15/05/2026
📣ИНТЕРВЈУ со "Социјални Отпадоци" - Неприкосновените победници на Кочанскиот паб-квиз. 👇👇
1. Кои се „Социјални отпадоци“? Претставете се поединечно – име, што работите и една интересна работа за вас што луѓето не ја знаат.
Адријан е страстен јазичар кој предава англиски јазик. Научи да чита на 4 години, а да вози велосипед на 18.
Анастасија е лингвистка, а моментално работи како образовна асистентка. Сè прави во последен момент, ама секогаш е прва на квизот.
Давид по професија е софтверски инженер. Обожава да го поминува слободното време во природа, да истражува нови вкусови и да учи нови работи.
Кевин е тазе магистер, кој академската дисциплина ја замени со квиз-адреналин. Има селективна меморија: често заборава каде му се клучевите, но без размислување знае дека АББА победи на Евровизија во ’74.
Михајло по струка е исто така колега на лингвистите, но отстапува од тимот по тоа што е вистински 90s kid, односно, ја искусил декадата во целост, и по тоа што е од Штип.
2. Како се формираше екипата и кој го смисли името?
Првичната идеја беше на Анастасија и Давид, кои бараа активност што ќе биде малку поинаква од вообичаените кафе дружби. Давид беше тој којшто го предложи паб-квизот, а на нивно пријатно изненадување, Кевин и Адријан прифатија да се приклучат.
Тимот веќе добиваше форма, но тука доаѓаме до делот каде што и денес немаме целосна усогласеност, затоа што повеќе членови од тимот тврдат дека токму нивна била идејата да го поканиме Михајло. Без разлика чија беше иницијативата, процената беше иста: додавањето петти член може да биде клучно за успехот, но и дека квизот е одлична прилика да ја зачестиме дружбата.
Што се однесува до името, тоа настана во последна секунда. До самиот почеток на првиот квиз, никој од нас не ни помисли дека ни е потребно официјално име. Буквално пред првото учество, Анастасија се сети на една стара шега на Давид за нашиот состав и за тоа дека сме „социјални отпадници“. Таа игра на зборови ни звучеше добро, па така името ’залепи‘ и остана до денес.“
3. Победивте на 6 од вкупно 7 изданија на кои учествувавте— како ги доживувате победите? Има ли разлика во интензитетот на возбудата?
Првото учество ни беше на септемвриското издание, каде се пријавивме со доза љубопитност, првенствено со цел да се дружиме и забавуваме. А, највозбудлива игра ни беше на изданието во ноември, затоа што обично имаме дежурни песимисти, но тогаш сите имавме чувство дека имаме слаб перформанс и се изненадивме од победата.
4. Имавте и драматичен тај-брејк со „Забрањено Пушење“ – што се случува во тие моменти во главата на играчите?
Има три клучни фактори за да се постигне добар резултат: среќа – да се паднат погодни прашања, знаење – со кое се стекнувате низ животот, и концентрација – единствениот фактор врз кој можете да влијаете за време на играта.
Еден месец пред тој нерешен резултат, победивме со само еден бод повеќе од „Забрањено Пушење“, така што знаејќи дека играме против друг докажан силен тим, имавме мотив да се сконцентрираме и за дополнителната серија.
5. Имате ли поделба на области (спорт, историја, музика, географија…) или играте „инстинктивно“?
Немаме конкретна тема целосно доделена на само еден член од тимот, но ако е прашање од спорт, историја или филм, знаеме кои двајца ќе треба да се договорат и да го потврдат конечниот одговор, а кои ќе го користат тоа време за ревизија на претходните одговори од таа серија. Но, може да се каже дека повеќето области ни се во пресекот на множествата од интереси на сите од тимот, така што за најголем дел од прашањата играме инстинктивно.
6. Како одлучувате кој одговор е конечен кога има различни мислења?
Ова е интересно прашање, затоа што немаме некој воспоставен систем за тоа како да пристапиме во такви ситуации. Имајќи предвид дека досега на сите учества се има случено на прашање кое сме го згрешиле, точниот одговор да ни бил алтернативата која не сме ја избрале за конечна, можеби треба да поработиме на некаков план за во иднина.
7. Дали имате некој ритуал пред квиз или после победа?
Ритуал пред квизот ни е справување со предизвикот да стигнеме навреме. Има такви што често се на работ на доцнење.
8. Прашање што ве изнервирало затоа што „морало да го знаете“?
Има прашања кои ги толкувавме различно, како прашањето за најблиска планета до земјата, и покрај тој потенцијално погрешен одговор, ни одзема уште време до крајот на таа серија прашања. Но, сепак, како такво што најмногу нè изнервирало ќе го издвоиме она од јануарското издание за најпродаван роман на 21-виот век: напишавме „Хари Потер“, па почнавме да се сомневаме дека е најпродаван како серијал, а не како посебно издание, и го избришавме без да имаме сериозна замена. На крај не се ни сеќававме што точно напишавме, но беше погрешно, и резултираше во тоа да играме тај-брејк.
9. Кој тип прашања најмногу ги сакате, а кои најмалку?
Најдобро чувство е кога ќе се падне прашање за кое перцепцијата ни е дека е тешко, а сме сигурни во одговорот. А најпроблематични се таквите за кои одговорот ни е некаде на врв на јазикот, но во позадината на умот, па го оставаме неодговорено до крајот на серијата, и еден или неколку членови губат концентрација на следните прашања, сè уште размислувајќи и за одложеното.
10. Дали има нешто што би сакале да се подобри или додаде?
Велат секогаш може подобро, но искрено сметаме дека ако некој може да ја подобри формулата на ваков успешен настан, тоа се сигурно организаторите кои после толку изданија се докажани во способноста да приредат мешавина од знаење и забава во одлична атмосфера. Единствено имаме желба квизот да продолжи понатаму, затоа што веќе е доста препознатлив помеѓу голем опсег на генерации, а како што интересот расте можеби и да добие формат на турнир.
