29/12/2025
Мэдээлэл
Японы волейболын холбоотой харилцаа холбоо тогтоож хамтран ажиллаж байсан талаарх түүхэн дурсамж
1990 оны 3 дугаар сарын эхээр БНМАУ-ын Сайд нарын зөвлөлийн дарга /одоогийнхоор Засгийн газрын Ерөнхий сайд/ Д.Содном гуайг Япон улсад анх удаа төрийн айлчлал хийх үеэр айлчлалын хөтөлбөрт нь волейбол тоглуулахаар зохион байгуулсан юм билээ. Уг тоглолтыг зохион байгуулах ажлыг тухайн үеийн Азийн болон Японы волейболын холбооны Ерөнхийлөгч Ясутака Мацудайра гуайд хариуцуулж нэгэн их сургуулийн спорт зааланд тоглуулжээ.
Тэр тоглолтод Я. Мацудайра гуай Д.Содном даргатай нэг багт орж бусад нөхдийн хамт тоглон эсрэг багаа хожсон гэнэ. Д.Содном даргын Япон улсад хийсэн төрийн айлчлал Японы ард түмэнд Монголыг таниулах 2 улсын харилцааг шинэ шатанд гаргах итгэлцэл бий болгоход чухал ач холбогдолтой болсон нь мэдээж бөгөөд уг тоглолтын талаар Япон улсын хэвлэлүүд халуун дотноор бичиж байжээ.
Я.Мацудайра гуай Д.Содном даргатай волейбол тоглосон талаараа “Волейболын үнэнч цэрэг” сэдэвтэй нилээд том нийтлэлийг “Азийн волейбол” хэмээх сэтгүүлд нийтлүүлж байсан.
Энэхүү волейболын тоглолтын талаар хожим Япон улсаас Монгол улсад сууж байсан Онц бөгөөд бүрэн эрхт элчин сайд Т.Тода гуай дурсахдаа: :“ Нэг улсын Ерөнхий сайд хүн төрийн айлчлалынхаа үеэр волейбол тоглож энгийн найрсаг үйлдэл үзүүлсэн нь япончуудын Монгол улсад хандах дотно сэтгэлийг нэмэгдүүлсэн юм “ гэж хэлсэн байдаг.
Тэр уулзалтаас хойш Д.Содном дарга Я.Мацудайра гуайтай дотно харилцаатай болж Японы волейболын холбооноос манай холбоонд нилээд бодитой тусламж үзүүлсэн юм. Үүнийг спортоор гадаад орнуудтай харилцаа, хамтын ажиллагаагаа сайжруулах төрийн зөөлөн хүчний бодлогын нэг илрэл гэж үзэж болох юм.
Японд хийсэн тэр айлчлалын үед Д.Содном гуай МВХ-ны Ерөнхийлөгч болоогүй байсан бөгөөд 1990 оны 10 дугаар сард МВХ-ны Ерөнхийлөгчөөр сонгогдсон юм.
Энэ үйл явдлын дараа МВХ-ны ЕНБДаргаар ажиллаж байсан Ж.Баасанхүү миний бие 1992 онд Япон улсад зохиогдсон олон улсын волейболын дасгалжуулагчдын сургалт семинарт оролцохдоо Японы волейболын холбооны удирдлагуудтай уулзаж харилцаа холбоогоо бататгах бололцоо олдсон бөгөөд уг уулзалтанд Азийн болон Японы волейболын холбооны Ерөнхийлөгч Я.Мацудайра, Дэд ерөнхийлөгч Т.Узуки, Холбооны Гүйцэтгэх захирал бөгөөд ЕНБДарга Ц.Кояама нар оролцсон билээ.
1994 онд болсон “Хирошима-94” Азийн спортын XII наадамд анх удаа оролцож байгаа манай волейболын эмэгтэй, эрэгтэй баг тамирчдын зардлыг Японы волейболын холбоо хариуцаж даасны зэрэгцээ эмэгтэй багийг наадам болохоос 10-аад хоногийн өмнө хүлээн авч хамтарсан бэлтгэлд хамруулж 2 багийн тамирчдыг “Мизуно” фирмийн хувцсаар хангаж байсан түүхтэй.
