06/09/2026
🏆 СВЕЧЕНО ЗАТВОРАЊЕ НА 26. СВЕТСКО ПРВЕНСТВО ВО ЛОВ НА КРАП – МАВРОВО 2026 🎣
Со свечената церемонија на доделување медали и признанија, синоќа официјално заврши 26. Светско првенство во лов на крап за нации – Маврово 2026.
По неколку дена исполнети со голема борба, неизвесност, одлични улови и вистински спортски дух, ги добивме новите светски шампиони.
Во екипна конкуренција:
🥇 Украина – светски шампион
🥈 Унгарија – второ место
🥉 Литванија – трето место
Во поединечна конкуренција:
🥇 Андриј Левченко и Ихор Труба – Украина
🥈 Р. Кабинецкис и В. Пирктинш – Летонија
🥉 Д. Хрицун и Д. Супруненко – Украина
Наградата за најголема уловена риба им припадна на Анджеј Бул и Матеуш Малински од Полска, за крап со тежина од 8,075 килограми.
За време на првенството беа уловени вкупно 1.428 риби, со вкупна тежина од неверојатни 3.794,715 килограми.
Од срце им честитаме на новите светски шампиони, на сите освојувачи на медали, но и на секој натпреварувач кој беше дел од ова првенство. Резултатите се важни, но подеднакво важни се фер плејот, меѓусебната почит, новите пријателства и спортскиот дух што го видовме во текот на целото натпреварување.
За Македонската риболовна федерација беше огромна чест, но и голема одговорност, за првпат да биде домаќин на едно вакво светско првенство. Зад овој настан стоеја месеци подготовка и многу труд, а најголемата награда за нас се задоволните учесници и спомените што сите заедно ги создадовме во Маврово.
Упатуваме искрена благодарност до сите национални тимови и делегации за учеството, довербата и коректниот однос.
Голема благодарност до сите судии, мерачи, секторски и зонски судии, волонтери, редари, обезбедувањето, медицинските екипи, техничкиот персонал, лицата задолжени за превоз, храна и целокупната логистика. Секој од вас беше важен дел од организацијата и без вашата посветеност ова првенство немаше да изгледа вака.
Посебна благодарност упатуваме до Министерството за спорт, Министерството за земјоделство, шумарство и водостопанство, Општина Маврово и Ростуше и Националниот парк „Маврово“ за поддршката и соработката.
Им благодариме и на нашите пријатели и поддржувачи – Винарија „Стоби“, „Медарница“, „Алора“, Ненад Максимовски, како и на сите други компании, институции и поединци кои на кој било начин помогнаа во реализацијата на ова првенство.
На сите учесници им благодариме што дојдоа во Македонија. Искрено се надеваме дека, без разлика на конечниот резултат, си заминавте задоволни од организацијата, од Маврово, од нашата земја и од нашиот народ.
Ви посакуваме среќен пат и многу успех на следните натпревари.
До некоја следна средба – благодариме што бевте дел од Маврово 2026! 🇲🇰🎣🏆
п.с. Сите претходни информации во врска со светското првенство се објавени на World Carp Championship Mavrovo 2026