Afar Development Association

29/09/2026

የኢትዮጵያ ኢንቨስትመንት ሆልዲንግ (Ethiopia Investment Holdings) ከአፋር ልማት ማህበር (AfDA) ጋር በጋራ በመሆን በገቢ ረሱ ዞን የቋሚ ተክል እርሻ ልማት ለማካሄድ ስምምነት ላይ ደርሰዋል።

በዚህ መሠረት ከኢትዮጵያ ኢንቨስትመንት ሆልዲንግ የተላኩ ልዑካን ከአፋር ልማት ማህበር የገቢ ረሱ ዞን ቅርንጫፍ ጽ/ቤት አስተባባሪ ከአቶ መሀመድ አሊ ጋር በመገናኘት ለእርሻ ልማቱ ተስማሚ የሆነ የመሬት ስፍራ መረጣ አካሂደዋል።

ይህ የጋራ ትብብር የአፋር ክልልን የእርሻ ልማት ለማስፋፋት፣ የተፈጥሮ ሀብትን በአግባቡ ለመጠቀም፣ ምርታማነትን ለማሳደግ እና ለአካባቢው ማህበረሰብ የሥራና የገቢ ዕድል ለመፍጠር ጉልህ ሚና ይኖረዋል።

21/09/2026

የA’ago Project በአፋር ክልል የእርሻ ልማት ስኬት

የA’ago Project በአፋር ክልል ወጣቶችን በማማከል በሚያከናውናቸው የግብርና ልማት ተግባራት አበረታች ውጤቶችን እያስመዘገበ ይገኛል።

በዱብቲ ወረዳ በአይሮለፋ ቀበሌ፣ የአፋር ልማት ማህበር (AfDA) ከMastercard Foundation እና ከዋኪሊሳ የልማት ማህበር (WDA) ጋር በመተባበር በአስር ሄክታር መሬት ላይ የሰሊጥ ምርት በስኬት አከናውኗል።
ይህ ተግባር የግብርና ምርታማነትን ከማሳደግ ባሻገር፣ ኢኮኖሚያቸውን እንዲያሳድጉ ዕድል ያጡ ወጣቶች የኑሮ ሁኔታን እንዲያሻሽሉ እና የሥራና የገቢ ዕድሎችን እንዲያገኙ ትልቅ አስተዋፅኦ አድርጓል።

11/09/2026

የአፋር ልማት ማህበር የ2018 ዓ.ም ያከናወናቸው ዋና ዋና የልማት ስራዎች...

የአፋር ልማት ማህበር (AfDA) በ2018 ዓ.ም. ከህዝብ እና ከተለያዩ አጋር አካላት ለልማት የሰበሰበውን ሀብት በአግባቡ በመጠቀም በትምህርት፣ በውሃ፣ በሰብዓዊ ድጋፍ፣ በግብርና እና በተቋማዊ ልማት ዘርፎች በርካታ የልማት ስራዎችን አከናውኗል።

ከእነዚህም ዋና ዋናዎቹ፦

1. የትምህርትና የንጽህና መሠረተ ልማት
11 የመማሪያ ክፍሎች፣ 4 ዘመናዊ የመጸዳጃ ቤት ብሎኮች እና 4 የውሃ ታንከሮችን በመገንባት ከ600 በላይ ተማሪዎች ተጠቃሚ እንዲሆኑ አድርጓል።

2. ለወጣቶች የስራ እድል ፈጠራ
1,990 ወጣቶችን በእንስሳት ማደለብ እና በእርሻ ሰብል ልማት ዘርፎች በማሳተፍ የስራ እድል ፈጥሯል።

3. የትምህርት ቤቶች ድጋፍ – አውራ ወረዳ
በአውራ ወረዳ ለተገነቡ አንድ አንደኛ ደረጃ ትምህርት ቤት እና አንድ ሁለተኛ ደረጃ (ሃይስኩል) ትምህርት ቤት 17,000,000 (አስራ ሰባት ሚሊዮን) ብር ድጋፍ አድርጓል።

4. የውሃ ማቆሪያ ኩሬዎች ግንባታ
በገረኒ እና በአቢዳ ወረዳዎች ሰፋፊ የውሃ ማቆሪያ ኩሬዎችን በመገንባት ለአካባቢው ማህበረሰብና ለእንስሳት የውሃ ተደራሽነትን ለማሻሻል አስተዋጽኦ አድርጓል።

5. ለጎርፍ አደጋ ሰብዓዊ ድጋፍ
በዱለሳ እና በአዋሽ ፈንታሌ ወረዳዎች በደረሰው የጎርፍ አደጋ ለተጎዱ ወገኖች 2,000,000 (ሁለት ሚሊዮን) ብር የሰብዓዊ ድጋፍ አድርጓል።

