ПИНА е организација формирана од новинари, ентузијасти и професионалци која се залага за промоција и зајакнување на истражувачкото новинарство и професионалноста во медиумската средина во Македонија. Освен тоа, ПИНА се залага и за подобрување и унапредување на состојбата на жените новинарки во медиумите.
ПИНА како еден од своите главни продукти во 2017 година го лансираше и Истражувачкиот филмски
фестивал - Скопје, неколкудневен настан кој за прв пат се одржа во Македонија и регионот. Фестивалот досега имаше четири изданија а неодамна се ребрендираше во Медиумски Фестивал Скопје и по петти пат се одржа во октомври. Фестивалската програма е поделена во два сегменти, со филмови посветени на истражувачкото новинарство и други медиумски трендови, како и бројни дебати и говорници од земјава, регионот, Европа и САД кои се фокусираат на разни актуелни теми од областа на новинарството и медиумите.
ПИНА исто така за прв пат ја формираше и Програмата за жени новинарки, која понуди два модули – за мобилно и мултимедијално новинарство во кои новинарките се стекнуваат со иновативни новинарски вештини и работат на значајни граѓански теми. Програмата во јавноста покрена важни теми за предизвиците со кои се соочуваат жените новинарки во нашата земја како и генералната слика за жените во медиумите.
ПИНА ја основаше и Програмата за мобилно новинарство која нуди обуки, менторски процес и пракса на учење на мобилно новинарство и работа на разни новинарски стории преку мобилни видеа. Веќе петта година, ПИНА придонесува за промоција на мобилното новинарство на домашната медиумска сцена и работи на најразлични активности кои на новинарите им даваат алатки и можности за развој на нивните вештини во мобилното новинарство и видеата изработени со мобилен телефон.
Работиме особено и на неформална едукација и пракса на млади новинари преку активно менторство и изработка на новинарски производи во неколку мрежи и програми за млади новинари во земјата.
