https://www.facebook.com/103009418553839/

Agape Ministry, Antananarivo (2026)

26/10/2026

🟨 HAZAVAO HOE 025

2 TESALONIANA 2:3

❓ Iza ilay “lehilahin’ny ota” resahin’i Paoly? Ary inona ilay “fihemorana” tsy maintsy ho tonga aloha?

“Aza mety hofitahin’olona akory ianareo; fa tsy ho avy izany raha tsy efa tonga aloha ny fihemorana ka hiseho ilay lehilahin’ny ota, dia ilay zanaky ny fahaverezana,”
— 2 Tesaloniana 2:3

🔎 1. INONA NO TOE-JAVATRA NISY TAMIN'NY FOTOANA NANORATAN’I PAOLY IO ANDININY IO?

Nisy olana teo anivon’ny fiangonana tany Tesalonika.

Nisy olona nampikorontan-tsaina ny mpino ka nahatonga azy ireo hieritreritra fa efa tonga ny andron’ny Tompo (2 Tesaloniana 2:1-2).

Noho izany, dia nanoratra i Paoly mba hanitsy ny fahatakaran’izy ireo sy hampitandrina azy ireo mba tsy ho voafitaky ny fampianaran-diso.

Araka izany, tsy natao hampitahorana ny Kristianina amin’ny hoavy tsy fantatra io andininy io, fa natao hampahafantarana azy ireo ny zavatra tsy maintsy dinihina momba ny fiavian’i Kristy sy ny zava-mitranga mialoha izany.

⚠️ 2. INONA ILAY “FIHEMORANA”?

Ny teny grika ampiasain’i Paoly eto dia "apostasia", izay midika hoe fihemorana na fikomiana, indrindra fa fialana amin’ny finoana na fanoherana ny fahamarinana.

Tsy midika fotsiny hoe mihena ny isan’ny olona mandeha miangona, na hoe mihena ny zotom-pon’ny Kristianina sasany.

Ny heviny eto dia mifandray amin’ny fikomiana ara-pinoana sy ny fialana amin’ny fahamarinana izay resahin’i Paoly ao amin’ity toko ity.

Mariho anefa fa tsy manome ny antsipiriany rehetra momba ny endrik’izany fihemorana izany i Paoly eto.

Noho izany, tokony hitandrina isika mba tsy hanondro hetsika, na fiangonana, na olona iray ho fahatanterahan’io faminaniana io raha tsy misy porofo ara-baiboly ampy sy mazava.

👤 3. IZA ILAY “LEHILAHIN’OTA”?

Misy anarana telo ampiasain’i Paoly hilazana azy ao amin’ny 2 Tesaloniana 2:3-4 :

🔹 Lehilahin’ota : manasongadina ny fifandraisany amin’ny fahotana sy ny fanoherany an’Andriamanitra.

🔹 Zanaky ny fahaverezana : fomba fiteny manambara ny fiafarany, dia ny fahaverezana na ny fitsarana.

🔹 Ilay manohitra : araka ny andininy faha-4, manandra-tena ho ambonin’izay rehetra atao hoe andriamanitra na ivavahana izy, ary mipetraka ao amin’ny tempolin’Andriamanitra ka miseho ho Andriamanitra.

Araka izany, tsy olona mpanota tsotra fotsiny no resahin’i Paoly, fa olona na endrika iray maneho fanoherana miavaka an’Andriamanitra sy fanandratana ny tenany ho eo amin’ny toeran’Andriamanitra.

Misy fomba fijery samihafa eo amin’ireo mpandinika Baiboly momba ny tena maha-izy azy sy ny fomba hahatanterahan’io faminaniana io.

Ny sasany dia mihevitra azy ho mpanohitra iray hiseho amin’ny andro farany ; ny sasany kosa mahita fifandraisana amin’ny rafitra na hery manohitra an’Andriamanitra, izay mety hiseho amin’ny endrika manokana amin’ny farany ; ny sasany indray moa dia sahy milaza mihitsy fa i Pape io.

Na dia misy aza ireo fandikana (interprétation) ireo, dia tokony havahana ny zavatra lazain’ny Soratra Masina mazava sy ny fanatsoahan-kevitra mbola iadian-kevitra.

📌 4. INONA NO TOKONY HOTADIDINTSIKA?

Misy lesona telo lehibe azontsika raisina :

✅ Aza mety ho fitahina.

Hoy i Paoly : “Aza mety hofitahin’olona akory ianareo.”

Ny fiarovana amin’ny fitaka dia ny fahalalana sy ny fandinihana amim-pitandremana ny Tenin’Andriamanitra (Asan’ny Apostoly 17:11).

✅ Aza maika hanambara fa tanteraka ny faminaniana iray.

Tsy ampy ny mampitaha ny zava-mitranga ankehitriny amin’ny teny ao amin’ny Baiboly. Tsy maintsy dinihina ny contexte sy ny hafatra manontolo.

✅ Aza avela hivadika tahotra ny fampianarana momba ny andro farany.

Ny tanjon’ny fampianaran’i Paoly dia ny hanitsy ny finoan’ny fiangonana sy hiaro azy amin’ny fitaka, fa tsy hampikorontan-tsaina azy.

✝️ 5. INONA NO FIFANDRAISAN’IZANY AMIN’I JESOA KRISTY?

