11/05/2023
သတိထားကတ်ရပါဖို့
ကြိုတင်ပြင်ဆင်မှုတိဟိဖို့လိုပါယေ
■ မုန်တိုင်း မိုခါ ကို အနီရောင်အဆင့်သတ်မှတ်၊ ရခိုင်တွင် လူပေါင်း ၉ သိန်းကျော် ထိခိုက်နိုင်
Western News| မေ ၁၁
ဘင်္ဂလားပင်လယ်အော်တွင် ဖြစ်ပေါ်နေသော အားကောင်းသော မိုခါ မုန်တိုင်း ကို အနီရောင်အဆင့် သတ်မှတ်လိုက်ပြီး ရခိုင်ပြည်မှ လူဦးရေ ၉၃၀,၀၀၀ ကျော် ထိခိုက်နိုင်ကြောင်း ကမ္ဘာ့သဘာဝဘေး သတိပေးချက်ထုတ်ပြန်ခြင်းနှင့် ပူးပေါင်းဆောင်ရွက်မှုစနစ် က ယနေ့ မေ ၁၁ ရက်တွင် ထုတ်ပြန်သည်။
ကမ္ဘာ့သဘာဝဘေး သတိပေးချက်ထုတ်ပြန်ခြင်းနှင့် ပူးပေါင်းဆောင်ရွက်မှုစနစ် (Global Disaster Alert and Coordination SYSTEM − GDACS) က ယနေ့ မေ ၁၁ ရက် တွင် ထုတ်ပြန်ချက်တွင် ရခိုင်ပြည် ကျောက်ဖြူမြို့နှင့် ဘင်္ဂလားဒေ့ရှ့် နိုင်ငံ ကော့ဘဇားဒေသသို့ ဝင်ရောက်ရန် ဦးတည်နေသည့် အဆိုပါ မုန်တိုင်းသည် တစ်နာရီလျှင် ၁၀၃ မိုင်ကျော် တိုက်ခတ်နိုင်ကြောင်း ခန့်မှန်းထားသည်။
မုန်တိုင်းဝင်ရောက်စဉ် ရခိုင်ပြည်မှ လူဦးရေ ၉၃၀,၀၀၀ ကျော်၊ နှင့် စစ်ကိုင်းတိုင်းမှ လူဦးရေ ၄၄၀,၀၀၀နှင့် မကွေးတိုင်းအတွင်းမှ လူဦးရေ ၁၇၀,၀၀၀ တို့သည် အန္တရာယ်ရှိသည့် လေပြင်းတိုက်ခတ်မှုများ ခံရနိုင်သည်ဟု GDACS က ဆိုသည်။
မိုး/ဇလ၏ ယနေ့ နံနက် ၆ နာရီခွဲတိုင်းတာချက်များအရ ဘင်္ဂလားပင်လယ်အော် အရှေ့တောင်ပိုင်းတွင် ဖြစ်ပေါ်နေသော အားကောင်းသော မုန်တိုင်းငယ် (Deep Depression) သည် မြောက်-အနောက်မြောက်ဘက်သို့ ရွေ့လျားခဲ့ပြီး၊ ပိုမို အားကောင်းလာကာ ဆိုင်ကလုန်းမုန်တိုင်း (Cyclonic Strom) “မိုခါ (MOCHA) ”အဖြစ်သို့ ရောက်ရှိနေပြီဟု သိရသည်။
ကော့ဘဇားဒေသနှင့် ကျောက်ဖြူမြို့တို့ကြားမှ ဖြတ်ကျော်စဉ် အမြင့်ဆုံးလေတိုက်နှုန်းမှာ တစ်နာရီလျှင် မိုင် ၉၀ မှ ၁၀၀ ခန့်အထိ တိုက်ခတ်နိုင်ကြောင်း မိုးလေဝသနှင့် ဇလဗေဒဦးစီးဌာနက ထုတ်ပြန်ထားသည်။
အနည်းဆုံး တစ်နာရီ မိုင် ၄၀ အထိ လေပြင်းတိုက်ခိုက်မှုဒဏ်ကိုခံရနိုင်သော မြန်မာနိုင်ငံက လူဦးရေ စုစုပေါင်းကတော့ ၅.၄ သန်းအထိရှိကြောင်း၊ အဓိက ထိခိုက်ပျက်စီးနိုင်သည့် လေယာဉ်ကွင်းများမှာ စစ်တွေ၊ ထီးလင်းနှင့် ဂန့်ဂေါလေယာဉ်ကွင်းများဖြစ်ကြောင်း ထုတ်ပြန် သတိပေးထားသည်။
အဆိုပါ မုန်တိုင်းအရှိန်ကြောင့် နေပြည်တော်၊ စစ်ကိုင်း၊ မန္တလေး၊ မကွေး၊ ပဲခူး၊ ရန်ကုန်၊ ဧရာဝတီ၊ တနင်္သာရီတိုင်းများနှင့် ကချင်၊ ရှမ်း၊ ချင်း၊ ရခိုင်၊ ကယား၊ ကရင်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာနိုင်ကြောင်း မိုး/ဇလက ဆိုသည်။
Western News-WN
