08/03/2026
हरेक वर्ष मार्च ८ मा अन्तर्राष्ट्रिय महिला दिवस मनाइन्छ। यस वर्षको मुख्य नारा “सबै महिला र बालिकाहरूका लागि अधिकार, न्याय र अवसर” रहेको छ। यो दिन महिला तथा ट्रान्स महिलाहरूको अधिकार, समानता र सम्मानका लागि गरिएको संघर्षको सम्झना गर्दै मनाइन्छ। यस अवसरमा समाजका सबै महिला तथा ट्रान्स महिलाहरूको अधिकार र सम्मान सुनिश्चित गर्नु अत्यन्त महत्वपूर्ण विषय हो। मुख्यतः ट्रान्स महिलाहरू हाम्रो समाजको महत्वपूर्ण हिस्सा हुन्। तर धेरै ठाउँमा उनीहरूले भेदभाव, हिंसा र अवसरको अभावजस्ता समस्याहरू भोगिरहेका छन्। शिक्षा, स्वास्थ्य सेवा, रोजगारी तथा सामाजिक स्वीकार्यतामा उनीहरू अझै पनि पछाडि पारिएका छन्। यसले उनीहरूको जीवनस्तरमा नकारात्मक असर पारिरहेको छ। ट्रान्स महिलाहरूको अधिकार सुनिश्चित गर्न राज्य, समाज र हरेक नागरिकले सकारात्मक सोच र व्यवहार अपनाउन आवश्यक छ। सरकारले समान अधिकार दिने कानुनको प्रभावकारी कार्यान्वयन गर्नुपर्छ। साथै शिक्षा र सचेतनाको माध्यमबाट समाजमा रहेका गलत धारणा हटाउन पनि जरुरी छ। नारी दिवसले हामीलाई सबै प्रकारका महिलाहरूको सम्मान, समानता र अधिकारको पक्षमा उभिन प्रेरणा दिन्छ। त्यसैले ट्रान्स महिलाहरूलाई पनि समान अवसर, सम्मान र सुरक्षित वातावरण उपलब्ध गराउनु नै वास्तविक समानताको आधार हो। जब समाजले सबैलाई समान रूपमा स्वीकार गर्छ, तब मात्र न्यायपूर्ण र समावेशी समाजको निर्माण सम्भव हुन्छ।हामीलाई आशा छ कि अहिले जसरी देश परिवर्तनतर्फ अग्रसर भइरहेको छ, त्यसरी नै सबै प्रकारका महिलाहरूको अधिकार पनि सुनिश्चित हुनेछ।