Zava-dehibe ny mamaky ny andininy faha-3 miaraka amin’ny andininy faha-8 :

“Ary dia haseho ilay tena mpandika lalàna, izay holevonin’i Jesosy Tompo amin’ny fofonain’ny vavany sady hofoanany amin’ny fisehoan’ny fihaviany.”
— 2 Tesaloniana 2:8

Mariho tsara izany! Na dia misy aza ny fihemorana sy ny fanoherana an’Andriamanitra, dia tsy midika izany fa resy i Kristy na hoe tsy voafehiny ny tantara.

I Jesoa Kristy no Tompo, ary Izy no handresy tanteraka ny herin’ny faharatsiana.

Ny fanantenan’ny Kristianina noho izany dia tsy miankina amin’ny fahafahany mamantatra ilay lehilahin’ota na manisa ny zava-mitranga mialohan'ny farany, fa amin’ny fahatokiany an’i Kristy, izay efa nandresy ny ota sy ny fahafatesana tamin’ny alalan’ny fahafatesany sy ny fitsanganany tamin’ny maty, ary hiverina amin’ny voninahitra.

💡 FEHINY

Ny 2 Tesaloniana 2:3 dia mampitandrina antsika mba tsy ho voafitaky ny fampianaran-diso, ary mampahafantatra fa hisy fihemorana sy fanoherana an’Andriamanitra mifandray amin’ny zava-mitranga mialoha ny fiavian’i Kristy.

Tsy tokony hampiasaintsika hanombantombanana zavatra tsy ambaran’ny Baiboly mazava anefa izany, fa tokony hampitombo ny fahamalinantsika sy ny fahatokiana an’i Jesoa Kristy.

Aza variana loatra amin’ny famantarana ka manadino Ilay tokony andrasanao.

Aoka ny masonao hifantoka amin’i Jesoa Kristy, satria Izy no Tompo sady Mpandresy hatramin'ny farany! 🙏

❤️ Agape Ministry—Ny fitiavan'i Kristy no manery anay ✝️

26/10/2026

Fivorian'ny ekipa tety Antaninarenina. Mikatsaka izay mahasoa antsika😁😁🤗

23/10/2026

🟨 Ahoana marina 026

🧳 FAHOTANA VE NY MANAO VOYAGE AMIN’NY ANDRO ALAHADY?

🤔 Misy Kristiana mihevitra fa tsy tokony hanao dia lavitra amin’ny andro Alahady, satria andro natokana ho an’ny Tompo io andro io.

Ny hafa kosa milaza fa tsy misy olana ny manao voyage amin’io andro io, satria tsy voararan’ny Baiboly mivantana izany.

Fa inona marina no ampianarin’ny Soratra Masina? Fahotana ve ny manao dia amin’ny andro Alahady, sa miankina amin’ny antony sy ny toe-javatra anaovana ilay dia?

📖 1. INONA NO LAZAIN’NY BAIBOLY MOMBA NY SABATA?

Ao amin’ny Eksodosy 20:8–11, dia nomen’Andriamanitra ny Zanak’Israely ny didy hitandrina ny andro Sabata, dia ny andro fahafito, ho andro fitsaharana sy natokana ho Azy.

Tsy tokony hafangaro avy hatrany anefa ny Sabata tao amin’ny Testamenta Taloha sy ny fomba nitandreman’ny Kristiana ny Alahady.

Ny Alahady dia nanjary andro nivorian’ny Kristiana voalohany, indrindra satria tamin’io andro io no nitsanganan’i Jesosy tamin’ny maty (Asa 20:7; 1 Korintiana 16:2).

Misy ny tsy fitovian-kevitra eo amin’ny fiangonana kristiana momba ny fifandraisan’ny didy mikasika ny Sabata sy ny fitandremana ny Alahady. Kanefa, ilaina ny mandinika ny fampianaran’ny Testamenta Vaovao mba tsy hamoronana fandrarana izay tsy napetraky ny Soratra Masina.

📖 2. AHOANA NO TOKONY HANDRAISAN’NY KRISTIANA IZANY?

🔹 Kolosiana 2:16–17

Mampianatra i Paoly fa tsy tokony hisy hitsara ny mpino momba ny andro firavoravoana sy ny Sabata, satria aloka manondro ny tena izy ireo, ary ao amin’i Kristy no ahitana ny fahatanterahany.

Midika izany fa tokony hitandrina isika mba tsy hametraka lalàna ara-pivavahana mihoatra noho izay ampianarin’ny Baiboly.

🔹 Romana 14:5–6

Ampianarin’i Paoly fa misy olona mihevitra ny andro iray ho ambony noho ny andro hafa, ary misy kosa mihevitra ny andro rehetra ho mitovy. Samy tokony hanao izay ataony ho an’ny Tompo izy ireo.

Noho izany, tsy tokony hifampitsara amin’ny raharaha toy izao isika raha tsy manana fototra ara-baiboly mazava.

📖 3. RAHOVIANA NO METY HISY OLANA ARA-PANAHY NY MANAO VOYAGE AMIN’NY ANDRO ALAHADY?

Tsy ny dia ihany no tokony hojerena, fa ny antony anaovana azy sy ny vokany koa.

✅ Raha noho ny vonjy taitra : Ohatra, mitondra marary any amin’ny hopitaly na mamonjy aina. Tsy tokony hanamelohana olona noho ny andro nanaovany izany.

✅ Raha noho ny asa na andraikitra tsy azo ialana : Tokony hodinihina amim-pahendrena ny toe-javatra sy ny andraikitra ara-panahy.

