02/09/2026
Marigayi Mallam Bello Muhammad Sharada : Ingantaccen Misali Abun Kwaikwayo a Wajen Matasan Wannan Zamanin.
Daga Dr Umar Musa Mustapha,
DG na H.E Senator Mallam Ibrahim Shekarau Kuma Shugaban Majalisar Shekarau Shura ta jihar kano.
Tare da cikakkiyar sallamawa ga ikon Allah, muke bayyana alhinin mu na rashin Mallam Bello Muhammad Sharada wanda Allah ta'ala ya amshi rayuwarsa a yammacin ranar Asabar, 29 ga watan Agusta ta shekarar 2026, bayan yar gajeriyar rashin lafiya. Ya rasu yana da shekaru 56. An gabatar da sallar jana'izarsa a safiyar ranar Lahadi, 30 ga watan Agusta ta shekarar 2026 da misalin karfe 8:00 na safe a babban masallacin juma'a na unguwar Sharada. An binne gawar Mallam Bello a makabartar Musulmi ta Fadama dake unguwar Sharada. Dandazon al'ummar da s**ai masa Sallah kuma s**ayi masa rakiya zuwa makwancinsa na karshe shaidace ta irin kyakkyawar rayuwar da ya gabatar a tsakanin al'umma.
Marigayi Mallam Bello Sharada cikakken magidanci ne, duk da bai kasance mai tarin dukiya ba, amma ya rayu da kana'a da kuma wadatar zuciya. A wasu lokutan da kaina na sha bashi hayar gona wadda yake noma abinci domin ciyar da iyalansa. Wannan shaidace mai kyau domin tana bayyana mamacin a wanda ya rayu a matsayin cikakken dan gwagwarmaya, sannan kuma hakan shaida ce akan Mallam Bello ya rayu a matsayin mutum mai cikakken dogaro ga Allah (Tawakkali).
Ya kasance malamin addini mai basira, malamin da koyarwarsa bata gajiyarwa, sannan cikkakken dan Da'awah ne a kungiyoyi mabanbanta. Yana da hakuri sosai. Sannan Allah ya bashi saukin fahimtar al'amura. Mutane da yawa na zuwa gareshi domin neman shawara.
A bangaren aikin yada labarai kuwa ya ciri tura. Mallam Bello yayi aiki a matsayin Babban Edita a jaridar Tajdid da sauran kafefen yada labarai. Ya kasance yana gudanar da shirye shiryen Fashin baki da wayar da kan al'umma a gidajen rediyoyi da dama a jihar Kano. Bayanan sa cike suke da tarin hujjoji masu tsananin ilimantarwa da kuma gamsarwa ga duk wani mai sauraronsa.
