Thismoment Zone

09/09/2026

လူတိုင်းလိုလိုကတော့ ဘဝမှာ တကယ် အေးချမ်းတဲ့ ပျော်ရွှင်မှုကိုပဲ ရချင်ကြတာပါ။

ဒါပေမဲ့ ပျော်ရွှင်ချင်တဲ့စိတ် ပေါ်လာတဲ့အချိန်တိုင်းမှာ ပျော်ရွှင်မှုကို စိတ်ထဲကနေ မရှာဘဲ ပစ္စည်းတွေထဲကနေ လှည့်ရှာမိတတ်ကြပါတယ်။

အထူးသဖြင့် စိတ်ထဲမှာ စိတ်တိုင်းမကျတာ၊ နေလို့မကောင်းတာ ဒါမှမဟုတ် ပျင်းလာတဲ့အခါမျိုးမှာ လက်ထဲက ငွေလေးပါ နည်းနည်းရှိနေမယ်ဆိုရင် ပိုဆိုးသွားတတ်ပါတယ်။ အဲဒီငွေကြေးက စိတ်ညစ်စရာ အခန်းကြီးထဲမှာ လောင်ပိတ်နေတဲ့အခါ ခဏတာ လွတ်မြောက်ဖို့ သွားဖွင့်လိုက်တဲ့ တံခါးတစ်ခုလို ဖြစ်သွားတာပါ။

ဒီလို စိတ်မျိုးစဖြစ်ရင် ပထမဆုံးအဖြစ် ဟိုဟာဝယ်ချင်တယ်၊ ဒီဟာဝယ်ချင်တယ်ဆိုပြီး ပစ္စည်းတစ်ခုခုရဲ့ ပုံရိပ်လေး စိတ်ထဲ ပေါ်လာတတ်ပါတယ်။ အဲဒါက ကြော်ငြာတွေကြောင့်ပဲဖြစ်ဖြစ်၊ သူများသုံးနေတာ မြင်လို့ပဲဖြစ်ဖြစ်၊ ကိုယ့်စိတ်က ကိုယ့်ကိုယ်ကို အာရုံပြောင်းဖို့ စမ်းရှာလိုက်တာပဲဖြစ်ဖြစ် ဖြစ်နိုင်ပါတယ်။ ဘာပဲဖြစ်ဖြစ် အဲဒီစိတ် ပေါ်လာပြီဆိုတာနဲ့ အတွင်းထဲမှာ "အဲဒီဟာရရင် ရှယ်ပဲ" ဆိုတဲ့ ယုံကြည်ချက်ဆီကိုပဲ အားလုံး ဆွဲခေါ်သွားခံလိုက်ရတာပါ။

ဒီလိုနဲ့ အဲဒီပစ္စည်းကို တကယ် လိုအပ်လား မလိုအပ်လားဆိုတာထက် အဲဒါနဲ့ပတ်သက်ပြီး လေ့လာရတာကိုပဲ ပိုပြီး အားသန်လာကြပါတယ်။ Review တွေ ကြည့်တာကနေစလို့ ဘယ် brand က ပိုကောင်းလဲ၊ ဘယ် model က ပိုတန်လဲ၊ ဘယ်နေရာက ဝယ်ရင် ပိုစျေးချိုလဲဆိုတဲ့ အချက်အလက်တွေနဲ့ ကိုယ့်ကိုယ်ကို မနားတမ်း အာရုံပြည့်နေအောင် လုပ်လိုက်ပါတယ်။ အပြင်ကကြည့်ရင် အရမ်း စိစစ်တိကျစွာ စဉ်းစားဆုံးဖြတ်နေတာလို့ ထင်ရပေမဲ့ အမှန်တကယ်ကတော့ စိတ်၏ လေးကန်မှုကို ခဏတဖြုတ် ပျောက်သွားအောင် အာရုံကို တင်းတင်းကျပ်ကျပ် ဆုပ်ကိုင်ထားတာပဲ ဖြစ်ပါတယ်။

အဲဒီအချိန်မှာ စိတ်က ထူးထူးခြားခြား တက်ကြွသွားပြီး အဲဒီပစ္စည်းနဲ့ပတ်သက်တာတွေကို မနားတမ်း လိုက်လုပ်နိုင်လာပါတယ်။ တစ်ခုခုကို ရှာဖွေနေရတာ၊ ကြိုးစားနေရတာလို ခံစားရတာကြောင့် အဲဒီခံစားချက်ကို "ပျော်တာ" လို့ အမှတ်လွဲသွားတတ်ကြပါတယ်။ တကယ်တော့ အဲဒါ ပျော်ရွှင်မှု မဟုတ်ဘဲ တစ်စုံတစ်ရာကို ရမယ်လို့ ထင်တဲ့အချိန်မှာ ပေါ်လာတဲ့ မီးပွားလို လင်းလက်ပြီး မြန်မြန်ပျောက်ကွယ်သွားတတ်တဲ့ စိတ်လှုပ်ရှားမှု (Excitement) သာ ဖြစ်ပါတယ်။

နောက်ဆုံးမှာတော့ အွန်လိုင်းက မှာရရင်တောင် မစောင့်နိုင်တော့ဘဲ ဆိုင်အထိ သွားဝယ်လိုက်တာမျိုးအထိ ဖြစ်လာတတ်ပါတယ်။ ဝယ်ချင်တဲ့စိတ် ကုန်မသွားခင်မှာပဲ "မဝယ်ရင် မရတော့ဘူး" ဆိုတဲ့ စိတ်ကို အပြီးတိုင်ပိတ်ချင်လို့ ဝယ်လိုက်တာပါ။ Online Shopping ဆိုရင်လည်း Delivery ရောက်လာတဲ့အချိန် အိတ်ဖောက်တဲ့အသံ၊ ဘူးလေးဖွင့်လိုက်ရတဲ့ အခိုက်အတန့်က ဘဝကို ခဏလောက် အသစ်ဖြစ်သွားသလို ခံစားရစေပါတယ်။ အဲဒါကြောင့်လည်း ဒီနေ့ခေတ်မှာ Unboxing ဗီဒီယိုတွေ ခေတ်စားလာတာ ဖြစ်ပါတယ်။

ဒါပေမဲ့ အဲဒီ အသစ် ဆိုတာကလည်း တကယ် အသစ် မဟုတ်ဘူးဆိုတာကို မကြာခင်မှာပဲ သိလိုက်ရပါတယ်။ ပစ္စည်း ရောက်ပြီး မကြာခင်မှာပဲ အာရုံက ပြန်ကျသွားပြီး စိတ်ဝင်စားမှု ပျောက်သွားတာပါ။ မနက်ပိုင်းက အရမ်းကောင်းတယ်ထင်ခဲ့တဲ့အရာက ညနေပိုင်းမှာ သာမန်ပစ္စည်းတစ်ခုဖြစ်သွားပြီး နောက်ထပ် အသစ်တစ်ခုကို ထပ်ရှာချင်လာပြန်ပါတယ်။ အဲဒီလိုနဲ့ ပစ္စည်းတွေကို ဝယ်တာမဟုတ်ဘဲ စိတ်လှုပ်ရှားမှုကိုပဲ ဝယ်နေသလို ဖြစ်သွားတာပါ။

အဓိကပြဿနာက စိတ်ထဲက နေလို့မကောင်းတာကို ပစ္စည်းတွေက မဖြေရှင်းပေးနိုင်တာပဲ ဖြစ်ပါတယ်။ ပစ္စည်းတွေက အဲဒီမပျောက်သေးတဲ့ အရာကို ခဏ မကြည့်ဖြစ်အောင် အာရုံလှည့်ပေးတာပဲ လုပ်ပေးနိုင်တာပါ။ အာရုံ ပြန်လွတ်သွားတဲ့အခါ မပျောက်သေးတဲ့ စိတ်ညစ်စရာက အဲဒီနေရာမှာပဲ ရှိနေပြီး၊ ငွေကုန်သွားတာကို သတိရကာ နောင်တနဲ့ အပြစ်တင်စိတ်တွေပါ ထပ်တိုးလာတတ်ပါတယ်။ ပြဿနာကို ဖြေရှင်းချင်လို့ လုပ်လိုက်တာက ပြဿနာကို အခြားပုံစံတစ်ခုနဲ့ ပြန်တည်ဆောက်လိုက်သလို ဖြစ်သွားတာပါ။

ဒီနေ့ခေတ် Online Shopping စနစ်တွေနဲ့ Capitalism (အရင်းရှင်စနစ်) ကလည်း ဒါကို အသုံးချပြီး ဖန်တီးထားတာပါ။ "Recommended items" ဆိုတဲ့ စာကြောင်းနဲ့ စိတ်ကိုဆွပေးတယ်၊ "Limited time" နဲ့ အလျင်လိုအောင်လုပ်တယ်၊ "Only a few left" ဆိုတာနဲ့ မဝယ်ရင် မဖြစ်တော့ဘူးထင်အောင် လုပ်တတ်ကြပါတယ်။ အပြင်ကကြည့်ရင် Marketing လို့ ထင်ရပေမဲ့ အတွင်းထဲက ခံစားရတာကတော့ စိတ်ကို သွေးထိုးလှုံ့ဆော်ပြီး အာရုံကို လုယက်နေသလိုမျိုးပါပဲ။ လူကို ငြီးငွေ့လွယ်လာအောင်နဲ့ မလုံလောက်သလို ခံစားလာအောင် စနစ်တစ်ခုလုံးက ဆော့ကစားနေတာ ဖြစ်ပါတယ်။