✅ Raha fialan-tsasatra na fitsidihana fianakaviana : Tsy fahotana ho azy izany, raha tsy misy zavatra hafa mifanohitra amin’ny sitrapon’Andriamanitra.

⚠️ Raha atao fialan-tsiny hialana amin’ny fanompoam-pivavahana kosa anefa :

Raha lasa fahazarana ny manao dia mba tsy hiara-mivavaka amin’ny fiangonana, dia tokony hodinihina ny toe-po sy ny laharam-pahamehana ara-panahin’ilay olona.

Ny Hebreo 10:24–25, dia mamporisika antsika tsy hahafoy ny fiarahantsika miangona.

Tsy midika anefa izany fa voarara avokoa ny dia rehetra atao amin’ny andro Alahady.

Ny zava-dehibe dia ny tsy fanaovana tsirambina ny fiombonana kristiana sy ny fanompoana an’Andriamanitra.

📖 4. INONA NO TOKONY HATAON’NY KRISTIANA?

Alohan’ny hanaovana dia amin’ny andro Alahady, dia tsara ny mametra-panontaniana hoe :

🔸 Misy antony manan-danja ve anaovako ity dia ity?

🔸 Afaka mandamina ny diako ve aho mba tsy hanao tsirambina ny fanompoam-pivavahana?

🔸 Misy andraikitra tokony hotanterahiko ve izay mety hataoko tsirambina?

🔸 Mampiasa ny fahafahako amim-pahendrena sy ho voninahitr’Andriamanitra ve aho?

Tsy ny famerana ny zavatra azo atao fotsiny no tanjon’ny etika kristiana, fa ny fanampiana ny mpino handray fanapahan-kevitra mifanaraka amin’ny Tenin’Andriamanitra sy ny sitrapony.

✨ 5. FEHIN-KEVITRA

❓ Fahotana ve ny manao voyage amin’ny andro Alahady?

Araka ny foto-kevitra ara-baiboly, tsy fahotana ho azy ny manao voyage amin’ny andro Alahady, satria tsy misy didy mivantana ao amin’ny Testamenta Vaovao mandrara ny Kristiana tsy hanao dia amin’io andro io.

Kanefa, tsy midika izany fa tsy misy lanjany ny Alahady.

Tokony hanokana fotoana ho an’Andriamanitra ny Kristiana, hifandray amin’ny fiangonana ary handamina ny asany sy ny diany amim-pahendrena.

🚫 Tsy tokony hantsoina hoe fahotana izay tsy nomelohin’ny Soratra Masina.

⚖️ Etsy ankilany, tsy tokony hampiasaina ho fialan-tsiny hanaovana tsirambina ny adidy ara-panahy koa ny fahafahana kristiana.

🙏 Hoy ny 1 Korintiana 10:31 :

«Koa amin’izany, na mihinana na misotro ianareo, na inona na inona ataonareo, dia ataovy ho voninahitr’Andriamanitra izany rehetra izany.»

💡 Tsarovy : Tsy ny hoe «Afaka manao an’ity ve aho?» ihany no tokony hanontanian’ny Kristiana, fa koa hoe : «Ahoana no hanaovako izany amim-pahendrena sy ho voninahitr’Andriamanitra?»

❤️ Agape Ministry—Ny fitiavan'i Kristy no manery anay ✝️

21/10/2026

❤️ MAMELÀ NY TENANAO

🤔 Toa hafahafa amin'ny sofintsika ny mandre izany e?

Tsy developpement personnel akory na filozofia izany fa biblika tsara. Araho anie ny fanazavana e 😊

💭 Azo atao ve ny mamela ny tenanao rehefa mahatsiaro ho meloka noho ny fahadisoana nataonao ianao?

Inona no ampianarin’ny Baiboly momba izany?

Maro ny olona mahay mamela ny hafa, nefa rehefa ny tenany no diso dia sarotra aminy ny mandroso.

Mbola manameloka ny tenany izy noho ny fahadisoana vitany taloha ela be tany, ny fanapahan-kevitra ratsy noraisiny, na ny zavatra nataony ka nandratra olona iray.

Misy aza olona efa nibebaka tamin’Andriamanitra, efa nangataka famelan-keloka, ary efa nahazo famelan-keloka, kanefa mbola miaina ao anatin’ny fanamelohan-tena.

Toa tsy afaka amin’ny aloky ny lasa izy, satria tsy mitsahatra mampahatsiahy ny tenany ny fahadisoany.

Inona ary no tokony ataontsika manoloana izany?

📖 1. EKEO NY FAHADISOANAO FA AZA AFENINA

Hoy ny 1 Jaona 1:9 :

“Raha miaiky ny fahotantsika isika, dia mahatoky sy marina Izy ka mamela ny fahotantsika sy manadio antsika ho afaka amin’ny tsi-fahamarinana rehetra.”

Tsy midika hoe mandà ny fahadisoana nataonao ny hoe mamela ny tenanao.

Tsy midika koa izany hoe manamaivana ny fahotana na mandositra ny andraikitrao ianao.

Ny dingana voalohany dia ny fanekena amim-pahatsorana ny fahadisoana, ny fibebahana marina, ary ny fandraisana ny famelan-keloka omen’Andriamanitra.

✨ Tsy ny fandavana ny lasa no manafaka anao, fa ny fiatrehana azy eo anatrehan’Andriamanitra.

📖 2. MIANARA MANAVAKA NY FANAMELOHAN-TENA SY NY FIBEBAHANA

Ny fibebahana dia mitarika antsika hiala amin’ny fahotana sy hiverina amin’Andriamanitra.

