइक्लिङ संघको वर्तमान कार्यसमिति विघटन गरी नयाँ, पारदर्शी, उत्तरदायी र खेलाडी–केन्द्रित नेतृत्व गठन गर्न आवश्यक भएको हाम्रो ठहर छ।
यदि वर्तमान पदाधिकारीहरू साँच्चै साइक्लिङ खेल र खेलाडीहरूको हितप्रति प्रतिबद्ध हुनुहुन्छ भने तत्काल आफ्नो कार्यसम्पादनको सार्वजनिक समीक्षा प्रस्तुत गर्नुहोस्। अन्यथा नैतिक जिम्मेवारी स्वीकार गर्दै पदबाट राजीनामा दिनु नै उचित हुनेछ।
अब नेपाली साइक्लिङ समुदाय मौन बस्ने अवस्थामा छैन। खेलाडी, प्रशिक्षक, प्राविधिक, क्लब तथा साइक्लिङप्रेमीहरू आफ्नो हक, अधिकार र खेलको भविष्यको रक्षा गर्न संगठित रूपमा आवाज उठाउन बाध्य हुनेछन्।
हाम्रो माग कुनै व्यक्ति विशेषविरुद्ध होइन; यो पारदर्शी, जवाफदेही, निष्पक्ष र खेलाडी–मैत्री साइक्लिङ प्रशासनको पक्षमा उठाइएको आवाज हो।
अतः वर्तमान नेतृत्वलाई स्पष्ट रूपमा आग्रह गर्दछौं—खेलाडीहरूको विश्वास गुमाइसकेको अवस्थामा या त आफ्नो जिम्मेवारी पारदर्शी रूपमा निर्वाह गर्नुहोस्, या सम्मानजनक रूपमा पदत्याग गरी नयाँ नेतृत्वलाई अवसर प्रदान गर्नुहोस्।