ဒါကြောင့် နောက်ဆုံးမှာ နားလည်လာရမှာက ရုပ်ဝတ္ထုပစ္စည်းတွေက ရေရှည်တည်တံ့တဲ့ ပျော်ရွှင်မှုကို မပေးနိုင်ဘူးဆိုတဲ့ အချက်ပါပဲ။ ပျော်ရွှင်မှုကို အပြင်မှာပဲ အမြဲမောင်းနှင်ရှာနေရင် တစ်ခုနဲ့မတော်ရင် နောက်တစ်ခုကို ထပ်ဝယ်မယ်ဆိုတဲ့ သံသရာထဲမှာပဲ လည်နေမှာဖြစ်ပြီး၊ အဲဒီ "နောက်တစ်ခု" ဆိုတာကလည်း လက်ထဲမရောက်မချင်းပဲ လှပနေမှာ ဖြစ်ပါတယ်။

ဒါကြောင့် နောက်တစ်ကြိမ် ပစ္စည်းတစ်ခုခုကို ထပ်ဝယ်တော့မယ်ဆိုရင် "တကယ် လိုချင်တာ ပစ္စည်းလား… ဒါမှမဟုတ် စိတ်ထဲက နေလို့မကောင်းမှုကို မတွေ့ချင်လို့ ရှောင်လွှဲနေတာလား" ဆိုတာကို မိမိကိုယ်ကို ပြန်မေးကြည့်ဖို့ လိုပါတယ်။ အဲဒီမေးခွန်းကို မဖြေခင်မှာပဲ နောက်အသစ်တစ်ခုကို ထပ်ဝယ်လိုက်ရင်တော့ ရလိုက်တာက ပစ္စည်းမဟုတ်ဘဲ ခဏလေး လင်းပြီး ငြိမ်းသွားမယ့် မီးပွားတစ်စက်ပဲ ဖြစ်နေပါလိမ့်မယ်။

အရှင်နန္ဒာစာရ
9.9.2026

02/09/2026

❝ Hello, Me ❞

◾ဒီတစ်ပတ်ကနွေရာသီရဲ့ နောက်ဆုံးအပတ်ဆိုတော့ ကျွန်မတို့ဆီမှာ bank holiday အနေနဲ့ တနင်္လာနေ့ပါ ပိတ်တဲ့ Long Weekend လေးမှာ ကျွန်မ ကိုယ့်အတွက် နှစ်ရက်လောက် အချိန်ပေးဖြစ်ခဲ့ပါတယ်။

◾ပိတ်ရက်ရှည်ဆိုတော့ တစ်နေရာရာသွားလို့လည်း ရတယ်။ သူငယ်ချင်းတွေနဲ့ တွေ့လို့လည်း ရတယ်။ တစ်ခုခုလုပ်လို့လည်း ရတယ်။ ဒါပေမယ့် ဒီတစ်ခါတော့ ဘယ်မှသွားဖို့ စိတ်မရှိခဲ့ဘူး။ ဘာမှထူးထူးခြားခြား လုပ်ဖို့လည်း စိတ်မရှိခဲ့ဘူး။

“ဒီနှစ်ရက်တော့ ကိုယ့်အတွက်ပဲ ထားလိုက်မယ်” လို့ တွေးမိတယ်။ ဒါပေမယ့် ကိုယ့်နဲ့ကိုယ် နေကြည့်ဖို့က ထင်သလောက် မလွယ်ခဲ့ပါဘူး။ တော်တော်လေးကိုသိတ္တိမွေးလိုက်ရပါတယ်။

◾အမြဲတမ်း တစ်ခုခုလုပ်နေခဲ့တာနဲ့ အကျင့်ဖြစ်နေတော့ စိတ်ထဲမှာ—

“ငါ တစ်ခုခုလုပ်သင့်လား။”
“ပုံဆွဲရင်ကောင်းမလား။”
“သင်တန်းသွားတက်ရင်ကောင်းမလား။”
“ဒီနှစ်ရက်လောက် ဘာမှမလုပ်ဘဲနေရင် အချိန်ဖြုန်းသလို ဖြစ်သွားမလား။”

ဆိုတဲ့ အရင်လို တွေးနေကြ ပုံစံလေးတွေ ပြန်ပြန်ဝင်လာတယ်။ တချို့အချိန်တွေမှာ တော်တော်လေးကို တွေဝေစေတယ်။

“ငါ ဘာမှမလုပ်ခဲ့ဘူးပဲ” လို့တောင် တွေးမိတယ်။ဒါပေမယ့် အဲဒီအချိန်မှာ ကျွန်မ သတိထားမိတာတစ်ခုရှိတယ်။

◾ကျွန်မဟာ အချိန်ကိုတောင် တစ်ခုခုလုပ်ပြီးမှ တန်ဖိုးရှိတယ်ဆိုတဲ့ပုံစံနဲ့ ကြည့်နေမိတာပါ။ ကျွန်မဟာ ကိုယ့်ကိုယ်ကို ပြန်လည်လေ့လာနေတာ အချိန်တော်တော်ကြာပါပြီ။ Counselling training ကိုလည်း လေးနှစ်နီးပါး လုပ်လာခဲ့ပါတယ်။ TBSI နဲ့ ကိုယ့်အတွင်းကို ပြန်ကြည့်တဲ့အလုပ်ကိုလည်း ဆက်လုပ်နေတုန်းပါပဲ။

◾ဒီခရီးထဲမှာ ကျွန်မ တဖြည်းဖြည်း သတိထားမိလာတာတစ်ခုက—ကျွန်မဟာ ကိုယ့်ခံစားချက်တွေကို အတော်လေး ရှောင်နေခဲ့တာပါ။ အလုပ်လုပ်လိုက်မယ်။တစ်ခုခုကို ပြီးအောင်လုပ်လိုက်မယ်။အကျိုးရှိတဲ့အရာတစ်ခုခု လုပ်လိုက်မယ်။

အဲဒီလိုနဲ့ ကိုယ့်အတွင်းက မကြည့်ချင်တဲ့အရာတွေကို ခဏခဏ ရှောင်ခဲ့မိတယ်။အရင်ကတော့ Workaholic ဖြစ်တာ၊ အလုပ်ကြိုးစားတာ၊ အောင်မြင်တာတွေက အားလုံးကောင်းတယ်လို့ ထင်ခဲ့ပါတယ်။

◾အခုတော့ ကိုယ့်ကိုယ်ကို နည်းနည်းပြန်ကြည့်ပြီး မေးမိလာတယ်—“ကျွန်မ တကယ်ဘာလိုချင်တာလဲ?”ဒီမေးခွန်းက ရိုးရိုးလေးပေမယ့် တစ်ခါတလေ ကိုယ့်ကိုယ်ကို မေးဖို့ မလွယ်ပါဘူး။ဘာဖြစ်လို့လဲဆိုတော့ ကိုယ်တကယ်လိုချင်တာကို သိလာရင် တစ်ချို့အရာတွေကို ပြန်စဉ်းစားရနိုင်တယ်။

◾ကိုယ့်ခံစားချက်တွေကို မကြည့်ဘဲထားလိုက်တာနဲ့ အဲဒီခံစားချက်တွေက ပျောက်သွားတာတော့ မဟုတ်ပါဘူး။
တစ်ခါတလေ ဒေါသအနေနဲ့ ပြန်ပေါ်လာတယ်။ တစ်ခါတလေ စိတ်ပျက်မှုအနေနဲ့ ဖြစ်လာတယ် ။တစ်ခါတလေ ကိုယ့်ဒေါသနဲ့ မသက်ဆိုင်တဲ့သူတစ်ယောက်အပေါ်တောင် သွားထိမိတတ်တယ်။

အဲဒီလိုအချိန်မှာ “ဘာကြောင့် ငါဒီလိုဖြစ်သွားတာလဲ” လို့ ကိုယ့်ကိုယ်ကို ပြန်မေးမိတယ်။ Mindfulness တွေလုပ်နေပြီးတော့ဆိုပြီး ကိုယ့်ကိုယ်ကိုယ် အပြစ်တင်တဲ့ပုံစံနဲ့ ရှောင်ဖို့ကြိုးစားလိုက်ပါသေးတယ်။

နောက်မှ Mindfulness လုပ်တယ်ဆိုတာလည်း ဒီလိုခံစားချက်တွေ မရှိတော့ရဘူးလို့ ဆိုလိုတာမှမဟုတ်တာဘဲ။

🌱 ဒေါသထွက်ရင် ဒေါသထွက်နေတယ်ဆိုတာ သိဖို့။

🌱 ကြောက်ရင် ကြောက်နေတယ်ဆိုတာ သိဖို့။

🌱 ဝမ်းနည်းရင် ဝမ်းနည်းနေတယ်ဆိုတာ သိဖို့။

🌱 အရင်ဆုံး ကိုယ့်အတွင်းမှာ ဘာဖြစ်နေသလဲဆိုတာကို နည်းနည်းလေး အရှိအတိုင်းနားထောင်ကြည့်ဖို့ပါ။