Ny fanamelohan-tena maharitra kosa dia mety hahatonga antsika hifikitra amin’ny fahadisoana taloha ka tsy hahita intsony ny fahasoavan’Andriamanitra.

Hoy ny Romana 8:1 :

“Koa amin’izany dia tsy misy fanamelohana ho an’izay ao amin’i Kristy Jesosy.”

Tsy milaza akory izany fa tsy nisy fahotana nataontsika na tsy misy vokany ny fahadisoantsika.

Milaza kosa izy fa tsy eo ambanin’ny fanamelohana intsony izay ao amin’i Kristy Jesosy.

Ny fahotanao dia tsy tokony hohamaivanina, nefa tsy tokony hataonao lehibe noho ny fahasoavan’Andriamanitra koa.

📖 3. IANARO NY MIJERY NY TENANAO ARAKA NY FAHASOAVAN’ANDRIAMANITRA

Indraindray isika dia mino fa afaka mamela ny hafa Andriamanitra, saingy sarotra amintsika ny mino fa tena afaka mamela antsika koa Izy.

Mety hieritreritra isika hoe : “Tsy mendrika ny hahazo famelan-keloka intsony aho. Tsy afaka ny ho olona tsara intsony aho. Tsy ho afaka hanadino izay nataoko mihitsy aho.”

Kanefa, raha mifototra amin’ny fahasoavan’Andriamanitra ny famonjena antsika, dia tsy ny fahamendrehantsika no fototra iorenan’izany, fa ny asan’i Jesosy Kristy.

✝️ Tsy midika izany fa tsy maintsy manadino ny zava-nitranga ianao.

Mety mbola hahatsiaro ny lasa ianao, saingy afaka mianatra mijery izany amin’ny fomba hafa : tsy ho toy ny gadra mamatotra anao mandrakizay, fa ho toy ny zavatra nampianatra anao hiankina bebe kokoa amin’Andriamanitra.

📖 4. RAISO NY ANDRAIKITRAO ARY MANDROSOA

Hoy ny Filipiana 3:13-14, rehefa niresaka momba ny fandrosoany i Paoly :

“Ry rahalahy, tsy mihevi-tena ho efa nahazo aho ; fa zavatra iray loha no ataoko : Manadino izay zavatra ao aoriana ka miezaka hanatratra izay zavatra eo aloha ; eny, miezaka hanatratra ny marika aho hahazoako ny lokan’ny fiantsoan’Andriamanitra any ambony ao amin’i Kristy Jesosy. ”—Filipiana 3:13-14 MRV

Tsy midika izany fa nanadino ara-bakiteny ny lasa rehetra i Paoly.

Fantatsika fa nahatsiaro ny lasa izy. Ny tiany ambara dia ny tsy namelany ny lasa hanakana azy tsy hanohy ny antson’Andriamanitra.

Raha nisy olona naratra noho ny nataonao, dia mangataha famelan-keloka ary manaova izay azonao atao hanarenana ny fahavoazana.

Raha nisy lesona tokony horaisinao, dia raiso izany. Raha nisy fitondran-tena tokony hovana, dia miezaha hiova.

🌱 Aza atao fonja ny lasa, fa aoka izy ho lesona hanampy anao handroso.

❤️ FEHINY

Ny hoe “mamela ny tenanao” dia tsy midika hoe ianao no mpitsara farany manambara ny tenanao ho tsy manan-tsiny.

Andriamanitra no mamaritra ny atao hoe fahotana, ary Izy no manome famelan-keloka amin’ny alalan’i Jesosy Kristy.

Noho izany, raha efa niaiky ny fahotanao sy nibebaka ianao, dia ianaro ny mandray amim-pinoana ny famelan-keloka omen’Andriamanitra.

Aza manameloka ny tenanao mandrakariva noho ny zavatra efa navelan’Andriamanitra, nefa aza hadinoina koa ny andraikitra sy ny fiovana takin’ny fibebahana marina.

Tsy voatery ho voafafan’ny fitadidianao ny lasa vao afaka mandroso ianao. Afaka mahatsiaro ianao, nefa tsy voatery ho fehezin’izany intsony.

📖 “Fa raha ny Zanaka no hanafaka anareo, dia ho afaka tokoa ianareo.” — Jaona 8:36

💭 FANONTANIANA HO SAINTSAININA

Mbola misy fahadisoana taloha ve izay manameloka ny tenanao hatrany, na dia efa nibebaka sy nangataka famelan-keloka tamin’Andriamanitra aza ianao?

🙏 Aza mijanona eo amin’ny fahadisoanao. Miverena amin’Andriamanitra, raiso ny fahasoavany, ahitsio izay azo ahitsy, ary tohizo ny dianao miaraka amin’i Kristy.

❤️ Agape Ministry—Ny fitiavan'i Kristy no manery anay ✝️

19/10/2026

🟦Hazavao hoe 024 :

📌 Jaona 11:16

🔥 “Andeha koa isika mba hiara-maty aminy”

Maro isika no tsy mahazo tsara ny tian'io andininy io ho lazaina : hiara-maty amin'ny Tompo ve sa amin'i Lazarosy no tian'i Tomasy lazaina?

🔎 1. Inona no tena zava-nitranga?

Mba hahatakarana ny tenin’i Tomasy dia ilaina ny mamaky ny Jaona 11:1–16.

