01/02/2026
ပြည်သူလူထုထံသို့ မတရားအာဏာသိမ်းခံရမှု (၅)နှစ်ပြည့် ထုတ်ပြန်ကြေညာချက်
ရက်စွဲ။ ။၂၀၂၆ခုနှစ်၊ ဖေဖော်ဝါရီလ၊ (၁) ရက်
၂၀၂၆ခုနှစ်၊ ဖေဖော်ဝါရီလ (၁)ရက်နေ့သည် အကြမ်းဖက်စစ်ကော်မရှင်၏ မတရားအာဏာသိမ်းမှု (၅)နှစ်တိုင်ပြည့်မြောက်ခဲ့ပြီ။ ထို (၅)နှစ်တာကာလအတွင်း တော်လှန်ရေးလှိုင်းတံပိုးများ ရိုက်ခတ်သည့်ကြားမှ ပြည်သူလူထုကြီး၏ ထည့်ဝင်ပေးဆပ်မှုများသည် အလေးအမြတ်ပြုဖွယ်ရာပင်ဖြစ်သည်။
အာဏာသိမ်းအကြမ်းဖက်စစ်တပ်၏ လူမဆန်စွာ သတ်ဖြတ်မှုများ၊ နေ့စဥ်နဲ့အမျှ ကျူးလွန်နေသော စစ်ရာဇဝတ်မှုများကြောင့် ပြည်သူအများ စစ်ဘေးရှောင်ဘဝသို့ ရောက်လာရသည့်အပြင် မတရားစစ်မှုထမ်းဥပဒေဖြင့် ပြည်သူ ပြည်သူချင်း သတ်ဖြတ်ခိုင်းသောကြောင့် တိုင်းပြည်၏ အနာဂတ်လူငယ်များ၏ အသက်၊ သွေးနှင့် အနာဂတ်တို့ တစတစတိမ်မြုပ်ပျောက်ကွယ်နေရသည်လည်းဖြစ်ပါသည်။
၎င်းအာဏာသိမ်းစစ်တပ်သည် မိမိတို့၏ အာဏာတည်မြဲရေးနဲ့ ပြည်သူအများ၏ လူနေမှုအဆင့်အတန်းမြင့်မားလာရေးဟူသော လီဆယ်စကားများဖြင့် ရွေးကောက်ပွဲအတုအယောင် ဦးဆောင်ကျင်းပကာ လူထုကိုယ်စားပြုမှု၊ နိုင်ငံတကာအသိအမှတ်ပြုမှုကို တောင်းခံနေခြင်းလည်းဖြစ်ပြီး အဖက်ဖက်မှ အင်အားချည့်နဲ့လာသော အခြေအနေအရပ်ရပ်ကို ကျားကန်နိုင်ဖို့ ကျင်းပသော မည်သည့်ရွေးကောက်ပွဲကိုမှ အသိအမှတ်ပြု လက်ခံခြင်းမပြုကြရန် ပြည်သူလူထုကြီးအား အလေးအနက် တိုက်တွန်းလိုပါသည်။
ကျွန်ုပ်တို့ ပုလဲလူထုသပိတ်တိုက်ပွဲဦးဆောင်ကော်မတီအနေဖြင့် တော်လှန်ရေးအင်အားစုများအတွင်း
ကိုယ်ကျိုးစီးပွားနှင့် ပုဂ္ဂိုလ်ရေးအာဏာတည်ဆောက်မှုများ၊ တော်လှန်ရေးလမ်းကြောင်းမှ သွေဖည်လာမှုများကို လူထုအားဖြင့် တတ်အားသရွေ့ ထိန်းကျောင်းတည့်မတ်သွားမည်ဖြစ်ပြီး
လူထုကိုဗဟိုပြုသော၊ လူထုကိုအလုပ်အကျွေးပြုသော၊ နိုင်ငံရေး-စစ်ရေး ဟန်ချက်ညီညီပေါင်းစပ်နိုင်ရေးကိုရှေုးရှုသော အခင်းအကျင်းတရပ်ပေါ်ပေါက်လာရေးအတွက် ကျသည့်နေရာမှ ပါဝင်ဆောင်ရွက်သွားမည်လည်း ဖြစ်ပါသည်။
ပြည်သူလူထုတရပ်လုံး၏ မျှော်ရည်ချက်ဖြစ်သည့် စစ်အာဏာရှင်အမြစ်ပြတ်ရေးနှင့် ဖက်ဒရယ်ဒီမိုကရေစီပြည်ထောင်စုတည်ဆောက်ရေးဟူသော ဘုံရည်မှန်းချက် ပြည့်မြောက်သည်အထိ ဆက်လက်တိုက်ပွဲဝင်သွားမည်ဖြစ်ကြောင်း အသိပေးထုတ်ပြန်အပ်ပါသည်။
တော်လှန်ရေးသစ္စာဖြင့်
ပုလဲလူထုသပိတ်တိုက်ပွဲဦးဆောင်ကော်မတီ
