27/10/2026
БАЯНХОНГОР АЙМАГТ “ХӨДӨЛМӨРЛӨХ ЭРХ БА НИЙГМИЙН ТҮНШЛЭЛ” ЗӨВЛӨГӨӨН ҮРГЭЛЖИЛЖ БАЙНА
Монголын Үйлдвэрчний эвлэлийн холбоо (МҮЭХ) ХБНГУ-ын Фридрих-Эбертийн сантай хамтран “Хөдөлмөрлөх эрх ба нийгмийн түншлэл” сэдэвт зөвлөгөөнийг Баянхонгор аймагт зохион байгуулж байна.
МҮЭХ-ны удирдлагуудын Хангайн бүсэд ажиллаж буй энэ удаагийн уулзалтад Баянхонгор аймгийн ҮЭ-ийн холбоо, Хүний эрхийн Үндэсний Комисс, Хөдөлмөр, халамжийн үйлчилгээний газар, Нийгмийн даатгалын байгууллагуудын төлөөлөл оролцож, хөдөлмөр эрхлэгчдийн өмнө тулгамдаж буй асуудал, тэдгээрийг шийдвэрлэх арга замын талаар санал солилцов.
Зөвлөгөөний гол зорилго нь **хөдөлмөр эрхлэлт, нийгмийн харилцаанд тулгамдаж буй асуудлыг шийдвэрлэх, нийгмийн түншлэлийн хамтын ажиллагааг бэхжүүлэх, Хөдөлмөр, нийгмийн түншлэлийн гурван талт 2026–2028 оны улсын хэлэлцээрийг сурталчлан, хэрэгжилтийг эрчимжүүлэхэд** чиглэв.
Мөн Хөдөлмөрчдийн өмнө тулгамдаж буй асуудалд анхаарлаа хандууллаа
Уулзалтын үеэр боловсрол, эрүүл мэнд, хөдөө аж ахуй, байгаль орчин болон төрийн үйлчилгээний салбаруудад байгуулсан хэлэлцээрүүдийн хэрэгжилтийн нөхцөл байдалтай танилцлаа.
Цалин хөлсний асуудлаар тодорхой ахиц гарч байгаа хэдий ч шийдвэрлэх шаардлагатай асуудал цөөнгүй байгааг оролцогчид онцолсон юм. Тухайлбал, төрийн захиргааны албан хаагчдын цалин хөлс, нийгмийн хамгааллыг сайжруулах, эрүүл мэндийн салбарын байгууллагуудын санхүүжилт, тогтолцоог боловсронгуй болгох шаардлагатай байгааг хөндлөө.
Мөн МҮЭХ 2025 онд хуралдсан ээлжит XXV их хурлаараа цаашдын зорилго, зорилтоо шинэчлэн тодорхойлж, 2040 он хүртэл баримтлах бодлого, үйл ажиллагааны чиглэлээ тусгасан **“Хөгжлийн хөтөлбөр”, “Алсын хараа”** хэмээх хоёр үндсэн бодлогын баримт бичгийг баталсан.
Зөвлөгөөний үеэр МҮЭХ-ны Ерөнхийлөгч Э.Тамир бодлогын баримт бичгүүдийн зорилго, хэрэгжүүлэх үйл ажиллагаа, хүрэх үр дүнг танилцуулж, үндсэн дөрвөн зорилтыг хэрэгжүүлэхэд тулгарч буй бэрхшээл, цаашид хийх ажлын талаар санал солилцлоо. Мөн бодлогын хэрэгжилтийг тогтмол үнэлж, бодит үр дүнд хүргэхийн чухлыг онцолсон юм.
Зөвлөгөөний үеэр Ерөнхийлөгч Э.Тамир Баянхонгор аймгийн ҮЭ-ийн холбооны туршлагыг онцоллоо.
Баянхонгор аймгийн ҮЭ-ийн холбоо нь үйл ажиллагааны зохион байгуулалт, чиглэл, хөдөлмөр эрхлэгчдийг төлөөлөх чадамжаараа орон нутгийн ҮЭ-ийн байгууллагуудад жишиг болж байгааг уулзалтын үеэр тэмдэглэв.
Тухайлбал, хөдөлмөрийн аюулгүй байдал, эрүүл ахуйн салбар зөвлөлийн үйл ажиллагаа тодорхой зохион байгуулалтад орж, үр дүнтэй хамтын ажиллагааны туршлагыг бий болгожээ.
Уулзалтад оролцсон хөдөлмөр эрхлэгчид МҮЭХ-ны бодлого, зорилтыг дэмжиж байгаагаа илэрхийлэхийн зэрэгцээ гарсан шийдвэрүүдийг бодит үр дүнд хүргэж, хэрэгжилтийг нь эцэслэн хангуулах шаардлагатайг онцоллоо.
МҮЭХ-ны Ерөнхийлөгч Э.Тамир хөдөлмөрчдийн санал, шаардлагыг ажил хэрэг болгох, эхлүүлсэн ажлаа үр дүнд хүргэхийн төлөө тууштай ажиллахаа илэрхийлэв. Үйлдвэрчний эвлэлийн үйл ажиллагаа, тэмцлийн үр дүн бодитоор гарч эхэлж буй энэ үед хүрсэн амжилтаа бататгаж, шийдвэр бүрийн хэрэгжилтийн төлөө үргэлжлүүлэн ажиллах нь чухал юм.
Баянхонгор аймагт болсон зөвлөгөөн нь хөдөлмөрчдийн дуу хоолойг сонсох, нийгмийн түншлэгч талуудын хамтын ажиллагааг бэхжүүлэх, хөдөлмөрлөх эрхийг хамгаалах чиглэлээр бодит үр дүнд хүрэхэд чиглэсэн үр өгөөжтэй уулзалт боллоо.
Хөдөлмөрчдийн эрх ашгийг хамгаалж, гарсан шийдвэр бүрийг бодит үр дүнд хүргэхийн төлөө хамтдаа ажиллана. #МҮЭХ #хөдөлмөрлөхэрх #нийгмийнтүншлэл