6. የቤተ-መጻሕፍት ግንባታ – ሎጊያ አንደኛ ደረጃ ት/ቤት
በሎጊያ አንደኛ ደረጃ ት/ቤት የቤተ-መጻሕፍት ህንፃ በመገንባት ተማሪዎች የተለያዩ የትምህርት ምንጮችን በቀላሉ እንዲያገኙና የተሻለ የመማሪያ አካባቢ እንዲኖራቸው አስተዋጽኦ አድርጓል።

7. የግብርና ልማት – ዱብቲ ወረዳ
በዱብቲ ወረዳ በ50 ሄክታር መሬት ላይ የሰሊጥና የማሾ ሰብል ልማት በማከናወን አመርቂ ምርት አግኝቷል። ይህም በተቋሙ የግብርና ልማት ዘርፍ አዲስ መነቃቃትን ፈጥሯል።

8. ለሰመራ ኮሪደር ልማት ድጋፍ
ለሰመራ ኮሪደር ልማት 1,000,000 (አንድ ሚሊዮን) ብር ድጋፍ አድርጓል።

9. በሒጅራ ባንክ ኢንቨስትመንት
ከሒጅራ ባንክ 5,000,000 (አምስት ሚሊዮን) ብር የሚያወጣ ሼር በመግዛት በፋይናንስ ዘርፍ ኢንቨስትመንት አድርጓል።

10. የAfDA G+3 ህንፃ ግንባታ
የአፋር ልማት ማህበር የG+3 ህንፃ ግንባታውን ከ90% በላይ አጠናቋል። ይህ ግንባታ የማህበሩን ተቋማዊ አቅም፣ የቢሮ አገልግሎት መሠረተ ልማትና የረጅም ጊዜ የገንዘብ ዘላቂነት ለማጠናከር ከፍተኛ ኢንቨስትመንት ነው።

11/09/2026

እንኳን ለ2019 ዓ.ም. አዲስ ዓመት በሰላም፣ በጤናና በደስታ አደረሳችሁ!

ውድ የአፋር ህዝብ፣ የኢትዮጵያ ህዝቦች እና በዓለም የምትገኙ የአፋር ልማት አጋሮቻችን

አዲስ ዓመት የአዲስ ተስፋ፣ የአዲስ ጉልበትና የአዲስ ዕድል መጀመሪያ ነው። ያለፈውን ዓመት በልምድ ተምረን፣ ያለንን አቅም በማጠናከርና በአንድነት በመቆም አዲሱን ዓመት የበለጠ ሰላም፣ ልማትና ብልፅግና የምናስመዘግብበት ዓመት እናድርገው።

በተለይም ወጣቶቻችንን በትምህርትና በስራ ዕድል ማብቃት፣ የሴቶችን ተሳትፎ ማጠናከር፣ የማህበረሰባችንን ኢኮኖሚያዊ አቅም ማሳደግና ዘላቂ ልማትን ማረጋገጥ የጋራ ኃላፊነታችን ነው።

አፋር ልማት ማህበር በአዲሱ ዓመትም ከማህበረሰባችን፣ ከመንግስትና ከልማት አጋሮች ጋር በመተባበር የህዝባችንን ህይወት ለማሻሻል በቁርጠኝነት ይሰራል።

አዲሱ ዓመት ለእያንዳንዳችሁ የሰላም፣ የጤና፣ የስኬትና የበረከት ይሁን። ለኢትዮጵያችንም ሰላም፣ አንድነትና ዘላቂ ልማት የሚያመጣ ዓመት ይሁን!

እንኳን አደረሳችሁ! መልካም አዲስ ዓመት!

ዶ/ር ኮንቴ ሙሳ
የአፋር ልማት ማህበር ዋና ስራ አስኪያጅ

31/08/2026

30/08/2026

የአፋር ልማት ማህበር በገቢ ረሱ ዞን ዱለሳ እና አዋሽ ፈንታሌ ወረዳዎች በጎርፍ ለተጎዱ ወገኖች ድጋፍ አደረገ

የአፋር ልማት ማህበር (AfDA) በገቢ ረሱ ዞን ዱለሳ እና አዋሸ ፈንታሌ ወረዳዎች የቀበና ወንዝ በመሙላቱ ምክንያት በሁለት ወረዳዎች ላይ በደረሰው የጎርፍ አደጋ ከመኖሪያ ቀያቸው ለተፈናቀሉ ወገኖች የ2,000,000 (ሁለት ሚሊዮን) ብር ድጋፍ አደረገ።

