07/09/2026
Македонски Брод денес (7-ми Септември) го прослави својот ден на ослободувањето, ден кога градот ја доби својата слобода.
Овој празник на градот се одбележа со низа свечености и активности во организација на Општина Македонски Брод.
Советот на Општина Македонски Брод ја одржа својата традиционална седница. По одржувањето на седницата, Советот на Општина Македонски Брод и градоначалникот положија свежо цвеќе пред споменикот на Калето и пред Споменикот на паднатите борци кој се најдува во паркот на градот.Многубројни делегации положија цвеќе и оддадоа почит пред Споменикот на паднатите борци.
Во Домот на култура се одржа свечена академија со пригодна програма. На свеченоста пред присутните се обрати градоначалникот на Општина Македонски Брод, Жарко Ристески.Во своето обраќање градоначалникот истакна дека 7-ми Септември не е само датум во календарот туку и симбол на градот, на храброста и пожртвуваноста на генерации поречани кои ја извојувале победата во 1944 година. Тој со чувство на длабока почит изрази голема благодарност кон паднатите борци и повика на меѓусебна поддршка, на достоинство и заедништво во борбата за напредок на нашата општина.
По повод денот на ослободувањето беа доделени седмосептемвриски награди на наши сограѓани и институции кои со своите дела дале придонес во развојот, промовирањето и заедништвото на нашата заедница и нивната посветеност во работењето.
Наградите беа доделени на Детската градинка „7-ми Септември“, за нејзините 45 години посветеност, грижа и љубов кон нашите најмлади, на нашата Црква „Св. Богородица“, за нејзиниот придонес во зачувувањето на духот и традицијата, на СОУ „Св. Наум Охридски“ за 50 години посветеност во образованието и придонес во развојот на младите и нашата заедница и на г-динот Саво Костадиноски за неговиот придонес во зачувувањето и афирмацијата на културното и историското наследство на Поречието и негово промовирање.