Narary i Lazarosy, sakaizan’i Jesosy, izay nonina tao Betania.

Rehefa ren’i Jesosy ny aretiny dia tsy nandeha avy hatrany Izy, fa nijanona roa andro teo amin’ny toerana nisy Azy (and. 6).

Rehefa nanapa-kevitra ny hiverina tany Jodia i Jesosy, dia nampahatsiahy Azy ny mpianatra fa vao haingana no saika hitora-bato Azy ny Jiosy (and. 8). Fantatr’izy ireo fa nety hampidi-doza ny fiverenana tany.

Teo indrindra no nilazan’i Tomasy hoe : « Andeha koa isika mba hiara-maty aminy. »

🔍 2. Fanehoam-pinoana sa fahakiviana?

Ny teny grika ampiasain’i Jaona dia hoe "apothanōmen met’ autou", izay midika hoe « aoka isika ho faty miaraka aminy ».

Mazava araka izany fa ny fahafatesan'ny Tompo no resahin’i Tomasy, fa tsy ny fahafatesan’i Lazarosy.

Misy fomba roa azo andraisana ny teniny : mety ho fanehoam-pahasahiana sy fahavononana hanaraka an’i Jesosy na dia hatramin’ny fahafatesana aza izany ; nefa mety hisy feo maneho fahakiviana na fanekena ny loza tsy azo ialana koa ao anatiny.

Tsy milaza mivantana ny mpanoratra hoe iza amin’ireo fihetseham-po ireo no tena nananan’i Tomasy.

Noho izany, tsy tokony hamoaka hevitra iray tsy azo hozongozonina izay tsy nohamafisin’ny lahatsoratra isika.

Ny tena mazava dia izao : vonona ny hiaraka amin’i Jesosy ireo mpianatra, na dia fantany aza fa mety hampidi-doza ny fiarahana Aminy.

✝️ 3. Inona no asehon’ity andininy ity momba an’i Jesosy?

Tsy tantaran’ny fahasahian’i Tomasy fotsiny izy ity, fa ampahany amin’ny fitantarana mampiseho ny fahefan’i Jesosy amin’ny fahafatesana.

Ao amin’ny Jaona 11:25, hoy i Jesosy :

« Izaho no fananganana ny maty sy fiainana. »

Niverina tany Betania Izy, na dia fantany aza ny loza niandry Azy, ary nanangana an’i Lazarosy tamin’ny maty Izy.

Maneho izany fa manana fahefana mihoatra noho ny fahafatesana Izy.

Misy hevitra lehibe eto : ny mpianatra dia nihevitra fa mety hiafara amin’ny fahafatesana ny diany, kanefa Jesosy kosa handeha hanao asa izay haneho ny voninahitr’Andriamanitra (Jaona 11:4, 40).

Ary amin’ny farany, io lalana mankany Jodia io dia anisan’ny lalana mitondra an’i Jesosy ho amin’ny fahafatesany sy ny fanomezany ny ainy ho famonjena antsika.

💡 4. Inona no lesona raisintsika?

Tsy midika akory fa rehefa manaraka an’i Kristy isika dia tsy hisy loza na fahoriana intsony eo amin’ny fiainantsika.

Mitaky fahasahiana sy fandavan-tena lalina kokoa aza izany.

Ny finoana kristiana dia miorina amin’ny fahatokiana an’i Kristy, izay manana fahefana na dia amin’ny fahafatesana aza.

🔥 Tsy ny fahafatesana no manana ny teny farany ho an’izay ao amin’i Kristy, fa ny fiainana omen’Andriamanitra amin’ny alalany.

🙏 Fanontaniana ho saintsainina:

Vonona hanaraka an’i Jesosy ve isika na dia mitaky fandavan-tena aza izany, ary mbola matoky ny fahefany ve isika na dia misy fotoana aza tsy takatsika ny lalana itondrany antsika?

❤️Agape Ministry—Ny fitiavan'i Kristy no manery anay✝️

16/10/2026

🟨Ahoana Marina 025

❓Fahotana ve ny milalao karatra?

Anisan’ny fanontaniana mipetraka eo amin’ny Kristiana ny hoe : fahotana ve ny milalao karatra, sa zavatra azo atao malalaka satria fialamboly fotsiny?

Misy Kristiana mihevitra fa fahotana avokoa ny filalaovana karatra, satria ampifandraisiny amin’ny filokana sy ny fahazaran-dratsy izany.

Ny hafa kosa milaza fa tsy misy olana ny milalao karatra raha fialamboly tsotra fotsiny.

Mba hamaliana izany ara-baiboly, dia tsy tokony hifototra amin’ny fomba amam-panao na ny fitsipiky ny fiangonana fotsiny isika, fa handinika ny foto-kevitra ara-baiboly mifehy ny fahafahan’ny Kristiana, ny fitondran-tenany ary ny fampiasany ny fotoanany sy ny fananany.

Zava-dehibe anefa ny manavaka ireto zavatra roa ireto :

* Ny filalaovana karatra : mety ho lalao fialamboly tsy misy filokana.

* Ny filokana amin’ny karatra : lalao ampidirana vola na mahatonga ny fananana ho tsatòka, ka misy tombony azon’ny iray avy amin’ny faharesen’ny hafa.

Tsy zavatra mitovy ireo, ka tsy tokony hotsaraina amin’ny fomba mitovy foana.

no lazain’ny Baiboly?

