17/02/2026
Trök in de tied deze vastelaovesdinsdaag!
Ouch in ’n neet-jubeleijemjaor kinne veer trök in de tied gaon bie D’n Uul. Want óndanks det veer zo’n jónk Prinselik Gezelsjap höbbe, óntbrik ’t häör neet op ervaring op det vlak. Twelf jaor geleje, in 2013, waas oze Sjtadsprins Jules I jeugprinsadjudant van ziene boezemvrundj Damiaan I Bertrams. Same mit Herm I Belgers en zien adjudante hadde zie ’n te gek sezoen. De bandj mit ’t grote gezelsjap waas häör heilig. Ein jaor later, in ‘t 7x11 jubeleijemsezoen van D’n Uul kós Rutger al preuve van zien ról es adjudant van de jeugprins. Sem I van Atteveld ging de Uulkes en Uulinnekes veur en Rutger waas ein van de men die ‘m de vót naodroog. Rutger ziene pap Roger I Geurtz waas in det sezoen de jubeleijemsjtadsprins en haet d’r dit jaor es lid van de PKBK d’r mede veur gezórg det drie van de veer leje oet de Jeugprinselike Gezelsjappe van 2013 en 2014, noe SAME ’t grote Prinselik Gezelsjap vorme! Luca, de ajere broor van Jules, maak ’t gezelsjap kómpleet. Hae kint D’n Uul ouch al lank, want hae acteerde in de (toen nog) Kienjermiddaag. En det is zien jóngere breurke ouch neet vraemp; ouch Jules sjpeelde zelfs al ‘ne keer es prinske mit. Es det ‘ne jóngesdruim waas, den is dae noe oetgekómme!