◾သိလာမှ နားလည်လာနိုင်တယ်။နားလည်လာမှ လက်ခံကြည့်နိုင်တယ်။

ပြီးတော့မှ—“ဒါဆို ကျွန်မ တကယ်ဘာလိုချင်တာလဲ?”လို့ ပြန်မေးကြည့်နိုင်လာတယ်။Meditation လုပ်သလိုမျိုး ကိုယ့်အတွင်းကို မကြာမကြာပြန်ကြည့်ဖြစ်လာတယ် ဆိုပေမယ့် ဒီတစ်ခါမှာတော့ ကိုယ့်ခံစားချက်တွေနဲ့ နည်းနည်းပိုနီးကပ်လာသလို ခံစားရတယ်။

“ဘာကို မကြိုက်လဲ။”

“ဘာကို ကြောက်လဲ။”

“ဘာကို ရှောင်နေမိလဲ။”

“ပြီးတော့ ကိုယ်တကယ်ဘာလိုချင်လဲ။”

◾ကိုယ်နဲ့ကိုယ်ပိုပြီးရိုးသားလာတယ်။ ဒါတွေကိုချက်ချင်းအဖြေထုတ်ဖို့ မကြိုးစားဘဲ နည်းနည်းလေး နေပြီး ကြည့်ဖြစ်တယ်။ပြီးတော့ တတိယနေ့မှာ နည်းနည်းထူးဆန်းတဲ့အရာတစ်ခု ဖြစ်လာတယ်။

မနက်နိုးလာတဲ့အခါ စိတ်ထဲမှာ နည်းနည်းရှင်းနေသလို ခံစားရတယ်။ အရာအားလုံး ရှင်းသွားတာတော့ မဟုတ်ပါဘူး။အနာဂတ်ကိုလည်း မသိသေးဘူး။

ဒါပေမယ့် ကိုယ်ဘယ်လိုခံစားနေရတယ်၊ ကိုယ်ဘာလိုချင်တယ်ဆိုတာကို နည်းနည်းပိုသိလာတယ်။ အဲဒါလေးက လောလောဆယ်မှာ လုံလောက်တယ်လို့ ထင်မိတယ်။

◾အခု ပြန်စဉ်းစားကြည့်ရင် ဒီနှစ်ရက်မှာ ကျွန်မ ဘာမှမလုပ်ခဲ့တာ မဟုတ်ပါဘူး။အပြင်မှာ ဘာမှမပြီးမြောက်ခဲ့ပေမယ့် ကိုယ့်အတွင်းမှာတော့ အများကြီး ဖြစ်ခဲ့ပါတယ်။

◾အမြဲတမ်း တစ်ခုခုလုပ်ပြီး အကျိုးတစ်ခုခုရဖို့ မလိုဘူးဆိုတာကိုလည်း နည်းနည်းချင်း လက်ခံကျင့်သုံးလာနိုင်တယ်။ တစ်ခါတလေ ကိုယ်လုပ်ချင်လို့ လုပ်တာလေးတွေ ရှိလို့ရတယ်။ ဘာမှပြန်မရလည်း ရပါတယ်။ ကိုယ်ပျော်နေတယ်ဆိုရင် အဲဒီအချိန်လေးကလည်း တန်ဖိုးရှိတာပဲ ဖြစ်နိုင်ပါတယ်။

◾ပြီးတော့ အရင်က ကိုယ့်ကိုယ်ကို ဒီလိုအချိန်တွေ မပေးခဲ့မိတာအတွက် နည်းနည်းစိတ်မကောင်းဖြစ်မိတယ်။ ဒါပေမယ့် ကိုယ့်ကိုယ်ကို အပြစ်တင်ဖို့တော့ မလိုဘူးလို့ ထင်လာတယ်။ အဲဒီအချိန်တုန်းက ကိုယ်သိသလောက်၊ နားလည်သလောက်နဲ့ ကိုယ်နေခဲ့တာပဲလေ။ အခုမှ နည်းနည်းပိုမြင်လာတာပါ။ အခုမှ ကိုယ့်ကိုယ်ကို နည်းနည်းပိုနားထောင်လာနိုင်တာပါ။

◾ဒါကြောင့် အခုနောက်ပိုင်းမှာတော့ တစ်ခါတလေ ကိုယ့်အတွက် အချိန်လေးပေးဖို့ သတိရလာတယ်။ဘာမှမလုပ်ဘဲ နေဖို့လည်း ကိုယ့်ကိုယ်ကို ခွင့်ပြုကြည့်တယ်။ကိုယ့်ခံစားချက်တွေကိုလည်း နည်းနည်းပိုနားထောင်ကြည့်တယ်။ပြီးတော့ ကိုယ့်ကိုယ်ကို မေးကြည့်တယ်—

“Hello, Me… အခု ကျွန်မ တကယ်ဘာလိုချင်တာလဲ?”

အဖြေက ချက်ချင်းရချင်မှ ရပါလိမ့်မယ်။မရလည်း ရပါတယ်။အနည်းဆုံးတော့ ကိုယ့်ကိုယ်ကို ပြန်နားထောင်ဖို့ အချိန်လေးပေးခဲ့ပြီဆိုရင်၊ ကိုယ့်ကိုယ်ကို ပြန်တွေ့ဖို့ လမ်းလေးတစ်ခု စတင်နေပြီလို့ ကျွန်မ ထင်ပါတယ်။

နှလုံးစိတ်ဝမ်းအေးချမ်းကြပါစေ....

-မအေမီ-
2/09/2026

26/08/2026

🌻 ❝ တွယ်တာခြင်းမှသည် အကြွင်းမဲ့မေတ္တာဆီသို့ ❞

တစ်နေ့က ခြံထဲက ပန်းပင်လေးတွေကို ရေလောင်းရင်း တစ်စုံတစ်ခုကို ကျမ သတိထားမိတယ်။ ပန်းပွင့်လှလှလေးတွေ ဖူးနေတဲ့ အပင်ကိုကျတော့ ရေပိုလောင်းမိပြီး၊ အရွက်တွေဝါ၊ ပိုးကိုက်နေတဲ့ အပင်ကိုကျတော့ သိပ်ဂရုမစိုက်မိဘဲ ခပ်မြန်မြန် ကျော်သွားမိလိုက်တာကိုပါ။ ဒါကို သတိထားမိတဲ့အချိန်မှာ တို့တွေရဲ့ နေ့စဉ်ဘဝဆက်ဆံရေးတွေနဲ့ နှိုင်းယှဥ်ပြီး ပြန်လည် ဆန်းစစ်ကြည့်မိသွားပါတယ်။

ကျမတို့တွေဟာလည်း ကိုယ်သဘောကျတဲ့သူ၊ ကိုယ့်ကို ကောင်းတဲ့သူ၊ ကိုယ့်နဲ့ သဘောညီမျှတဲ့သူဆိုရင် အခွင့်အရေးပိုပေးချင်ပြီး၊ ကိုယ်နဲ့ အဆင်မပြေတဲ့သူ၊ မနှစ်မြို့တဲ့သူဆိုရင် ပစ်ပယ်ထားလိုက်တာမျိုးလေးတွေ လုပ်မိတတ်လေ့ ရှိတယ် မဟုတ်လား။

တကယ်တော့ ဒါဟာ ပုထုဇဉ်တွေရဲ့ သဘာဝပါ။ စိတ်ပညာရှုထောင့်ကနေကြည့်ရင် လူသားတွေဟာ ကိုယ့်အတွက် လုံခြုံမှုပေးနိုင်တဲ့ အသိုက်အဝန်း Secure base တစ်ခုကို ရှာဖွေဖို့နဲ့ တွယ်တာမှု Attachment ဆိုတဲ့ အခြေခံ စိတ်ပိုင်းဆိုင်ရာ လိုအပ်ချက် ရှိကြပါတယ်။

ဒါကြောင့် "ချစ်တယ်" "ခွင့်လွှတ်တယ်" ဆိုတာကိုမှ ဘယ်သူ့မို့လို့၊ ဘယ်ဝါမို့လို့ ဆိုပြီး ခွဲခြားဘက်လိုက်မှုလေးတွေ ပါနေတတ်တာဟာ အပြစ်တစ်ခုရယ်တော့ မဟုတ်ပါဘူး။ ဒါဟာ လုံခြုံမှုကို ရှာဖွေနေတဲ့ လူသားဆန်တဲ့ သဘာဝတစ်ခုသာ ဖြစ်ပါတယ်။ ဒီလို တွယ်တာမှုလေးတွေ၊ စွဲလမ်းမှုလေးကနေတစ်ဆင့် ကျမတို့ဟာ ချစ်ခြင်းမေတ္တာရဲ့ အခြေခံကို စတင် သင်ယူကြရတာပါ။