“Хирошима-94” наадмын үеэр зохиогдсон олон улсын элсний волейболын тэмцээний зохион байгуулалттай танилцах, үзэж сонирхох, видео бичлэг хийх, хэрэглэл материалын тусламж авах талаар баг тамирчдын ахлагчаар оролцсон Ж.Баасанхүү миний хүсэлтийг ёсоор болгож байлаа.
Мөн энэ үеэр миний бие МВХ-д ийнхүү туслалцаа үзүүлсэнд нь Японы волейболын холбоонд талархлаа илэрхийлэхийн зэрэгцээ волейболын мэргэжлийн дасгалжуулагч бэлтгэж өгөх талаарх холбооны хүсэлтийг уламжлахад Я.Мацудайра Ерөнхийлөгч уриалгахан хүлээн авч тухайн наадамд тамирчнаар оролцсон Б.Жаргалсайхан гэдэг 18 настай хүүг дасгалжуулагчийн мэргэжлээр сургахаар Япон улсад үлдээж байлаа. Харин тэр хүү маань МВХ-оос Японы волейболын холбоонд тавьж шийдвэрлүүлсэн хүсэлтийг маань өөрийн ашиг сонирхлын үүднээс ашиглаж, өөр боловсрол мэргэжил эзэмшин сураггүй болсон шүү.
МВХ-ны хүсэлт захиалгаар Японы сайн дурын хамтын ажиллагааны “Жайка” байгууллагын шугамаар волейболын мэргэжилтэн Х.Иноуэ, Т.Нишимура нарыг Монголд урьж ажиллуулж байлаа. Энэ нь Монголын спортын түүхэнд монголд урьж ажиллуулсан анхны мэргэжилтнүүд байсан юм.
1994 оны 9 дүгээр сард Грекийн Афин хотноо болсон ОУВХолбооны XXIV их хурал /Конгресс/ дэлхий дахинд волейболын спорт үүсэж хөгжсөний 100 жилийн ойн нээлтийн ёслолын үйл ажиллагааны үеэр Д.Содном даргын мэндчилгээ, талархал бүхий албан бичгийг Я.Мацудайра гуайд миний бие гардуулж харилцаагаа улам гүнзгийрүүлж байлаа.
Энэ их хурлаар Я.Мацудайра гуай маань ОУВХ-ны Тэргүүн дэд ерөнхийлөгчөөр сонгогдох санал хураалтанд нь хуралд төлөөлөгчөөр оролцсон миний бие дэмжиж, саналаа өгч байлаа.
2001 онд ОУВХ-ноос зохион байгуулсан XX зууны шилдгүүдийг тодруулах “Гала” ёслолд
Я.Мацудайра гуай уригдан “XX зууны Шилдэг эрэгтэй багийн дасгалжуулагч”-аар шалгарч нэрээ мөнхөлжээ.
Холбооны Ерөнхийлөгч Д.Содном гуай Я.Мацудайра Ерөнхийлөгчийг Монголд айлчлах урилгыг 1994 онд илгээж хариуд нь “Урилгыг талархан хүлээн авлаа. Одоогоор ажил төрлийн боломж гарахгүй байна, бололцоо гармагц барууны орнууд руу ОУВХ-ныхоо ажлын шугамаар явах замдаа Монголд очих бодолтой “ гэж хэлж байлаа. Бололцоо нь гараагүй байхаа.
Бид ч дараахан нь холбооныхоо сонгуульт ажлыг дараагийн үедээ шилжүүлсэн.
Түүхэн дурсамж бичсэн МВХ-ны ЕНБДарга асан,
волейболын ахмад зүтгэлтэн Ж.Баасанхүү
2025-12-29