ድጋፉ በጎርፍ አደጋው ምክንያት ከቀያቸው ለተፈናቀሉ ወገኖች በወቅታዊ ሁኔታ የሚያስፈልጉ የእርዳታ አቅርቦቶችን ለማሟላት የሚያግዝ ነው።

በድጋፍ መርሃ ግብሩ ላይ የገቢ ረሱ ዞን አስተዳደር አቶ ሁሴን መሐመድ ጉረታ እና የአፋር ልማት ማህበር ም/ሥራ አስኪያጅ አቶ ካሚል ሁመድ ተገኝተው ድጋፉን አስረክበዋል።

የአፋር ልማት ማህበር በችግር ጊዜ ከማህበረሰቡ ጎን በመቆም፣ የተጎዱ ወገኖችን በመደገፍ እና የማህበረሰብ ተጋላጭነትን በመቀነስ የሚያደርገውን ሥራ ያጠናክራል።

አፋር ልማት ማህበር — ከማህበረሰቡ ጎን ሁሌም ይቆማል! 🤝

06/08/2026

በአሳይታና ዱብቲ ወረዳዎች ፕሮጀክቱን ለሚተገብሩ 6 አጋር ድርጅቶች ባለሙያዎች የቴክኒክ ክህሎት ስልጠና ተሰጠ
የአፋር ልማት ማህበር (አፋልማ) ከማስተርካርድ ፋውንዴሽን እና ከአጋር ድርጅቶቹ ጋር በመተባበር ለ3,500 ወጣቶች ዘላቂና ክብር ያለው የሥራ ዕድል ለመፍጠር የአጎ ፕሮጀክትን በአሳይታና ዱብቲ ወረዳዎች በመተግበር ላይ ይገኛል። ፕሮጀክቱ ለወጣቶች የክህሎት ስልጠና፣ የፋይናንስ ተደራሽነት (በዓይነት የግብዓ) ድጋፍ በመስጠት ከጥገኝነት ተላቀው ራሳቸውን የሚችሉና ዘላቂ የኑሮ መሠረት እንድኖራቸዉ እየሰራ ይገኛል።
በፕሮጀክቱ ድጋፍ ወጣቶች በኢንተርፕራይዞች ተደራጅተው በአግሪ-ቢዝነስ ዘርፍ፣ ማለትም በሰብል ምርት፣ በፍየል ማደለብ እና በእንስሳት መኖ ማምረትና አቅርቦት ተሰማርተው ይገኛሉ።
ይህንን በማስፋፋት የፕሮጀክቱን ጥራትና ውጤታማነት ለማጠናከር፣ በአሳይታና ዱብቲ ወረዳዎች ፕሮጀክቱን ለሚያስፈጽሙ 6 አጋር ድርጅቶች ባለሙያዎች በሰብል ምርት፤ በእንሰሳት (ፍየል) ማድለብ እና በእንሰሳት መኖ ማምረትና አቅርቦት የቴክኒክ ክህሎት ስልጠና በሰመራ ሩፍታና ሆቴል ተሰጥቷል። ስልጠናውም በዘርፉ በቂ ዕውቀትና ልምድ ባላቸው ከአፋር ክልል ግብርናና ተፈጥሮ ሀብት ቢሮ እንዲሁም ከእንስሳትና ዓሣ ሀብት ልማት ቢሮ በተመረጡ ባለሙያዎች ተሰጥቷል።
በስልጠናው የተሳተፉ ባለሙያዎችም ያገኙትን ዕውቀትና ክህሎት በኢንተርፕራይዝ ለተደራጁ ወጣቶች በማስተላለፍ ተመሳሳይ የቴክኒክ ስልጠና እንደሚሰጡ አቅጣጫ ተቀምጧል። ይህም የወጣቶችን አቅም በማጎልበት የፕሮጀክቱን ውጤት በዘላቂነት ለማረጋገጥ አስተዋጽኦ ያደርጋል።

05/08/2026

እንኳን ደስ አለን! 🎉
የአፋር ልማት ማህበር (AfDA) በአፋር ክልል ያከናወነውን የልማትና የሰብአዊ ድጋፍ ሥራ፣ ቁርጠኝነትና ተፅዕኖ በማድነቅ ከአፋር ብሔራዊ ክልላዊ መንግሥት ፋይናንስ ቢሮ የእውቅና ሰርቲፊኬት ተበርክቶልናል።
ይህ እውቅና ለተቋማችን ብቻ ሳይሆን ከእኛ ጎን ለቆሙ አጋሮቻችን፣ ደጋፊዎቻችን፣ ሠራተኞቻችን እና የአፋር ህዝብ የጋራ ስኬት ነው።