Xagħra Għan-Nies

03/10/2025

Fi ħsibijietna għall-fejqan ta’ malajr u grazzi ta’ ħidmietkom.

Heritage Malta

02/10/2025

Tgħid wasal iż-żmien biex inħarsu b’iktar reqqa wieħed mill-eqdem binjiet fid-dinja, li jinsab fil-qalba ta’ raħalna?

L-investiment li sar xi żmien ilu huwa pass tajjeb ħafna, pero hemm bżonn iktar, bħal tinda li tipproteġi kontra l-elementi.

Ġgantija Archaeological Park World Heritage Site | Heritage Malta | Xagħra Local Council

21/09/2025

Fejn hemm bżonn li nfaħħru, infaħħru.

Il-Gvern iddeċieda li jillimita t-tipjip f’Golden Bay u fil-bajja tant għal qalbna x-Xagħrin, ir-Ramla l-Ħamra. Dan sar anke wara proposti mtellqa minn diversi amministrazzjonijiet lokali preżenti u passati, u minn hawn nirringrazzjawhom kollha.

Nemmnu li din id-deċiżjoni saret biex nipproteġu kemm l-ambjent u kemm s-saħħa pubblika. Dan juri kif miżuri ġodda, anke jekk jaffettwawna direttament xi ftit fil-bidu, jistgħu jwasslu għall-benefiċċji kollettivi ikbar fil-futur.

Spiss biex niksbu titjib fil-komunità neħtieġu sagrifiċċji żgħar. U din nifmuha.

Għalhekk aħna qed naħdmu biex nagħmlu l-Pjazza tagħna żona mingħajr karozzi b’mod permanenti. Spazju aktar sigur, nadif u pjaċevoli għax-Xagħrin, għar-residenti u għat-turisti, mill-ikbar sal-iżgħar.

Li nagħmlu l-pjazza ħielsa mill-karozzi b’mod permanenti m’huwiex biss suġġett ta’ traffiku jew konvenjenza. Huwa investiment fil-kwalità tal-ħajja tagħna, ambjent eħfef u spazju pubbliku sigur fejn nistgħu niltaqgħu, nieħdu nifs u mhux ngħixu fil-ġenn tal-karozzi, għaddejjin u pparkjati.

Those found smoking outside the designated areas will be fined €150.

16/09/2025

Kif kullħadd jaf, il-Pjazza tax-Xagħra hija l-qalba ta’ raħalna u xhieda tal-identità kulturali, storika u soċjali tagħna.

Fl-2016 sar proġett importanti ħafna tat-tibdil tal-wiċċ ta’ din il-Pjazza li kellu jinkludi wkoll it-tneħħija tal-wajers kollha mwaħħlin mal-bini, li ovvjament itappnu s-sbuħija tal-ambjent.

Sfortunatament, għaddew is-snin u din il-parti tal-proġett għada ma ġietx implimentata.

Illum il-ġurnata, ir-residenti u l-viżitaturi għadhom jaraw infrastruttura elettrika antika b’ħafna wajers mdendlin li, ejja tal-inqas ngħidu, m’humiex l-isbaħ veduta fid-dinja. Anke minkejja sistema ta’ culverts li hemm mgħoddija diġa.

Din is-sitwazzjoni ma naħsbux li hija aċċettabbli u nixtiequ nsaqsu għaliex il-wajers ma tneħħewx u għalfejn ma ġietx installata sistema ta’ dawl moderna (idealment minn taħt l-art) li propju issebbaħ iktar l-ambjent li tant jiġi frekwentat mir-residenti u minn eluf ta’ turisti kull sena.

Jekk hemm xi diffikultajiet tekniċi jew amministrattivi, huwa d-dritt tar-residenti li jiġu infurmati għalfejn dan baqa’ ma sarx.

03/09/2025

Il-ħolma.

Diffiċli? Ħafna.

Impossibli? Le.

03/09/2025

X’inhi mistoqsija mingħajr tweġiba jew soluzzjoni?

