14/03/2026
Сэтгүүлийн шинэ дугаарын зочин
Охидын хөгжлийн төв-ийн тэргүүн Г.Болормаа:
“Өсвөр насанд зөв мэдээлэл, зөв чиглэл хамгийн чухал”
- Охид ээж, аав, багш болон эргэн тойрныхоо хүмүүсээс олон зүйлийг суралцдаг. Гэвч тэдний амьдралын хамгийн эмзэг, хамгийн чухал үе болох өсвөр насанд хэрэгтэй зөвлөгөө, чиглэл өгөх хүн цөөн байдаг. Иймээс өсвөр насныхан ихэвчлэн өөртэйгөө ижил насны найз нөхдөөсөө зөвлөгөө авч, цахим орчноос шүүлтүүргүй, буруу мэдээлэл авах нь цөөнгүй тохиолддог.
Саяхан сурагч охид бие биенээ дээрлэхсэн бичлэг цахим орчинд тархсан нь олон нийтийн анхаарлыг татсан. Гэвч энэ бол өнөөдөр гэнэт гарч ирсэн асуудал биш, урьд өмнө ч байсаар ирсэн зүйл юм. Ийм нөхцөлд зөвхөн буруутгаж, яллахын оронд яагаад ийм үйлдэл буруу вэ, буруу зүйл хйиснээр бусдын сэтгэлийг өвтгөдөг, яагаад эдгээр мэдрэмжийг мэдэхгүй хүүхдүүд нийгэмд бий болоод байна вэ гэдгийг ойлгох, ойлгуулах нь илүү чухал. Хэн ч шүүмжилж чадна, харин зөв ойлголт, зөв хандлагыг төлөвшүүлэх нь илүү үнэ цэнтэй.
Томчууд бид өөрсдөө үлгэрлэж чаддаггүйгээс хүүхдүүд харсан, үзсэн зүйлээ дуурайх нь элбэг. Би өөрөө сэтгэл зүйн сургалтанд хамрагдаж байхдаа нэг чухал зүйлийг ойлгосон: хэрвээ өсвөр насандаа мэргэжлийн хүмүүсээс зөв мэдээлэл, зөв боловсрол авч чадсан бол олон буруу ойлголт, төөрөгдлөөс зайлсхийж, цаг хугацаа, боломжоо илүү зөв ашиглах байсан юм байна гэдгийг. Тэр үед л охидод зориулсан хөгжлийн төв байгуулах шийдвэрийг гаргасан.
Өсвөр нас бол маш эмзэг атлаа шинэ зүйлд сониуч, өөрийгөө танин мэдэх хүсэлтэй үе юм. Тиймээс манай төв өсвөр насныханд сургуульд тэр бүр олгодоггүй сэтгэл зүй, гоо зүй, бэлгийн боловсролын чиглэлээр мэдлэг, зөв ойлголт өгөх зорилготой ажиллаж байна.
Одоогоор бид анхны төсөл болох “Гоо зүйтэй ногоон ирээдүй” уриан дор BIPV Mongolia - "BIB Sustainable Energy Tech" компанитай хамтран охид руу чиглэсэн үйл ажиллагааг эхлүүлээд байна. Дэлхий нийт ногоон хөгжил рүү тэмүүлж буй энэ цаг үед хүүхдүүд ч мөн эх дэлхийгээ хайрлах, байгальд ээлтэй хандлагатай байх талаар илүү сонирхож байгаа нь бидэнд энэхүү ажлыг улам илүү өргөн хүрээнд хийх урам өгч байна.
Ирээдүйг бүтээх дараагийн үеийнхэнд зөв ойлголт, зөв хандлага төлөвшүүлэх нь нийгмийн хөгжилд оруулж буй хамгийн үнэ цэнтэй хөрөнгө оруулалт гэж бид итгэдэг. Тиймээс бид охидын боловсрол, төлөвшил, гоо зүйг дэмжих ажлуудаа цаашид улам өргөжүүлэн ажиллах зорилготой байна. Энэ нь ирээдүйд ээж болох эмэгтэйчүүдийг хүйс харгалзахгүйгээр тэгш эрхтэйгээр үр хүүхдүүддээ зөв үлгэр дуурайллыг өвлүүлэх чухал ач холбогдолтой эхлэл юм.
Магадгүй биднийг хараад "Хөвгүүдийн хөгжлийн төв"-ийг нэгэн зоригт хүмүүн бий болгоосой гэж хүсч байна. Хэрэв ирээдүйн чиг хандлага үзэл баримтлал дээр нэгдэж энэхүү соёл хөгжлийн асуудалд нэг хэлээр ярилцаж чадах хэн бүхэнтэй бид хамтдаа хүчээ нэгтгэж, дуу хоолой болохыг урьж байна. Мөн залуу охидоо манлайлалтай оролцохыг уриалж байна.
