09/08/2026
खेलकुद, पर्यटन र स्थानीय विकासको नयाँ यात्रा: फिक्कल रमितेमा ११-ए-साइड (11-a-side) फुटबल ग्राउन्ड निर्माणको कार्य तीव्र
सूर्योदय नगरपालिकाको केन्द्र फिक्कलबाट करिब २ कि.मी. को दूरीमा रहेको फिक्कल रमितेमा United Fikkal Club (UFC) ले ११-ए-साइड फुटबल ग्राउन्ड निर्माणका लागि १९ रोपनी जग्गा खरिद गरिसकेको सहर्ष जानकारी गराउँदछौं ।
यो ड्रिम प्रोजेक्टलाई साकार पार्न आ.व. २०८२/८३ मा कोशी प्रदेश सरकारबाट रु. १० लाख र सूर्योदय नगरपालिकाबाट रु. १० लाख बजेट विनियोजन भई निर्माणको प्रक्रिया अघि बढ्ने क्रममा रहेको छ ।
फुटबल ग्राउन्डको भौतिक संरचना कस्तो हुने र कसरी निर्माण गर्ने भन्ने DPR (Detailed Project Report) तयार गर्नका लागि झापाबाट आउनुभएका प्राविधिक टोलीद्वारा मिति २०८३/०५/२३ गते शनिवारका दिन सर्भे कार्य सफलताका साथ सम्पन्न भएको छ । सर्भेको कामपश्चात् Design र Estimate को कार्य सम्पन्न गरी शीघ्र निर्माण कार्य अगाडि बढाइनेछ।
यो खेलमैदान निर्माण भएसँगै स्थानीय तथा क्षेत्रीय स्तरमा खेलकुदको प्रवर्द्धन र प्रतिभा पहिचानमा ठूलो टेवा पुग्नेछ । सूर्योदय नगरपालिकाको मुटु फिक्कल नजिकै बन्ने यस खेल मैदानले खेल पर्यटन (Sports Tourism) को विकासमा महत्वपूर्ण भूमिका खेल्नेछ भने फिक्कल बजार नजिकै रहेकाले भविष्यमा आइपर्ने विपद् वा आपतकालीन समयमा यो स्थान खुला र सुरक्षित आश्रयस्थलका रूपमा समेत प्रयोग गर्न सकिनेछ ।
UFC को यो सपनालाई साकार पार्न अभिभावकत्व र सकारात्मक भूमिका निर्वाह गर्नुहुने कोशी प्रदेश सरकार, सूर्योदय नगरपालिकाका सम्पूर्ण जनप्रतिनिधिज्यूहरू, परिवारजन, क्लबलाई सधैँ असल मार्गनिर्देशन दिनुहुने अग्रज दाजुहरू, क्लबका संरक्षक तथा वडा नं १० का अध्यक्षज्यू तथा क्लबलाई माया गर्नुहुने सम्पूर्ण शुभेक्षकज्यूहरू प्रति United Fikkal Club सदैव आभारी रहनेछ । आगामी दिनहरूमा पनि यहाँहरू सबैको निरन्तर साथ, सहयोग र मार्गदर्शनको अपेक्षा गर्दछौं।