Kemm il-darba aħna stess ngergru bis-sitwazzjoni preżenti u meta jiġi l-Pulizija jgħidilna biex nħarrku l-karozza għax qiegħda ħażin jew ma ngħatux kas jew mmorru nħarrku b’nofs qalb.

Minn hawn nsellmu lill-Forzi tal-Ordni stazzjonati x-Xagħra, preżenti u passati, li dejjem pruvaw jaraw li ma jkunx hemm wisq ostakli fil-pjazza tagħna u li jkollhom jaffaċjaw il-pubbliku li mhux dejjem ikun lest li jikkopera.

Pero’ wasal iż-żmien għall-azzjoni iktar konkreta.

Il-qalba tar-raħal tagħna għandha tkun spazju sigur, sabiħ u miftuħ għall-komunità – mhux għat-traffiku.

Biex il-Pjazza tax-Xagħra terġa’ ssir propjetà tan-nies u mhux tal-karozzi qed nippreżentaw xi soluzzjonijiet:

1) Għeluq parzjali u gradwali tal-pjazza għal ċerti ħinijiet kuljum jew xi ġranet fil-ġimgħa, bħal filgħaxijiet, biex kulħadd jibda jħoss iktar il-benefiċċji tal-ispazju mingħajr karozzi.

2) Parkeġġ organizzat u aċċessibli barra jew qrib iċ-ċentru.

3) Sinjaletika ċara - biex kulħadd jifhem fejn tista’ tippakkja u fejn le.

4) Konsultazzjoni mal-komunità u mal-kummerċjanti - biex kulħadd ikun parti mis-soluzzjoni.

5) Aktar attivitajiet fil-pjazza bħal suq lokali, wirjiet u spazji għat-tfal biex tiġi promossa bħala ċentru ta’ ħajja soċjali.

6) Sistemi teknoloġiċi ta’ moniteraġġ u kontrolli addatti speċifikament għall-karozzi.

Jekk tassew inħobbu lix-Xagħra, ejjew nieħdu azzjoni issa, mhux għada. Il-pjazza hija tagħna lkoll. Ejja nirrispettawha.

02/09/2025

Hemm lok li l-Pjazza tagħna tingħalaq għall-karozzi?

Il-Pjazza tax-Xagħra.

L-ikbar. L-isbaħ. L-iktar pjazza ikonika.

Bla dubju l-qalba tal-istorja u tal-kultura f’din il-gżira. Il-maġġoranza tat-turisti jgħaddu minnha, l-emigranti jħobbuha wisq. U għalina x-Xagħrin, ġawhra.

Iżda llum żgur li s-sitwazzjoni m'għadhiex sostenibbli. Il-kwantità ta' karozzi li jgħaddu minn din il-pjazza ta’ kuljum qabeż kull limitu aċċettabbli u l-parkeġġ bl-amment mingħajr l-ebda sorveljanza qiegħed jipperikola l-iktar għan fundamentali li pjazza għandha sservi. Dik li nies ta’ kull eta’, mill-ikbar sal-iżgħar, familji bit-tfal, negozji u iktar jiġu sabiex jissoċjalizzaw bla ebda ħsieb ieħor.

F’ambjent sigur, kalm u li jgħati nifs.

Kemm tgħaddi s’hawn is-Sibt filgħodu u tara b’għajnejk. Is-sitwazzjoni attwali hija stressanti, mhux biss għall-anzjani, imma għall-ħaddiema, negozji, u l-familji. In-norma hi n-nuqqas ta' dixxiplina fil-parkeġġ, u l-infurzar mhux ikollu l-effett dovut.

Nifmhu li hemm bżonn pjan, rotot alternattivi, post ta’ parkeġġ kbir fil-qrib u iktar informazzjoni aċċessibbli għal kullħadd.

Ilu kienet tingħalaq regolarment. Issa rarament.

Kull ma qed nagħmlu hu li nsaqsu mistoqsija:

Għandna dritt għal-spazju miftuħ, ħieles mill-karozzi fil-qalba tar-raħal tant sabiħ tagħna?

Jekk le, nifmhu. Jekk iva, hemm bżonn issir xi haġa issa.