ဒါပေမဲ့ မြတ်စွာဘုရားအပါအဝင် သူတော်စင်တွေ ဟောပြခဲ့တဲ့ မေတ္တာ၊ ကရုဏာ၊ ခွင့်လွှတ်ခြင်း၊ သည်းခံခြင်း စတဲ့ စိတ်အရည်အသွေး Mental qualities တွေကတော့ အင်မတန်မှကို မြင့်မားပြီး နက်နဲလှပါတယ်။ အဲဒီအဆင့်မှာတော့ အစွဲအလမ်းနဲ့ တဏှာကြောင့်ဖြစ်လာတဲ့ ခံစားချက်တွေ မပါဝင်တော့ဘဲ၊ သတ္တဝါအားလုံးကို ခွဲခြားမှုမရှိတဲ့ အကြွင်းမဲ့မေတ္တာ Unconditional Love သဘောတရားအဖြစ် ပြောင်းလဲသွားပါတယ်။ ဒီအရာကို ကျမအနေနဲ့လည်း အခုမှ ရေးရေးလေး ပိုပြီး နားလည်သဘောပေါက်လာသလို ခံစားရတယ်လို့ ဆိုရပါမယ်။

ဒီလို မြင့်မားတဲ့ စိတ်အရည်အသွေးတွေကို ပိုင်ဆိုင်ဖို့ဆိုရင် အတင်းအကျပ် လုပ်ယူလို့မရနိုင်ပါဘူး။ အရင်ဆုံး လိုအပ်တာက အရှိကိုအရှိအတိုင်း လက်ခံနိုင်တဲ့ Acceptance လို့ ထင်မိတယ်။ ကိုယ့်ကိုယ်ကိုယ်နားလည်ခြင်း Self-awareness နဲ့ မိမိကိုယ်ကို အပြည့်အဝလက်ခံခြင်း Self-acceptance မရှိသေးရင် တကယ်စစ်မှန်တဲ့ မေတ္တာတရား ဖြစ်ပေါ်လာဖို့လည်း အလွန်ခဲယဉ်းပါတယ်။

တစ်ယောက်နဲ့တစ်ယောက် ဖြတ်သန်းရတဲ့ အတွေ့အကြုံတွေ၊ နားလည်နိုင်စွမ်းတွေ မတူညီကြပေမဲ့၊ ကျမတို့ ကိုယ့်ကိုယ်ကိုယ် အတိုင်းအတာတစ်ခုအထိ မေတ္တာအစစ် ထားနိုင်လာတဲ့အခါ၊ ကိုယ့်ရဲ့ အားနည်းချက်တွေ၊ အမှားတွေကို နားလည်လက်ခံပြီး ခွင့်လွှတ်နိုင်လာတဲ့အခါ... အဲဒီ ခွင့်လွှတ်ခြင်းနဲ့ မေတ္တာတရားဟာ တခြားသူတွေအပေါ်ကိုလည်း အလိုလို စီးဆင်းသွားပါတယ်။ ဘယ်သူဘယ်ဝါမို့လို့ ဆိုပြီး ရွေးချယ်နေစရာမလိုတော့ဘဲ "တန်းတူ" ဆိုတဲ့ နေရာကို သဘာဝကျကျ ရောက်ရှိသွားတာပါ။

တွယ်တာမှုနဲ့စတင်ရာ ဘေးကင်းလုံခြုံတဲ့ အသိုက်အဝန်းလေးကနေ အစပြုပြီး၊ ခွဲခြားမှုကင်းတဲ့ မေတ္တာအစစ်ဆီကို လျှောက်လှမ်းနိုင်ဖို့က လူသားတိုင်းအတွက် လှပတဲ့ ခရီးစဉ်တစ်ခု ဖြစ်ပါတယ်။

ဒါကြောင့် နာကျင်မှုတွေ၊ အားနည်းချက်တွေကို မျက်ကွယ်မပြုဘဲ၊ မိမိကိုယ်ကို အရင်ဆုံး နားလည်ခွင့်လွှတ်ပေးရင်း၊ မေတ္တာထားပေးရင်း၊ ကိုယ့်ရဲ့ ပကတိသဘောသဘာဝလေးကို နားလည်လက်ခံပေးရင်း၊ တဖြည်းဖြည်းနဲ့ ပိုကျယ်ပြန့်တဲ့ မေတ္တာနယ်ပယ်ဆီကို တို့တွေ အတူတူ လျှောက်လှမ်းကြည့်ကြပါစို့။

မမိုးငယ်
26.8.2026

19/08/2026

🌷မှန်မှန်ကန်ကန် ကရုဏာထားတတ်ဖို့🌷

သူတစ်ပါးကို သနားကြင်နာတော့မယ်ဆိုရင် သနားစိတ်တစ်ခုတည်းနဲ့တင် မလုံလောက်ပါဘူး။ စေတနာကောင်းဖို့တင်မကဘဲ ဉာဏ်ပညာပါတဲ့ စိစစ်သုံးသပ်မှုနဲ့ လက်တွေ့ကျကျ ကူညီဆောင်ရွက်မှုပါ ပေါင်းစပ်မှသာ စစ်မှန်တဲ့ ကရုဏာဖြစ်လာတာပါ။

ဒါကြောင့် ကူညီတော့မယ်ဆိုရင် ပထမဆုံးအနေနဲ့ ဒီလူ ဒါမှမဟုတ် ဒီသတ္တဝါဟာ အမှန်တကယ်ပဲ ဆင်းရဲဒုက္ခ ရောက်နေတာ ဟုတ်ရဲ့လားဆိုတာကို သေချာ သုံးသပ်ဖို့ လိုပါတယ်။ ဉာဏ်မပါတဲ့ ကိုယ်ချင်းစာစိတ်တစ်ခုတည်းနဲ့ သနားမိတဲ့အခါ ဟန်ဆောင်ဒုက္ခတွေရဲ့ လှည့်ဖြားမှုကို ခံရပြီး အလိမ်ခံရတဲ့အဖြစ်မျိုး ရောက်သွားနိုင်လို့ပါ။

ဒုက္ခရောက်နေသူရဲ့ အခြေအနေကို ဘက်ပေါင်းစုံကနေ တွေးဆကြည့်ပြီး ဒီဒုက္ခကနေ လွတ်မြောက်နိုင်မယ့် ထွက်ပေါက် ဘယ်လောက်များ ရှိမလဲ၊ ဘယ်လောက်အထိ လွတ်မြောက်နိုင်မလဲဆိုတာကိုလည်း တွက်ချက်ကြည့်ရပါမယ်။

အချို့သော ဒုက္ခတွေက ထွက်ပေါက် လုံးဝမရှိတာမျိုး ဖြစ်နေတတ်သလို၊ အချို့ကျပြန်တော့လည်း အလုံးစုံ လွတ်မြောက်မသွားရင်တောင် အတိုင်းအတာတစ်ခုအထိ သက်သာရာရစေမယ့် နည်းလမ်းတွေ ရှိတတ်ပါတယ်။ ကူညီချင်စိတ်ရှိသူအနေနဲ့ ဒီလိုရွေးချယ်စရာ လမ်းကြောင်းတွေကို ကိုယ့်ရဲ့ ဉာဏ်ပညာနဲ့ ရှင်းရှင်းလင်းလင်း မြင်အောင် ကြည့်နိုင်ဖို့ အရေးကြီးပါတယ်။

ထွက်လမ်းတွေကို မြင်ပြီးပြီဆိုရင်တော့ ကိုယ့်ကိုယ်ကိုယ် ပြန်လည်စိစစ်ရတော့မှာပါ။

🌷 ဒီဒုက္ခတွေ လျော့ပါးသွားအောင် ကိုယ့်ဘက်က ဘယ်နေရာကနေ ပါဝင်ပတ်သက်ပေးနိုင်မလဲ၊

🌷ကိုယ်ပါဝင်လိုက်ခြင်းအားဖြင့် သူတို့ရဲ့ ဒုက္ခဟာ ဘယ်လောက်အထိ လျော့ကျသွားနိုင်မလဲဆိုတာကို သေချာ ရွေးချယ်ရပါမယ်။

ရွေးချယ်ပြီးပြီဆိုရင်တော့ တိကျတဲ့ လမ်းကြောင်းအတိုင်း မမှိတ်မသုန် လျှောက်လှမ်းပြီး တတ်စွမ်းသမျှ မဆုတ်မနစ် ကူညီဖေးမပေးရမှာ ဖြစ်ပါတယ်။

အခုလို ဉာဏ်ပညာနဲ့ စိစစ်ထားတဲ့ ကိုယ်ချင်းစာတရားနဲ့ ကူညီပေးခြင်းဟာ တစ်ဖက်သားရဲ့ ဒုက္ခကို အမှန်တကယ် လျော့ပါးစေရုံတင် မကပါဘူး။ သူတစ်ပါးရဲ့ ဒုက္ခကို အခြေပြုပြီး ကိုယ့်ကိုယ်ကိုယ် နှိုင်းယှဉ်ဖေးမနိုင်စွမ်းကြောင့် ကိုယ့်ရဲ့ ဉာဏ်ပညာနဲ့ အသိတရားပါ ပိုမိုတိုးတက် ရင့်ကျက်လာစေမှာ ဖြစ်ပါတယ်။