I. Tsy mandrara mivantana ny filalaovana karatra ny Baiboly

Tsy misy andininy milaza mivantana hoe : «Aza milalao karatra.»

Tsy tokony hamorona didy tsy nomen’Andriamanitra ao amin’ny Soratra Masina isika noho izany.

Kanefa, ny tsy fisian’ny fandrarana mivantana dia tsy midika fa azo atao daholo ny zavatra rehetra.

Misy foto-kevitra ara-baiboly tokony hampiharina amin’ny toe-javatra samihafa.

1 Korintiana 10:23

> «Azo atao ny zavatra rehetra ; nefa tsy ny zavatra rehetra no mahasoa.»

Ny fanontaniana tokony ho apetraky ny Kristiana dia tsy hoe fotsiny : «Voararan’ny Baiboly ve ity?»

Fa ihany koa, ny hoe :

* Mahasoa ahy ara-panahy ve?

* Manampy ahy hitombo amin’ny fahamasinana ve?

* Mety hanimba ahy na ny hafa ve izany?

* Maneho ny voninahitr’Andriamanitra ve ny fomba anaovako azy?

Noho izany, tsy ampy ny filazana fotsiny hoe tsy voararan’ny Baiboly ny karatra.
Mila dinihina koa ny fomba filalaovana azy sy ny vokany.

II. Rahoviana no mety hivadika fahotana ny filalaovana karatra?

👉 Rehefa misy filokana mamporisika ho amin'ny fitiavam-bola

Ny 1 Timoty 6:9–10 dia milaza fa ny faniriana hanan-karena dia mety hitarika ny olona ho amin’ny fakam-panahy, ary ny fitiavam-bola no fototry ny ratsy rehetra.

Tsy milaza io andininy io fa ny vola na ny lalao rehetra misy vola dia fahotana. Mampitandrina kosa izy ny amin’ny fitiavam-bola sy ny faniriana hahazo harena izay mety hanandevo ny olona.

Raha milalao karatra ny olona ka ny tanjony dia ny hahazo ny volan’ny hafa, vonona ny handany vola tsy tokony holaniany, na mikatsaka harena amin’ny alalan’ny filokana, dia misy olana ara-moraly tokony hodinihina lalina.

👉 Rehefa lasa fahazaran-dratsy manandevo

Hoy i Paoly :

> «...nefa izaho tsy manaiky andevozin-javatra na inona na inona.» — 1 Korintiana 6:12

Mety tsy fahotana amin'ny tenany ny lalao iray, kanefa mety hanjary olana rehefa tsy voafehin’ny olona intsony.

Ohatra, raha misy olona milalao karatra ka :

* Tsy mahavita mamita ny andraikiny ao an-tokantrano intsony.

* Mandany ny fotoanany rehetra amin’izany.

* Tsy mahavita miala amin’ilay lalao na dia efa manimba azy aza.

* Manao tsirambina ny fianarana, ny asa na ny fanompoana an’Andriamanitra.

Amin’izay fotoana izay, dia tsy fialamboly voafehy intsony ilay izy, fa efa lasa zavatra mifehy ny fiainany.

👉 Rehefa miteraka lainga, fitaka na fifandirana

Raha misy olona mamitaka amin’ny lalao, mandainga momba ny vola, tezitra tafahoatra rehefa resy, na mankahala ny namany noho ny lalao, dia tsy azo hamarinina amin’ny filazana hoe fialamboly izany.

Ny olana eto dia tsy ny karatra amin’ny maha-karatra azy, fa ny fahotana miseho amin’ny alalan’ny fitondran-tenan’ilay olona.

👉 Rehefa manimba ny fieritreretan’ny hafa na lasa vato mahatafintohina

Hoy ny Romana 14:13 :

“Koa aza mifampitsara intsony isika fa aleo mihevitra izao : Ny tsy hanisy fandavoana na fanafintohinana eo anoloan’ny rahalahy. ” —Romana 14:13 MRV

Tsy midika izany fa izay rehetra tsy tian’ny olona iray dia voarara ho an’ny Kristiana rehetra. Kanefa, tokony handinika ny fiantraikan’ny ataony amin’ny hafa ny mpino.

Raha fantatrao fa ny filalaovana karatra ataonao dia mety hampiverina olona iray amin’ny fiankinan-doha amin’ny filokana, ohatra, dia mila fahendrena sy fitiavana ianao amin’ny fanapahan-kevitra raisinao.

kosa raha milalao karatra fotsiny, tsy misy filokana?

Aoka atao hoe misy fianakaviana milalao karatra mba hialana voly. Tsy misy vola apetraka, tsy misy fitaka, tsy misy fankahalana, ary tsy misy andraikitra lasa atao tsirambina.

Azo lazaina avy hatrany ve fa fahotana izany?

Tsy misy fototra ara-baiboly ampy hilazana fa fahotana amin'ny tenany ny filalaovana karatra.

Misy fahasamihafana lehibe eo amin’ny filalaovana lalao ho fialamboly sy ny fanaovana filokana izay mety hampidi-doza ny fananana sy ny fifandraisana.

Na izany aza, tokony hodinihina ny toe-javatra manokana, ny antony manosika ny olona ary ny vokatr’ilay fihetsika.

Misy lalao karatra izay tena natao ho fialamboly sy fampiasana saina, ary misy kosa fomba filalaovana mifandray amin’ny filokana sy ny fahazarana manimba. Tsy tokony hafangaro ireo.

no handraisana fanapahan-kevitra amin’ny maha-Kristiana?

