20/03/2025
« GLOBAL MONEY WEEK » na « HERINANDRO MANERAN-TANY HOAN’NY VOLA »
Lohahevitra hoan’ny taona 2025 : « AZA MANARAKA AM-BOKONY, AMPIASAO AM-PAHENDRENA NY VOLANAO »
Hoan’ny faritra Sofia, dia notontosaina androany alakamisy 20 martsa 2025 teto Antsohihy ny hetsika nanamarihana ny « GLOBAL MONEY WEEK » na « HERINANDRO MANERAN-TANY HOAN’NY VOLA ».
Izany dia nokarakarain’ireo Rafitra mpanohana Vondrona Fitehirizana sy Findramam-bola mijoro eny anivon’ny fiarahamonina (La Clé Telo) na « CLUSTER DES PROMOTEURS DES GROUPES D’EPARGNE ET DE CREDIT » sy ireo rafitra misahana resaka ara-bola na « ENTITES FINANCIERES », izay nahitana ireo avy amin’ny : ONG MAGNAVOTRA, OSDRM, BRED, PAMF, SMECC, ACEP, ORANGE, YAS, DURELL, PAOSITRA MALAGASY.
Ny lanonana dia notronin’ireo Solontenam-Panjakana maro samihafa toy ny avy amin’ny Faritra, Prefektiora, Kaominina Antsohihy, Tribonaly, sns., izay natomboka tamin’ny « CARNAVAL » namakivaky ny tampotananan’ny Antsohihy, nitohy tamin’ny fifandimbiasana fandraisam-pitenenana, ny fitsidihana ireo trano eva sy fanolorana loka hoan’ireo ankizy mpianatry ny Sekoly CEG Haute Ville Antsohihy izay nahazo izany tamin’ny fandraisany anjara namaly fanontaniana maromaro ny 19 martsa 2025, ary nifarana tamin’ny fiarahana niala hetaheta.
Nandritran’ilay lanonana moa dia samy nanazava ireo andraikitra sy sehatra iasany hy rafitra tsirairay.
Raha tsiahivina moa, hoan’ny ONG MAGNAVOTRA, ny sehatra iandraiketany dia ny fanohanana ireo orinasa madinika na salantsalany ka ny tohana dia azo sokajiana 02 lehibe dia :
-Ny fanohanana tsy ara-bola : lalam-barotra, fiofanana, fampivondronana ho fikambanan/kaoperativa, sns.
-Ny fanohanana ara-bola : Fananganana sy fampandehanana ireo La Clé Telo na GVEC, fampifandraisana amin’ny rafitra misehatra ara-bola, sns.
Maro ny hafatra nampitaina nandritran’izany ka antenaina fa nahazo voandalana tsara ireo olona tonga niatrika izany toy ny tamin’ny taona 2024 izay nanombohana ilay hetsika.
Ka ho anao tsy tonga dia tongava amin’ny hetsika amin’ny taona 2026 ary indrindra aza misalasala manatona ireo rafitra voatanisa eo ambony raha misy fanazavana fanampiny tiana ho azo.