အရှင်နန္ဒာစာရ
19.8.2026

15/08/2026

🅔🅓🅘🅣 သတ်မှတ်လူဦးရေ ပြည့်သွားပြီမို့ Registration ပိတ်ပါပြီရှင်... စိတ်ဝင်တစား လျှောက်ထားကြတဲ့အတွက် ကျေးဇူးအများကြီးတင်ပါတယ်...🙏😊

***********
𝐑𝐞𝐠𝐢𝐬𝐭𝐫𝐚𝐭𝐢𝐨𝐧 𝐎𝐩𝐞𝐧 𝐍𝐨𝐰!

အောက်ပါ Google Form လင့်ခ်မှတဆင့် 🎓အခြေခံစိတ်ပညာ ပညာဒါနသင်တန်း (Online Class 2/2026)🎓 အတွက် Registration ပြုလုပ်နိုင်ပါပြီ။ 🤗

👉 https://forms.gle/NgCfXq2RK19qVWsH9

❗️Form ဖြည့်ရန် မိမိ၏ Google အကောင့်ကို ဝင်ထားဖို့ လိုပါတယ်။
❗️Email အီးမေးလ်လိပ်စာများကို သေချာစွာ ဖြည့်ပေးပါ။
❗️ဖြည့်သွင်းထားသော အီးမေးလ်လိပ်စာများထံသို့ Registration Form Copy ပြန်ရောက်လာမှသာ စာရင်းဖြည့်သွင်းခြင်း အောင်မြင်ပါတယ်ခင်ဗျာ။

ဒီသင်တန်းလေးဟာဆိုရင် စိတ်ဝင်စားသူအရမ်းများပြားတဲ့အတွက် အချိန်ပိုင်းအတွင်း သတ်မှတ်လူဦးရေ ပြည့်သွားတတ်တာကြောင့် registration link ရရခြင်း အချက်အလက်များဖြည့်၍ ပေးပို့လျှောက်ထားရမှာပါ။

လူဦးရေ (၁၀၀) လက်ခံမှာဖြစ်ပြီး သတ်မှတ်လူဦးရေပြည့်တာနဲ့ Form ကို ပြန်လည်ပိတ်သွားမှာပါခင်ဗျ။

✨ ဆရာတော် အရှင်နန္ဒာစာရက ကြီးမှူးဦးဆောင်ပြီး 𝐓𝐡𝐢𝐬𝐦𝐨𝐦𝐞𝐧𝐭 𝐙𝐨𝐧𝐞 အဖွဲ့ဝင်များမှ အချိန်၊ လုပ်အားဒါန ပါဝင်လှူဒါန်းမျှဝေတဲ့ ပညာဒါနသင်တန်း ဖြစ်တဲ့အပြင် သင်တန်းကာလ စုစုပေါင်း ရက်သတ္တပတ် (၆)ပတ် ကြာမြင့်မှာ ဖြစ်ပါတယ်။

✨ ဆရာတော်ဘုရားရဲ့ စေတနာသဒ္ဓါတရားနဲ့ အချိန်ပေးအားစိုက်ထုတ်၍ ပညာဒါနမျှဝေပေးခြင်းအပေါ် ရိုသေလေးစားသော အားဖြင့်လည်းကောင်း၊ သင်တန်းတက်ရောက်သူ တစ်ဦးချင်းစီရဲ့ သင်ယူလေ့လာမှုမှာ အကျိုးရှိ ထိရောက်စေဖို့အတွက်ပါ သင်တန်းအဆုံးအထိ ပါဝင်နိုင်မှု commitment ပေးနိုင်မှ လျှောက်ထားပေးကြဖို့ မေတ္တာရပ်ခံပါတယ်ဗျ။

သင်တန်းအကြောင်း အသေးစိတ်ကို အောက်ပါလင့်ခ်တွင် ဖတ်ရှုနိုင်ပါတယ်။
https://www.facebook.com/share/p/1HueL9cVFC/

𝗣𝗹𝗲𝗮𝘀𝗲 𝗷𝗼𝗶𝗻 𝗼𝘂𝗿 𝗰𝗵𝗮𝗻𝗻𝗲𝗹𝘀 𝗳𝗼𝗿 𝘂𝗽𝗱𝗮𝘁𝗲𝘀... ⬇️ ⬇️ ⬇️
Telegram: https://t.me/ThismomentZone
YouTube: https://www.youtube.com/
Instagram: https://instagram.com/thismomentzone
Facebook: https://www.facebook.com/ThismomentZone

15/08/2026

🅔🅓🅘🅣 သတ်မှတ်လူဦးရေ ပြည့်သွားပြီမို့ Registration ပိတ်ပါပြီရှင်... စိတ်ဝင်တစား လျှောက်ထားကြတဲ့အတွက် ကျေးဇူးအများကြီးတင်ပါတယ်...🙏😊

***********
🎓အခြေခံစိတ်ပညာ ပညာဒါနသင်တန်း 🎓
(Online Class 2/2026)

မင်္ဂလာပါခင်ဗျာ 😃

𝐓𝐡𝐢𝐬𝐦𝐨𝐦𝐞𝐧𝐭 𝐙𝐨𝐧𝐞 မှ... အရှင်နန္ဒာစာရ (PhD) ဦးဆောင်သင်ကြားပေးတဲ့ "အခြေခံစိတ်ပညာ ပညာဒါနသင်တန်း "𝐈𝐧𝐭𝐫𝐨𝐝𝐮𝐜𝐭𝐢𝐨𝐧 𝐭𝐨 𝐏𝐬𝐲𝐜𝐡𝐨𝐥𝐨𝐠𝐲" ကို သင်ခန်းစာများလေ့လာရာတွင် အချိန် flexible ဖြစ်ဖြစ်၊ video recordings များနဲ့ လေ့လာနိုင်ပြီး... ဆရာတော်နှင့် zoom session မှာ အမေးအဖြေပြန်ဆွေးနွေးနိုင်မဲ့ ပုံစံနဲ့ ထပ်မံဖွင့်လှစ်မှာ ဖြစ်ပါတယ်။

🎯 ဒီသင်တန်းလေးရဲ့ ရည်ရွယ်ချက်ကတော့ အနောက်တိုင်းစိတ်ပညာကို စနစ်တကျ လေ့လာလိုသူများ၊ သုတေသနနယ်ပယ်မှာ ခြေချ၍ အသေးစိတ်လေ့လာလိုသူများအတွက် အခြေခံရစေဖို့... စိတ်ပညာရဲ့ သဘောသဘာဝများကို သိရှိပြီး လူ့အဖွဲ့အစည်းအတွင်း ကရုဏာကို အခြေခံတဲ့အသိပညာများ ပြန့်ပွားစေဖို့... ဖြစ်ပါတယ်။

🔰 ဘယ်သူတွေ တက်ရောက်သင့်ပါလဲ?

✨ အနောက်တိုင်းစိတ်ပညာအကြောင်း အခြေခံကစ၍ သိရှိလိုသူများ
✨ စိတ်ပညာကို စိတ်ဝင်စား၍ နေ့စဉ်ဘဝမှာ မှန်မှန်ကန်ကန်အသုံးချလိုသူများ တက်ရောက်သင့်ပါတယ်။

🔰 သင်တန်းစာများကို ဘယ်လိုလေ့လာရမလဲ?

အပတ်စဉ် တနင်္လာနေ့တိုင်း ထိုတစ်ပတ်အတွက် လေ့လာရမဲ့ သင်ခန်းစာ(၂)ခုကို Google classroom မှာ လင့်ခ်များ ဖွင့်ပေးမှာပါ။ တစ်ပတ်အတွင်း ကိုယ်အဆင်ပြေတဲ့အချိန်မှာ ဝင်ရောက်လေ့လာနိုင်ပါမယ်။ သင်ခန်းစာတစ်ခုအတွက် ပျှမ်းမျှ (၂)နာရီနှုန်းနဲ့ လေ့လာပြီး ထိုသင်ခန်းစာနှင့်သက်ဆိုင်သော အမေးအဖြ quizzes များကို ပေးထားတဲ့ google form link များမှတဆင့် ဖြေပေးရမှာ ဖြစ်ပါတယ်။
‼️တစ်ပတ်အတွက် လေ့လာရန်ဖြစ်သော သင်ခန်းစာ(၂)ခုရဲ့ quizzes များကို ဖြေဆိုပြီးချိန်မှ နောက်တစ်ပတ်တနင်္လာနေ့မှာ နောက်ထပ်သင်ခန်းစာဗီဒီယိုလင့်ခ်များ ထပ်မံရရှိမှာပါ။
‼️သင်ခန်းစာအားလုံးတွင် အနောက်တိုင်းစိတ်ပညာဆိုင်ရာ ဝေါဟာရအသုံးအနှုံးများ ပါဝင်မှာဖြစ်လို့ အခြေခံအင်္ဂလိပ်ဘာသာ နားလည်တတ်ကျွမ်းမှု လိုအပ်ပါတယ်။

🔰 သင်တန်းကာလ?

