07/09/2026
🎓 КОНКУРС ЗА ДОДЕЛУВАЊЕ СТИПЕНДИИ ЗА СТУДИСКАТА 2026/2027 ГОДИНА
„Фондацијата Борјан Петковски“ – Гевгелија, по повод роденденот на Борјан, распишува Конкурс за доделување на две (2) стипендии за студенти од општините Гевгелија, Богданци и Дојран, за студиската 2026/2027 година.
Стипендиите се наменети за студенти запишани на додипломски студии од прв циклус на Универзитетот „Св. Кирил и Методиј“ во Скопје, на следните факултети и студиски области:
• Стоматологија
• Медицина
• Машинство
• Електротехника
• Градежништво
• Архитектура
• Компјутерски науки
• Технологија и други природно-технички науки
Се доделуваат:
1. Стипендија за редовни студенти
2. Стипендија за новозапишани студенти – бруцоши
━━━━━━━━━━━━━━━━━━
ОПШТИ УСЛОВИ
Право да аплицираат имаат кандидатите кои:
• се редовни студенти;
• не повторувале година во текот на студирањето;
• не се корисници на стипендија од друга установа;
• се државјани на Република Северна Македонија.
━━━━━━━━━━━━━━━━━━
ГРУПА 1 – РЕДОВНИ СТУДЕНТИ
Кандидатите потребно е:
• редовно да ги запишуваат семестрите;
• да имаат постигнат просечен успех од претходните студиски години до тековната 2025/2026 година, при што минималниот потребен просек изнесува 8,50. По овој критериум може да се добијат најмногу 100 бодови;
• да имаат положено најмалку 90% од предвидените испити од претходната студиска година.
Потребна документација:
1. Мотивационо писмо;
2. Потврда за запишан семестар;
3. Доказ за остварениот успех во претходните студиски години (копија од индекс или друг соодветен документ);
4. Потврда за предвидени и положени испити;
5. Изјава дека кандидатот не е корисник на друга стипендија;
6. Изјава дека доставените документи и податоци се вистинити.
━━━━━━━━━━━━━━━━━━
ГРУПА 2 – НОВОЗАПИШАНИ СТУДЕНТИ (БРУЦОШИ)
Критериуми:
• Завршено средно образование со највисоки оценки – најмногу 80 бодови;
• Учество на натпревари и освоени награди – најмногу 20 бодови.
Потребна документација:
1. Мотивационо писмо;
2. Доказ за остварениот успех во средното образование (копии од свидетелствата и доказ за положена државна матура);
3. Копии од дипломи, признанија или други докази за освоени награди на натпревари во земјата и странство;
4. Изјава дека кандидатот не е корисник на друга стипендија;
5. Изјава дека доставените документи и податоци се вистинити.
━━━━━━━━━━━━━━━━━━
📩 НАЧИН И РОК НА ПРИЈАВУВАЊЕ
Целокупната документација се доставува по електронски пат на:
[email protected]
📅 Рок за пријавување: 01.10.2026 – 25.10.2026 година
По потреба, Фондацијата го задржува правото да побара доставување на оригиналните документи на увид.
Резултатите од Конкурсот ќе бидат објавени на Facebook-страницата Borjan Petkovski Fondacija, најдоцна до 31.10.2026 година, а кандидатите ќе бидат известени и по електронска пошта.
━━━━━━━━━━━━━━━━━━
🎓 ИЗНОС И ВРЕМЕТРАЕЊЕ НА СТИПЕНДИЈАТА
Износот на секоја стипендија изнесува 10.000 денари месечно, во период од девет месеци во текот на студиската година, односно вкупно 90.000 денари годишно по стипендист.
Стипендијата се доделува за онолку семестри на додипломски студии колку што се предвидени со општиот акт на високообразовната установа, без апсолвентски стаж.
Студентите на кои ќе им биде доделена стипендија ќе склучат договор со „Фондацијата Борјан Петковски“ – Гевгелија, со кој ќе бидат уредени меѓусебните права и обврски.
━━━━━━━━━━━━━━━━━━
💙 НАПОМЕНА ЗА ПОСТОЈНИТЕ СТИПЕНДИСТИ
Студентите кои се корисници на стипендија од студиската 2025/2026 година, согласно склучениот договор за стипендирање, потребно е најдоцна до 25.10.2026 година да достават соодветна документација со која ќе потврдат дека и понатаму ги исполнуваат предвидените услови за продолжување на доделената стипендија.
„Фондација Борјан Петковски“ – Гевгелија