12/10/2026
Позитивни искуства, брзо патување и пофалби за услугата – ова се дел од впечатоците на граѓаните кои го користат градскиот воз на релацијата Зелениково – Скопје, а кои ги споделија пред камерата на фејсбук-страницата „ДаТеПрашамНешто“.
Во видеото, објавено на страницата позната по разговорите со граѓаните и уличните анкети, патниците зборуваат за своите искуства со железничкиот превоз и ги издвојуваат предностите што им ги нуди оваа линија.
Според нивните сведоштва, патувањето трае околу 25 минути, што го прави возот практична опција за оние кои секојдневно патуваат од Зелениково кон главниот град, било за работа, училиште или други обврски.
Трасата ги опфаќа станиците Зелениково Ново, Орешани, Јане Сандански, Драчево и Лисиче, а крајната дестинација е централната Железничка станица во Скопје.
Дополнително, возниот ред е усогласен со распоредот на автобусите на ЈСП Скопје, со цел полесно поврзување на железничкиот и градскиот автобуски превоз.
Планирано е проширување со уште две линии
Проектот „Градски воз“ предвидува и две дополнителни делници. Едната треба да ги поврзе Миладиновци, Илинден и Маџари со централната Железничка станица во Скопје, додека другата е планирана на релацијата Скопје – Скопје Север – Ѓорче Петров – Волково.
Искуствата на патниците покажуваат колку се важни брзината, редовноста и добрата поврзаност за секојдневното движење низ скопскиот регион.