၂ဝ၂၆ သြဂုတ် (၁၇)ရက်နေ့မှာ စတင်ပြီး စက်တင်ဘာလ (၂၅)ရက်မှာ ပြီးဆုံးမှာဖြစ်လို့၊ သင်တန်းကာလမှာ ရက်သတ္တပတ် (၆)ပတ်နီးပါး ကြာမြင့်မှာဖြစ်ပါတယ်။
‼️အတန်းအတွက် Orientation Day၊ ဆရာတော် အရှင်နန္ဒာစာရနှင့် အမေးအဖြေအတွက် Zoom session (၂)ချိန် စုစုပေါင်း Zoom session (၃)ခုကိုလည်း တက်ရောက်ပေးဖို့ လိုအပ်ပါတယ်။

🔰 သင်တန်းဘယ်လိုအပ်ရမလဲ?

သင်တန်းအတွက် Registration Form ကို
ယနေ့ည 👉 သြဂုတ် (၁၅)ရက် ည(၇)နာရီ 👈မှာ
𝐓𝐡𝐢𝐬𝐦𝐨𝐦𝐞𝐧𝐭 𝐙𝐨𝐧𝐞 ရဲ့ 𝐅𝐚𝐜𝐞𝐛𝐨𝐨𝐤 𝐏𝐚𝐠𝐞 နဲ့ 𝐓𝐞𝐥𝐞𝐠𝐫𝐚𝐦 များကနေပြီး တပြိုင်တည်း ဖွင့်လှစ်ပေးမှာပါ။

သင်တန်းသားဦးရေ (၁၀၀)သာ လက်ခံမှာမို့ သတ်မှတ်လူဦးရေပြည့်တာနဲ့ Form ကို ပြန်လည်ပိတ်သွားမှာဖြစ်ပါတယ်။ မြန်မြန်လျှောက်ထားဖို့နဲ့ Registration Post လေးကို မလွတ်သွားရအောင် 𝐓𝐡𝐢𝐬𝐦𝐨𝐦𝐞𝐧𝐭 𝐙𝐨𝐧𝐞 𝐏𝐚𝐠𝐞 ကို စောင့်ကြည့်နေပေးဖို့ မေတ္တာရပ်ခံချင်ပါတယ်ဗျ။

သိချင်တာများရှိရင်တော့ 𝐓𝐡𝐢𝐬𝐦𝐨𝐦𝐞𝐧𝐭 𝐙𝐨𝐧𝐞 Facebook Messenger ကတဆင့် မေးမြန်းနိုင်ပါတယ်ခင်ဗျာ။ 🤗

𝗣𝗹𝗲𝗮𝘀𝗲 𝗷𝗼𝗶𝗻 𝗼𝘂𝗿 𝗰𝗵𝗮𝗻𝗻𝗲𝗹𝘀 𝗳𝗼𝗿 𝘂𝗽𝗱𝗮𝘁𝗲𝘀... ⬇️ ⬇️ ⬇️

Telegram: https://t.me/ThismomentZone
YouTube: https://www.youtube.com/
Instagram: https://instagram.com/thismomentzone
Facebook: https://www.facebook.com/ThismomentZone

14/08/2026

🧘‍♀️𝐒𝐩𝐢𝐫𝐢𝐭𝐮𝐚𝐥 𝐎𝐚𝐬𝐢𝐬: 𝐌𝐢𝐧𝐝𝐟𝐮𝐥 𝐁𝐨𝐝𝐲 𝐒𝐜𝐚𝐧 𝐒𝐞𝐬𝐬𝐢𝐨𝐧𝐬🧘
[5-day Program]

ဒီနေ့ ၁၄.၈.၂၀၂၆ (သောကြာနေ့) ​မှာ 𝐌𝐢𝐧𝐝𝐟𝐮𝐥 𝐁𝐨𝐝𝐲 𝐒𝐜𝐚𝐧 𝐒𝐞𝐬𝐬𝐢𝐨𝐧 (Session 5) ရှိပါတယ်ဆိုတဲ့ Reminder ပို့စ် လေးပါရှင်။။🙌☺️

[5-day Program] ရဲ့ နောက်ဆုံးရက်လည်း ဖြစ်ပါတယ်နော်။

Session ကို join ရန် Public Zoom link ဖွင့်ထားပေးမှာ ဖြစ်ပါတယ်။

ပုံထဲက Zoom ID ကတဆင့် Session လေးကို join လို့ရပါတယ်ရှင်။

ဒီ sessions တွေကို စိတ်ငြိမ်းချမ်းမှုရရှိရန် အခြေခံဖြစ်သော "မိမိကိုယ်နှင့်စိတ်ကို သတိပြုမိခြင်း" ဖြစ်စေဖို့အတွက် ရည်ရွယ်ပြုလုပ်ရခြင်း ဖြစ်ပါတယ်။ Session မှာ ဆုံကြပါမယ်နော်။ 🤗

𝗣𝗹𝗲𝗮𝘀𝗲 𝗷𝗼𝗶𝗻 𝗼𝘂𝗿 𝗰𝗵𝗮𝗻𝗻𝗲𝗹𝘀 𝗳𝗼𝗿 𝘂𝗽𝗱𝗮𝘁𝗲𝘀... ⬇️ ⬇️ ⬇️
Telegram: https://t.me/ThismomentZone
YouTube: https://www.youtube.com/
Instagram: https://instagram.com/thismomentzone
Facebook: https://www.facebook.com/ThismomentZone

12/08/2026

💫 လျစ်လျူမရှုလိုက်သင့်တဲ့ စိတ်ခံစားမှုတွေ.... 🍃

“စိတ်ခံစားမှု”လို့ ပြောလိုက်ရင် တော်တော်များများက သာမန်အပေါ်ယံ အမှုမဲ့အမှတ်မဲ့ပဲ သဘောထားတတ်ကြပါတယ်။ ဒီလိုအရေးမကြီးသလို သဘောထားရုံသာမက စိတ်ခံစားမှုတွေကို မကောင်းတဲ့အရာတွေအဖြစ်လည်း ရှုမြင်တတ်ကြပါသေးတယ်။

အထူးသဖြင့် ယောက်ျားလေးတွေ စိတ်ခံစားမှုတွေကို ဖော်ပြတဲ့အခါ.... “ယောက်ျားမဟုတ်ဘူးလား.... ယောက်ျားဆိုတာ သန်သန်မာမာနေရမယ်” စသဖြင့် ပြောမိတတ်ကြတယ်။ အဲဒီလို စိတ်ခံစားမှုတွေကို ဖော်ပြတာကပဲ ပျော့ညံ့သလိုလို.... အားနည်းသလိုလို မြင်မိတတ်ကြပါတယ်။

တကယ်တော့ လူရယ်လို့ဖြစ်လာပြီဆိုရင် စိတ်ခံစားမှုတွေဖြစ်တယ်ဆိုတာ သဘာဝပါပဲ။ ဒါ့အပြင် ကျွန်တော်တို့ရဲ့ နေ့စဉ်ဘဝမှာ ဒီစိတ်ခံစားမှုတွေဟာ ကြီးမားတဲ့သက်ရောက်မှုရှိပါတယ်။ လူတော်တော်များများဟာ သူတို့ ပျော်သလား.... ဝမ်းနည်းသလား.... တက်ကြွမှုဖြစ်သလား..... ပျင်းရိငြီးငွေ့သလား... စတဲ့ စိတ်ခံစားမှုတွေပေါ်မူတည်ပြီး ဆုံးဖြတ်ချက်တွေကို ချတတ်ပါတယ်။

ဒါကြောင့် စိတ်ခံစားမှုတွေကို သတိရှိရှိသိပြီး စိတ်ခံစားမှုတွေရဲ့ သဘာဝကို နားလည်အောင်လုပ်တာဟာ ကျွန်တော်တို့ရဲ့ဘဝကို အသိဉာဏ်နဲ့ယှဉ်ပြီးနေထိုင်နိုင်ဖို့ အများကြီး အထောက်အကူဖြစ်စေပါတယ်။

🔘 စိတ်ခံစားမှုတွေကိုဖြစ်စေတဲ့ အကြောင်းအရင်းတွေ....

◾️ရိုးရိုးရှင်းရှင်းစဉ်းစားကြည့်မယ်ဆိုရင်တော့ စိတ်ခံစားမှုတွေကို အဓိကဖြစ်စေတဲ့အကြောင်းရင်းက “အတွေးတွေ” ပါပဲ။ ရှေ့ကတွေးမိလိုက်တဲ့ အတွေးအာရုံတွေအပေါ်မူတည်ပြီး နောက်ကနေ ပျော်တယ်.... ဝမ်းနည်းတယ်..... ဒေါသဖြစ်တယ်ဆိုတဲ့ စိတ်ခံစားမှုတွေဖြစ်ရတာပါ။

◾️အတွေးတွေနဲ့ စိတ်ခံစားမှုတွေအပေါ် သက်ရောက်မှုရှိတဲ့ တခြားသောအကြောင်းတရားတွေကတော့.....