Ireto misy fanontaniana dimy azo ampiasaina amin’ny fandinihan-tena :

👉 Mifanohitra amin’ny foto-kevitra ara-baiboly ve izany?

Moa ve misy lainga, fitsiriritana, tsy fahamarinana na fitondran-tena tsy mendrika ao anatiny?

👉 Inona no antony manosika ahy?

Fialamboly voafehy ve no tadiaviko, sa vola, fientanentanana tafahoatra na fandosirana andraikitra?

👉 Mahafehy izany ve aho, sa izy no mifehy ahy?

Afaka mijanona ve aho rehefa tokony hijanona?

👉 Misy olona mety ho voa na ho tafintohina ve?

Diniho ny fiantraikany amin’ny fianakaviana, ny mpiara-mivavaka ary ny olona marefo.

👉 Mahay mampiasa ny fotoanako sy ny fananako ve aho?

Mitarika ahy handany ny vola, ny fotoana ary ny andraikitra nomen’Andriamanitra ahy amin’ny fomba tsy mendrika ve?

-kevitra

Amin’ny etika kristiana, ilaina ny manavaka ny didy mazava ao amin’ny Baiboly, ny foto-kevitra ara-baiboly ampiharina, ary ny fitsipika napetraky ny fiangonana iray.

Tsy tokony atao didin’Andriamanitra ny fomban-drazana na ny fandrarana tsy voaporofo ara-baiboly.

Etsy ankilany, tsy tokony ampiasaina ho fialan-tsiny hanaovana izay rehetra tiana koa ny fahafahana kristiana.

Noho izany :

* Ny milalao karatra tsy misy filokana dia tsy azo ambara ho fahotana avy hatrany, satria tsy misy fandrarana mivantana toy izany ao amin’ny Baiboly.

* Ny filokana kosa dia mila dinihina amin’ny lafiny ara-moraly, indrindra raha misy fitiavam-bola, fanandevozana, tsy fahamarinana na fahasimban’ny andraikitra.

* Ny Kristiana dia antsoina hampiasa ny fahafahany amim-pahendrena, ho amin’ny voninahitr’Andriamanitra, fa tsy ho amin’ny fanarahana ny faniriany fotsiny.

Hoy ny 1 Korintiana 10:31 :

> «Koa amin’izany, na mihinana na misotro ianareo, na inona na inona ataonareo, dia ataovy ho voninahitr’Andriamanitra izany rehetra izany.»

Ny fanontaniana farany noho izany dia tsy fotsiny hoe : «Afaka milalao karatra ve aho?» , fa koa hoe : «Afaka manao izany amin’ny fomba madio, voafehy, mahasoa ary manome voninahitra an’Andriamanitra ve aho?»

❤️Agape Ministry—Ny fitiavan'i Kristy no manery anay✝️

16/10/2026

Haody ry Alaotra 👋

Ho avy any aminareo indray ny ekipan'ny Agape Ministry koa dia amboary dieny izao ny fandaharam-potoana

🔔 ANORORO : 2-3 Novambra 2026 ao amin'ny Fiangonana METM Anororo

🔔 AMPARAFARAVOLA : 5-6 Novambra ao amin'ny Fiangonana METM Amparafaravola

!!MAIMAIM-POANA!!

14/10/2026

🟩 MAMPIANARA ANAY 026

“Tsy tsara noho ny ranon’Isarely rehetra va ny onin'i Damaskosy...?

📖 2 Mpanjaka 5:12

"Tsy tsara noho ny ranon'ny Isiraely rehetra va Abana sy Farpara, onin'i Damaskosy? Tsy mahazo mandro ao amin'ireo va aho ka hadio? Dia nihodina izy ka lasa an-katezerana."

━━━━━━━━━━━━━━━

1️⃣ Ny contexte

Namàna dia olona ambony tao amin’ny tafik’i Syria. Lehilahy mahery sy nohajaina izy, saingy nanana olana lehibe iray:

⚠️ voan’ny habokana izy.

Nandre izy fa misy mpaminany any Israely afaka manasitrana azy. Tonga tany amin’i Elisa izy, niaraka tamin’ny soavaly sy kalesy ary fanomezana maro.

Kanefa tsy nandray na nivoaka hitsena azy akory i Elisa.

Nandefa hafatra fotsiny izy hoe:

👉 “Mandehana misasa impito ao Jordana.”

Tezitra i Namàna noho izany, satria ny tao an-tsainy dia tokony ho tsenaina amin'ny fomba manetriketrika izy fa mba olona manan-kaja ihany.

━━━━━━━━━━━━━━━

2️⃣ “Tsy tsara noho ny ranon’ny Israely va...?”

Hoy Naamàna:

❓ “Tsy tsara noho ny ranon’ny Isiraely rehetra va Abana sy Farpara, onin'i Damaskosy?”

👉 Eto no ahitantsika ny fireharehana sy fiavonavonan'ny fon’olombelona.

Nieritreritra izy hoe:

▪️ “Nahoana no Jordana fa tsy hafa?”
▪️ “Tsy manana rano tsara kokoa ve izahay any Damaskosy?”
▪️ “Nahoana no tsy nanao zavatra lehibe teo anatrehako ilay mpaminany?”

➡️ Tsy tena ny rano no olana.

💡 Ny olana dia ny fon’i Namàna izay tsy te hanaiky ny fomba nandidian’Andriamanitra.

