Друштвото на ликовните уметници на Македонија официјално е формирано во 1946 г. Неговата антиципација и континуитет датираат од 1929 г., кога во рамките на Вардарска бановина било формирано “Друштвото на југословенските ликовни уметници“. Во 1930 г. кон него ќе се приклучи и новото друштво “Јефимија“ кое од 1933-1941г. ќе ја преземе изложбената дејност на ДЈЛУ. Во овој период ќе излагаат и повеќе
уметници кои подоцна ќе станат основоположници намакедонската модерна уметност: Димитар Андонов-Папрадишки, Никола Мартиноски, Лазар Личеноски, Василие Поповиќ-Цицо, Љубомир Белогаски, Вангел Коџоман, Михајло Шојлев и др.
Во 1944 г. во Прилеп се формира Друштвото на македонските ликовни уметници во чија управа ќе бидат Мартиновски, Поповиќ-Цицо, Владимирски, Тодоровски и Блажиќ. Тие ќе се залагаат за обединување на сите уметници од Македонија, за пропагирање и ширење на сите уметнички медиуми. Оттогаш ликовните уметници на Македонија до денешни дни го носат името ДЛУМ како траен бренд на нивната професионална асоцијација.
Во 1945 г. во Скопје ќе се отвори и првата изложба на Друштвото. На иницијатива на Друштвото, истата година се отвара и Уметничкото училиште, чиј прв директор станува Никола Мартиноски. Од учениците на ова училиште подоцна ќе се регрутираат идните членови на Друштвото. Во 1946 г. официјално ќе се формира ДЛУМ. Прв и долгогодишен претседател ќе биде Мартиновски. Истата година ќе се отвори II изложба на ДЛУМ на која ќе учествуваат поголем број уметници од Македонија. Реал-социјалистичкиот дух на изложбата ќе биде одраз на барањата на новата стварност. Во 1953 г. во Скопје се отвараат изложби од модерната француска, американска и холандска уметност, како и изложбата на Хенри Мур, кои непосредно ќе влијаат и на творечкиот дух на македонските уметници. Истата година ДЛУМ ќе организира патувачки изложби низ Југославија. Членовите на ДЛУМ редовно ќе учествуваат и на изложбите на СЛУЈ, а од 1955 г. ќе се презентираат и афирмираат и во странство.
Од особена важност се неодминливите брендови на ДЛУМ:
– „Годишната изложба“ која деновиве ја доживува својата шеесетгодишнина
– „Зимскиот салон“ кој полека но сигурно ги освојува и остварува највисоките вредносни дострели и достоинства со учеството на селектор-куратор од странство и гости учесници од соседните земји.
Во текот на своето 68годишно постоење ДЛУМ реализирал преку 1382 самостојни претставувања на македонски и странски автори пред македонската ликовна публика и преку 350 претставувања на Друштвото и македонски автори на меѓународната сцена. ДЛУМ е особено гордо на претставувањето во Париз, Франција со групна изложба од 107 ликовни творци од Македонија, како и изложбите во Софија најпрвин графичката со 40-тина автори, а потоа и групна изложба со 70-тина автори во рамките на договорената соработка со Сојузот на бугарските уметници и меѓународни регионални соработки со Црна Гора, Словенија и Хрватска.
Ако се обидеме во контекст на ДЛУМ-овите изложби да изделиме еден период или епоха, таа речиси никогаш не може да се претстави со еден правец или струја која доминира. Напротив, единствената константа е плурализмот на настојувања, во коишто секој автор поодделно има своја вистина. Во секој период се проткајуваат противречности, секоја нова структура во себе опфаќа теза и антитеза. Тоа е основниот белег и денес, а него го дополнуваат преку петстотини активни членови.
Сето ова зборува дека ДЛУМ израсна во „институција“ која на своите изложби ги собира и насочува енергијата и идеите за натамошниот развој на ликовната мисла, но и презентација на нови трендови кои се огледуваат во синтезата на ликовната уметност.