- ကိုယ်ရည်ကိုယ်သွေး
- ယဉ်ကျေးမှုအစဉ်အလာ
- ရာသီဥတု
- စိတ်ဖိစီးမှု
- အသက်အရွယ်
- လိင်အမျိုးအစား (ကျား/မ/.....)
- ပတ်ဝန်းကျင် စတာတွေပဲဖြစ်ပါတယ်။

🔘 "စိတ်ခံစားမှုတွေကို လျစ်လျူရှုမိရင်...."

◾️လူတွေမှာ နေ့စဉ်နေ့အမျှ စိတ်ခံစားမှုတွေ အကြောင်းတိုက်ဆိုင်တဲ့အခါတိုင်း ဖြစ်နေကြပါတယ်။ စိတ်ခံစားမှုတွေကို သတိထားကြည့်လိုက်မယ်ဆိုရင် တချို့ခံစားမှုတွေ (ဥပမာ- ပျော်ရွှင်မှု၊ ကြည်နူးမှု၊ အေးချမ်းမှုတွေ....) က ခံစားလို့ကောင်းပြီး တချို့ခံစားမှုတွေ (ဥပမာ- ဝမ်းနည်းမှု၊ ပူလောင်မှု၊ မွန်းကြပ်မှုတွေ....) က များသောအားဖြင့် ခံစားလို့ မကောင်းတတ်ပါဘူး။

◾️အဲဒီထဲမှာမှ ခံစားလို့မကောင်းတဲ့ စိတ်ခံစားမှုတွေကို “မကောင်းတဲ့ခံစားမှုတွေ.... Negative Emotions” တွေအနေနဲ့ သတ်မှတ်လိုက်တတ်ကြပြီး ဘယ်သူမှ လိုလိုချင်ချင်နဲ့ လက်မခံချင်ကြပါဘူး။

◾️လက်မခံချင်တော့ ဘယ်လိုလုပ်သလဲ...❓

တချို့က လျစ်လျူရှုလိုက်တယ်။ ဘာမှမဖြစ်သလို နေလိုက်တယ်။ အပြင်မှာတော့ အားလုံးအဆင်ပြေပါတယ်ပေါ့....။ တကယ့်တကယ် သူ့စိတ်ထဲမှာတော့ အဆင်ပြေမနေဘူး။

တချို့ကျတော့လည်း အဲဒီလို မကောင်းဘူးလို့သတ်မှတ်ထားတဲ့ စိတ်ခံစားမှုတွေမဖြစ်အောင် အတင်းငြင်းပယ်ကြတယ်။ ခက်တာက အဲဒီလို မဖြစ်အောင်ငြင်းပယ်လေ.... ပိုဖြစ်လေလေပါပဲ။

◾️စိတ်ခံစားမှုတွေကို လျစ်လျူရှုပြီး ဖုံးဖိထားတာပဲဖြစ်ဖြစ်.... လက်မခံဘဲ ငြင်းဆန်နေတာပဲဖြစ်ဖြစ်.... ရေရှည်မှာ သင့်ရဲ့ စိတ်ကျန်းမာရေးအတွက် မကောင်းပါဘူး။ အဲလိုဖုံးဖိထားလို့ လောလောဆယ်အဆင်ပြေတယ်ဆိုရင်တောင် ကြာရင်ဖုံးဖိထားတဲ့ခံစားမှုတွေက ပွင့်ထွက်လာပြီး မလိုလားအပ်တဲ့ ဘေးထွက်ဆိုးကျိုးတွေ ဖြစ်လာနိုင်တယ်။ မဆိုင်တဲ့လူတွေအပေါ်မှာလည်း သွားပြီး သွန်ချလိုက်မိတတ်ပါသေးတယ်။

ဒီတော့ စိတ်ခံစားမှုတွေကို မှန်မှန်ကန်ကန် ထိန်းကျောင်တတ်ဖို့ လိုအပ်လာပါပြီ။

📌 စိတ်ခံစားမှုတွေကို ဘယ်လိုထိန်း‌ကျောင်းရမလဲ?

(၁) Mindfulness လေ့ကျင့်ပါ 🍃

◾️စိတ်ခံစားမှုတွေကို မှန်မှန်ကန်ကန်ထိန်းကျောင်းနိုင်စေဖို့ ကိုယ့်စိတ်ထဲမှာ ဘယ်လိုခံစားမှုလေးတွေ ဖြစ်နေလဲဆိုတာ အရင်ဆုံးသိဖို့လိုအပ်ပါတယ်။ အဲဒီလိုသိဖို့ဆိုရင် သတိနဲ့ နေတဲ့အလေ့အကျင့် “Mindfulness” ဟာ တော်တော်လေးအထောက်အကူပေးနိုင်ပါတယ်။

◾️Mindfulness လို့ဆိုတဲ့ နေရာမှာ အချိန်တစ်ခုသတ်မှတ်ပြီး စနစ်တကျတရားထိုင်တာလည်းပါသလို ဘာပဲလုပ်လုပ် ကိုယ်လုပ်နေတဲ့အလုပ်ကလေး‌ကို သတိလေးနဲ့ အာရုံစိုက်ပြီးလုပ်တာဟာလည်း Mindfulness ပါပဲ။ ဒီလို ဘာလုပ်လုပ် သတိလေးနဲ့လုပ်နိုင်လာတဲ့အခါ ကိုယ့်စိတ်မှာ ခံစားမှုတွေဖြစ်လာရင် အလိုလိုပဲ သတိထားမိလာပါလိမ့်မယ်။

◾️သတိထားမိတဲ့ခံစားမှုတွေကို ကောင်းတယ်... ဆိုးတယ်... မဝေဖန်ဘဲ သူတို့ရဲ့သဘောသဘာဝလေးကို သိအောင်စူးစမ်းတဲ့အနေနဲ့ပဲ ဆက်ကြည့်လိုက်ပါ။

ဥပမာ- ဒေါသဆိုတဲ့စိတ်ခံစားမှုလေးဖြစ်သွားတဲ့အခါ စိတ်ထဲမှာ ဘယ်လိုလေးခံစားရလဲ.... ဘယ်လိုပြောင်းလဲမှုလေးတွေဖြစ်လာလဲ....။ ဒါကိုပဲသိချင်စိတ်နဲ့ကြည့်နေတဲ့အခါ စိတ်ခံစားမှုတွေဟာလည်း အမြဲတမ်းဖြစ်နေတာမဟုတ်ဘဲ မကြာခဏပြောင်းလဲနေတာကို ကိုယ်တိုင်သိလာပါလိမ့်မယ်။

(၂) မိမိကိုယ်ကိုယ် Reflect လုပ်ပါ 📝

◾️နေ့တစ်နေ့ပြီးသွားတိုင်းမှာ ကိုယ်ဘယ်လိုစိတ်ခံစားမှုလေးတွေ ခံစားခဲ့ရလဲဆိုတာကို ပြန်ပြီး Reflect လုပ်ဖို့ စာအုပ်လေးသပ်သပ် ထားထားပါ။ အဲဒီစာအုပ်လေးထဲမှာ မနက်ကနေ ညအထိ ဘယ်အချိန်မှာတော့ ဘယ်လိုခံစားမှုလေးတွေ ခံစားခဲ့ရတယ်ဆိုတာကို ရေးပြီး ကိုယ့်ကိုယ်ကိုယ် ပြန်သုံးသပ်ကြည့်ပါ။

◾️ဒီလို စာချရေးပြီး Reflect လုပ်တဲ့အကျင့်လေးရလာတဲ့အခါ ကိုယ့်ရဲ့ခံစားမှုတွေဖြစ်လာတာနဲ့ တန်းပြီး သတိပြုမိလာပါလိမ့်မယ်။ ခံစားမှုတွေရဲ့သဘောက သူတို့ကို မသိလိုက်တဲ့အခါ စိတ်ကိုလွှမ်းမိုးနိုင်ပေမဲ့ သူတို့ကို သတိထားမိပြီး သိနေတဲ့အခါမှာတော့ စိတ်ကို အလွယ်တကူ မလွှမ်းမိုးနိုင်တော့ပါဘူး။

နောက်ပိုင်းမှာ စိတ်ခံစားမှုလေးပေါ်လာတိုင်း သတိထားမိပြီး အသိအမှတ်ပြုပေးနိုင်မယ်ဆိုရင် အဲဒီစိတ်ခံစားမှုလေးဟာလည်း သူ့သဘာဝအတိုင်း အလိုလို ကွယ်ပျောက်သွားတာကို ကိုယ်တိုင်မြင်လာပါလိမ့်မယ်။

(၃) စိတ်ခံစားမှုတွေကို ဖော်ပြပါ 💬

◾️စကားပြောတဲ့အခါ ကိုယ့်ရဲ့စိတ်ထဲမှာရှိနေတဲ့ ခံစားမှုလေးတွေကို တခြားသူကို ပြောပြပါ။ အစမှာတော့ ဒီလိုပြောပြဖို့ ခက်ခဲနိုင်ပါတယ်။ ဒါကြောင့် ကိုယ့်စိတ်မှာ လုံခြုံမှုရှိတဲ့သူ၊ ကိုယ့်ကို Judge မလုပ်မဲ့သူတွေရှေ့မှာ အရင်ဆုံးလေ့ကျင့်ကြည့်ပါ။

