31/03/2026
၃၁.၃.၂၀၂၆
ဒီနေ့မှာတော့ လှည်းကူးက နေ နှစ်မိုင်လောက် ဖောင်ကြီးလမ်းအတိုင်းသွားရသော လှည်းကူးစခန်းကြီးပန်းခြံ Christian church အသင်းတော်မှာ ကျင်းပနေတဲ့ နွေရာသီကျမ်းစာသင်တန်းတခုမှာ စာပေနှင့်ပါတ်သက်လို့ ဟောဖို့ပြောဖို့ ကျနော်တို့ FWC မှ စာရေးသူများ သွားရောက်ခဲ့ကြပါတယ်။
ဖိတ်ကြားပေးသူကတော့ FWC ရဲ့ အဖွဲ့ဝင်လဲဖြစ် … သင်တန်းရဲ့ တာဝန်ခံလဲဖြစ်သူ ဆရာ John D Mar/ ဆရာ Samuel Zero ပဲဖြစ်ပါတယ်။ ဆရာကတော့ ပန်းချီကာတွန်းလိုင်းဖြစ်သော်လဲ ကျနော်တို့ စာပေသမားတွေနဲ့ နှလုံးသားချင်းနီးစပ်သူလို့ ပြောရင်လဲရပါတယ်။ အထူးသဖြင့် သင်တန်းတက်ရောက်နေတဲ့ လူငယ်လူရွယ်တွေကို စာပေအကြောင်းသိဖို့၊ စာဖတ်ချင်လာဖို့ တိုက်တွန်းအားပေးလိုစိတ် ပြင်းထန်တဲ့ဆရာလဲဖြစ်ပါတယ်။
အသင်းတော်ရဲ့ သင်းအုပ်ဆရာဖြစ်တဲ့ ဆရာကျော်ကျော်ထွန်းကိုယ်တိုင် စာပေမြတ်နိုးသူဖြစ်ပြီး ကျနော်တို့တွေ ခုလိုဟောပြောမှာကိုလှိုက်လှိုက်လှဲလှဲ ကြိုဆိုခဲ့ပါတယ်။ ဆရာကိုယ်တိုင်တချိန်က စာကြည့်တိုက်ဖွင့်ပေးခဲ့ပေမယ့် စာဖတ်သူမရှိလို့ ဆာလာအိတ် ၈ အိတ်စာခန့်ရှိတဲ့စာအုပ်တွေကို သိမ်းထားခဲ့ရကြောင်း ကျနော်တို့ဟောလို့ပြောလို့ပြီးချိန်မှာ ပြောပြခဲ့ပါတယ်။ ဝမ်းသာစရာတခုကတော့ မကြာခင်အဲဒီစာအုပ်တွေကိုပြန်ထုတ်ပေးပြီး စာကြည့်တိုက်လေး ပြန်ဖွင့်ပေးမယ်ဆိုတဲ့အကြောင်း ဆရာက ကတိပြုပြီး ကလေးတွေက ဖတ်ပါ့မယ်လို့ အပြန်အလှန် ကတိပြုတာကို ကျနော်တို့ကိုယ်တိုင်တွေ့ခွင့်ရခဲ့တာပါပဲ။
ထမင်း၊ဟင်း တွေ ကော်ဖီတွေနဲ့ တောက်လျှောက်ဧည့်ခံပေးတဲ့ ဆရာကတော်နဲ့အသင်းတော်ကိုလည်း ကျေးဇူးများစွာတင်ရပါတယ်။
ကျနော်တို့အဖွဲ့ကို ကားနဲ့ခေါ်သွားပေးတဲ့ ဆရာဂျုံးနဲ့ ဆရာမနီတာဂျုံးတို့ကိုကျေးဇူးတင်ပါတယ်။ လမ်းမှာကားပျက်တာကို အချိန်မီသိပြီး အဆင်ပြေမယ့်ဝပ်ရှော့အထိ မောင်းသွားခွင့်ပေးတဲ့ ဘုရားသခင်ရဲ့ပို့ဆောင်မှုကတော့ အမှတ်တရထဲက အမှတ်တရပေါ့ဗျာ။
ခန့်သစ်ရင်(ကဗျာ)၊ က ကဗျာတွေအကြောင်းနဲ့ ရသတွေအကြောင်းအရင်ဆုံးဟောပြောပါတယ်။
အောင်အောင်သုံးဆယ် (ဝတ္ထု)က သူရေးသားထားတဲ့ အမေ(The Mother) ဝတ္ထုက မာရိရဲ့ မိခင်ဘဝ သရုပ်ဖော်ပုံအကြောင်း ဝတ္ထုကို ဖတ်ပြလိုက် ရသကိုပုံဖော်လိုက်နဲ့ဟောပြောပေးသွားပါတယ်။
ဆရာမနီတာဂျုံး က စာရေးစာဖတ်ခြင်းရဲ့အကျိုးနဲ့ စာရေးသူဘဝ ဖြစ်ပေါ်လာပုံကိုဆောင်းပါးတပုဒ်နှင့်အတူ ဟောပြောပါတယ်။
ဆရာဂျုံး(သခင့်ကြယ်) ကလည်း စာဖတ်ခြင်းနဲ့ ဖတ်ဖို့စာပေရွေးချယ်ခြင်း၊ စာပေထဲမှ မှတ်သင့်ရာနှင့်မမှတ်သင့်ရာ၊ လိုက်လျှောက်သင့်ရာနှင့် ရှောင်သင့်ရာကို ခွဲခြားခြင်းတွေအကြောင်း ဟောပြောပါတယ်။
ဆရာကမ္ဘာ (ဟာသစာပေ) ကတော့ ဟာသစာပေအကြောင်းလေးကို အသက်ကလေး နှင့်အလွဲဟာသ များထဲမှ ဟာသလေးများကို ဖတ်ပြရင်း ရယ်ရယ်မောမောပျော်ပျော်ပါးပါး ဟောပြောပေးခဲ့ပါတယ်။
နောက်ထပ်မဖြစ်မနေ ကျေးဇူးတင်ရမှာကတော့ သုံးနာရီကျော် ပြောချင်တိုင်းပြော ဟောချင်တိုင်းဟောနေတဲ့ စာရေးသူတွေကို အားရပါးရ အပြန်အလှန်အမေးအဖြေလုပ်ရင်း နားထောင်ပေးသွားခဲ့တဲ့ သင်တန်းသား လူငယ်မောင်မယ်တွေပါပဲ။ သူတို့ရဲ့တုန့်ပြန်မှုတွေကြောင့် အဲဒီအသင်းတော်လေးမှာ စာကြည့်တိုက်လေး ပြန်တွေ့ရတော့မယ်။
ကျေးဇူးများစွာဖြင့်
