12/08/2025
...thanking everyone for their coordination and cooperation...
अनिल सिंहको तर्फबाट आधिकारिक वक्तव्य
केही समयदेखि म र म्युजिक डट कमबीच रहँदै आएको गीतसम्बन्धी विवाद अब आपसी समझदारी र पारस्परिक सम्मानका साथ पूर्ण रूपमा समाधानमा पुगेको छ।
यो केवल विवादको अन्त्य मात्र होइन, एक सकारात्मक सुरुवात हो — जहाँ भावना, सम्मान र संगीतको मर्म जितेर अगाडि बढेका छौं।
यस सहमति अनुसार, म्युजिक नेपालको भूमिका यो विषयमा कुनै पक्ष होइन, उनीहरू केवल वितरणकर्ताको (Distributor) भूमिकामा मात्र रहनेछन्।
यस ऐतिहासिक सहमति सम्भव बनाउन विशेष पहल र योगदान गर्नु हुने निर्णय एनएसके (Nirnaya NSK) – उपाध्यक्ष, परफॉर्मर सोसाइटी नेपाल (Performer’s Society Nepal) लाई म हृदयदेखि धन्यवाद दिन चाहन्छु। उहाँको सक्रिय मध्यस्थता, नेतृत्व र निष्पक्ष दृष्टिकोण बिना यो समाधान सम्भव हुने थिएन।
म यो अवसरमा म्युजिक डट कमलाई पनि धन्यवाद दिन चाहन्छु, जसले सहमतिमा पुग्न सहकार्य र समझदारी देखाएको छ। साथै, म्युजिक नेपाललाई पनि आफ्नो प्राविधिक भूमिकामा सीमित रहेर निष्पक्ष भूमिका निर्वाह गरेकोमा कृतज्ञता प्रकट गर्दछु।
अहिले म तपाईंहरू सबैसँग खुलेर भन्न चाहन्छु—यो विवादका दौरान मैले अत्यन्तै भावुक अवस्थामा केही अभिव्यक्तिहरू गरेँ, जसमा आत्महत्या गर्नेसम्मको कुरा उठेको थियो। त्यो मेरो मानसिक तनाव, पीडा र निराशाको क्षणिक अभिव्यक्ति थियो। म यस्ता अभिव्यक्तिका लागि मेरो सम्पूर्ण दर्शक, स्रोता र शुभचिन्तकमाझ गहिरो माफी माग्दछु।
अब यो विषय समाधानमा पुगेको सन्दर्भमा, म मेरा सबै विवादास्पद अभिव्यक्ति र भिडियोहरू हटाउँदैछु।
यो यात्रामा मलाई साथ दिने सम्पूर्ण नेपाली दाजुभाइ, दिदीबहिनीहरू र मेरो संगीतलाई माया गर्ने फ्यानहरूलाई म दिलदेखि धन्यवाद दिन चाहन्छु। तपाईंहरूको समर्थनले नै मलाई आत्मबल र सिर्जनाको नयाँ प्रेरणा दिएको छ।
श्रोतामाझ पुग्ने मेरो गीत, मेरो आवाज, र मेरो भावना सधैं तपाईंहरुकै लागि समर्पित रहन्छ।
संगीत मेरा लागि केवल पेशा होइन — यो मेरो आत्मा हो, जुन अझ शुद्ध रूपमा तपाईंहरुसामु ल्याउने प्रण म दोहोर्याउँछु।
धन्यवाद।
— अनिल सिंह