◾️စိတ်ခံစားမှုတွေကို ပြောပြတဲ့အခါမှာ သူ့ကို အပြစ်တင်တဲ့ပုံစံမျိုး မပြောမိအောင်သတိထားဖို့တော့ လိုပါတယ်။ ဒါကြောင့် ကိုယ့်အကြောင်းကိုဖော်ပြတဲ့ပုံစံနဲ့ပဲပြောပါ။

ဥပမာ- “မင်းကြောင့် ငါဒေါသထွက်သွားတယ်” ဆိုတာထက်.... “အဲဒီလို အပြုအမူမျိုးလုပ်လိုက်တဲ့အချိန်မှာ ငါ့ရဲ့စိတ်ထဲမှာ ဒေါသဖြစ်သွားတယ်” ဆိုတာမျိုးပြောကြည့်ပါ။

◾️အကယ်၍ ကိုယ့်မှာ အဲလိုပြောစရာလူမရှိဘူးဆိုရင်လည်း စာလုံးလေးတွေ၊ ရုပ်ပုံလေးတွေကတစ်ဆင့် ကိုယ့်ရဲ့ စိတ်ခံစားမှုလေးတွေကို ဖော်ပြလို့ရပါတယ်။ ဒီလိုဖော်ပြဖို့ စာရေးဆရာကြီးဖြစ်စရာမလိုသလို ပန်းချီဆွဲတတ်ဖို့လည်း မလိုအပ်ပါဘူး။ အဓိကက ကိုယ့်စိတ်ထဲမှာ ဖြစ်သွားတဲ့ ခံစားမှုလေးတွေ ကို ဖော်ပြဖို့ ကြားခံအနေနဲ့ အသုံးပြုနိုင်ဖို့ပါပဲ။

(၄) အကူအညီရယူပါ 💟

◾️အခုအချိန်မှာ စိတ်ကျန်းမာရေးနဲ့ပတ်သက်လို့ “အခမဲ့” ကူညီပေးနေတဲ့ အဖွဲ့အစည်းတွေ အများကြီး ပေါ်ပေါက်လာပါပြီ။ ဒီနေရာမှာ တစ်ခုသတိပေးချင်တာက အဲဒီလို‌စိတ်ကျန်းမာရေးအတွက် အကူအညီရယူတာဟာ ရှက်စရာ လုံးဝ မဟုတ်ပါဘူး။ ရုပ်ခန္ဓာကြီးနေမကောင်းရင် ဆေးခန်းသွားပြရသလိုပဲ ကိုယ့်စိတ်ကလေး နေမကောင်းရင်လည်း အကူအညီရယူဖို့လိုအပ်ပါတယ်။

◾️ဒါဟာ ဒီနိုင်ငံမှာသာ အခုမှလူသိများလာတဲ့ အသစ်အဆန်းတစ်ခုလိုဖြစ်ပေမဲ့ အမေရိကန်လို တိုးတက်ပြီး စိတ်ဖိစီးမှုအင်မတန်များတဲ့ နိုင်ငံတွေမှာတော့ သာမန်လုပ်ရိုးလုပ်စဉ် ကိစ္စတစ်ခုလို ဖြစ်နေပါပြီ။ ဒါကြောင့် စိတ်ကျန်းမာရေးအကူအညီရယူဖို့ ဘာမှရှက်စရာ မလိုပါဘူး။

💟 Thismoment Zone မှာဆိုရင်လည်း စိတ်ကျန်းမာရေးနဲ့ပတ်သက်တဲ့ အကူအညီတွေရယူနိုင်စေဖို့.....

✅ Support Group လေးတွေ၊
✅ Mindfulness Workshop လေးတွေ စီစဉ်ပေးနေတာရှိပါတယ်။

ဒီလို Workshop လေးတွေ၊ Support Group လေးတွေကို Join ပြီး ကိုယ့်ရဲ့စိတ်ပိုင်းဆိုင်ရာကောင်းမွန်မှုအတွက် အကူအညီတွေ အခမဲ့ရယူနိုင်ပါတယ်။

ဒီလောက်ဆိုရင်တော့ စိတ်ခံစားမှုလေးတွေကို ပေါ့ပေါ့ဆဆ လျစ်လျူမရှုမိဖို့ အရေးကြီးတယ်ဆိုတာနဲ့ စိတ်ခံစာမှုတွေကို မှန်မှန်ကန်ကန်ထိန်းကျောင်းနိုင်မဲ့ နည်းလမ်းလေးတွေကို သိသွားလောက်ပြီလို့ထင်ပါတယ်။

အားလုံးပဲ မိမိတို့ရဲ့စိတ်ခံစားမှုတွေကို သတိရှိရှိအသိအမှတ်ပြုပြီး မှန်မှန်ကန်ကန်ထိန်းကျောင်းနိုင်ပါစေ.....💗

- ကိုသက်ကျော် -

09/08/2026

🧘‍♀️𝐒𝐩𝐢𝐫𝐢𝐭𝐮𝐚𝐥 𝐎𝐚𝐬𝐢𝐬: 𝐌𝐢𝐧𝐝𝐟𝐮𝐥 𝐁𝐨𝐝𝐲 𝐒𝐜𝐚𝐧 𝐒𝐞𝐬𝐬𝐢𝐨𝐧𝐬🧘
[5-day Program]

ဒီနေ့ ၉.၈.၂၀၂၆ (တနင်္ဂနွေနေ့) ​မှာ 𝐌𝐢𝐧𝐝𝐟𝐮𝐥 𝐁𝐨𝐝𝐲 𝐒𝐜𝐚𝐧 𝐒𝐞𝐬𝐬𝐢𝐨𝐧 (Session 4) ရှိပါတယ်ဆိုတဲ့ Reminder ပို့စ် လေးပါရှင်။ 🙌☺️

Session ကို join ရန် Public Zoom link ဖွင့်ထားပေးမှာ ဖြစ်ပါတယ်။

အခုမှ စပြီး Session လေးကို join ချင်သူများကလည်းပုံထဲက Zoom ID ကတဆင့် အဆင်ပြေတဲ့ရက်ကို ရွေးပြီးဖြစ်စေ၊ ရက်အားလုံးဖြစ်စေ join လို့ရပါတယ်ရှင်။

ဒီ sessions တွေကို စိတ်ငြိမ်းချမ်းမှုရရှိရန် အခြေခံဖြစ်သော "မိမိကိုယ်နှင့်စိတ်ကို သတိပြုမိခြင်း" ဖြစ်စေဖို့အတွက် ရည်ရွယ်ပြုလုပ်ရခြင်း ဖြစ်ပါတယ်။ Session မှာ ဆုံကြပါမယ်နော်။ 🤗

06/08/2026

🧘‍♀️𝐒𝐩𝐢𝐫𝐢𝐭𝐮𝐚𝐥 𝐎𝐚𝐬𝐢𝐬: 𝐌𝐢𝐧𝐝𝐟𝐮𝐥 𝐁𝐨𝐝𝐲 𝐒𝐜𝐚𝐧 𝐒𝐞𝐬𝐬𝐢𝐨𝐧𝐬🧘
[5-day Program]

ဒီနေ့ ၇.၈.၂၀၂၆ (သောကြာနေ့)မှာ 𝐌𝐢𝐧𝐝𝐟𝐮𝐥 𝐁𝐨𝐝𝐲 𝐒𝐜𝐚𝐧 𝐒𝐞𝐬𝐬𝐢𝐨𝐧 (Session 3) ရှိပါတယ်ဆိုတဲ့ Reminder ပို့စ် လေးပါရှင်။ 🙌☺️

Session ကို join ရန် Public Zoom link ဖွင့်ထားပေးမှာ ဖြစ်ပါတယ်။

အခုမှ စပြီး Session လေးကို join ချင်သူများကလည်း First Comment ပုံထဲက Zoom ID ကတဆင့် အဆင်ပြေတဲ့ရက်ကို ရွေးပြီးဖြစ်စေ၊ ရက်အားလုံးဖြစ်စေ join လို့ရပါတယ်ရှင်။

ဒီ sessions တွေကို စိတ်ငြိမ်းချမ်းမှုရရှိရန် အခြေခံဖြစ်သော "မိမိကိုယ်နှင့်စိတ်ကို သတိပြုမိခြင်း" ဖြစ်စေဖို့အတွက် ရည်ရွယ်ပြုလုပ်ရခြင်း ဖြစ်ပါတယ်။

Session မှာ ဆုံကြပါမယ်နော်။ 🤗

𝗣𝗹𝗲𝗮𝘀𝗲 𝗷𝗼𝗶𝗻 𝗼𝘂𝗿 𝗰𝗵𝗮𝗻𝗻𝗲𝗹𝘀 𝗳𝗼𝗿 𝘂𝗽𝗱𝗮𝘁𝗲𝘀... ⬇️ ⬇️ ⬇️
Telegram: https://t.me/ThismomentZone
YouTube: https://www.youtube.com/
Instagram: https://instagram.com/thismomentzone
Facebook: https://www.facebook.com/ThismomentZone

Mental Health / Mindfulness Practitioners........ Focused on Mindfulness & Holistic Wellbeing........