━━━━━━━━━━━━━━━

3️⃣ Tsy ny rano no nanasitrana an’i Namàna

Zava-dehibe tsara tsindrina ireto:

❌ Tsy hoe mahagaga noho ny rano hafa ny ranon’i Jordana.
❌ Tsy hoe manana hery ara-pitsaboana manokana ilay rano.

Fa kosa:

✅ Andriamanitra no nanasitrana.

➡️ Ny fandrobohana impito tao Jordana dia fankatoavana ny tenin’Andriamanitra ihany.

Rehefa nanaiky i Namàna ka nanao izay nolazaina taminy, dia sitrana.

"Dia nidina izy ka nisitrika tao Jordana impito araka ny tenin'ny lehilahin'Andriamanitra: ary ny nofony dia tonga tahaka ny nofon-jazakely indray, ka nadio izy." 📖 2 Mpanjaka 5:14

🌿 Ny fahagagana dia tsy tao amin’ny Jordana, fa tao amin’ny herin’Andriamanitra.

━━━━━━━━━━━━━━━

4️⃣ Ny olana lehibe: te hibaiko an’Andriamanitra ny olona

Namàna dia nanana zavatra tao an-tsainy hoe: « Izao no tokony hanaovan’Andriamanitra azy.»

👉Indraindray isika koa manao toy izany.

Mivavaka isika, ary isika ihany no mibaiko an’Andriamanitra ny fomba tokony hamaliany:

▪️ “Ataovy izao Tompo.”
▪️ “Izao no tiako hamaliana azy.”
▪️ “Tokony ho izao no hitranga.”

Rehefa tsy araka ny eritreritsika anefa no ataon’Andriamanitra dia:
😠 tezitra,
😔 kivy,
❓ misalasala,
🚶 miala.

Kanefa hoy ny Soratra Masina:

«Fa ny fihevitro tsy fihevitrareo, ary ny lalanareo kosa tsy mba lalako...» 📖 Isaia 55:8–9

🙏 Tsy voatery hitovy amin' izay ao an-tsaintsika ny fomba fiasan’Andriamanitra.

━━━━━━━━━━━━━━━

5️⃣ Tsy maintsy nanetry ny fireharehany i Namàna

Namàna dia olona ambony.
👑 Manam-pahefana.
⚔️ Miaramila mahery.
💰 Manan-karena.
🏅 Hajain’ny olona.

Fa teo anatrehan’Andriamanitra:

➡️ tsy maintsy nanaiky sy nanetry tena izy.

❌️Tsy ny toerana ambony nananany no nahasitrana azy.
❌️Tsy ny harenany.
❌️Tsy ny heriny.
❌️Tsy ny lazany.

✅️ Fa ny finoana sy fankatoavana ny tenin’Andriamanitra.

💡 Indraindray Andriamanitra mamela antsika hiatrika zavatra izay tsy vitan’ny herintsika, mba hampianarany antsika hoe:

«Tsy ny herinao no ilainao, fa ny fahasoavako.»

━━━━━━━━━━━━━━━

6️⃣ Ny lesona lehibe: aza manao tsinontsinona ny fomba tsotra ampiasain’Andriamanitra

Jordana dia tsy renirano nalaza toa an’ireo tao Damaskosy.
Kanefa io no toerana nasain’Andriamanitra nalehan’i Namàna.

Toy izany koa:
Mety ho tsotra ny Tenin’Andriamanitra.

📖 “Mibebaha.”
📖 “Minoa.”
📖 “Mamela heloka.”
📖 “Mivavaha.”
📖 “Mankatoava.”

Mety hieritreritra isika hoe: “Tsy ampy izany.” Ka hitady zavatra lalina sy toa saro-takarina.

✝️ Ny anjarantsika dia mankatoa, fa ny herin’Andriamanitra no miasa, na toa heverina ho tsotra aza izay lazainy.

━━━━━━━━━━━━━━━

7️⃣ Mampitodika antsika amin’i Kristy

Ny olombelona dia manana aretina lalina kokoa noho ny habokana dia ny :

💔 ota.

Tsy misy afaka manadio ny tenany amin’ny:
▪️ harena,
▪️ fahendrena
▪️ fombafomba,
▪️ fahamendrehana,
▪️ ezaka manokana.
▪️ asa soa

Fa Andriamanitra mihitsy no manondro sy manome antsika an i:

✝️ Jesosy Kristy.

Hoy ny: 📖 Jaona 14:6: «Izaho no lalana sy fahamarinana ary fiainana...»

📖 Asa 4:12: "Ary tsy misy famonjena amin’ny hafa..."

📖 Jaona 8 : 36: "Koa raha ny Zanaka no hahafaka anareo, dia ho afaka tokoa ianareo."

🌿 Tahaka an’i Namàna izay tsy maintsy niala tamin’ny fireharehany ka nankatò ny tenin’Andriamanitra, dia mila miala amin’ny fireharehana koa isika (ezaka sy izay heverina ho asa atao)ka manatona an’i Kristy amin’ny finoana.

📖 Asa 2:8-9: «Fa fahasoavana no namonjena anareo amin'ny finoana; ary tsy avy aminareo izany, fa fanomezana avy amin'Andriamanitra; tsy avy amin'ny asa, fandrao hisy hirehareha.»

━━━━━━━━━━━━━━━

8️⃣ Inona no ampianarin’i Namàna antsika?

❓ Moa ve isika vonona hankatò an’Andriamanitra na dia tsy araka izay noeritreretintsika aza?

❓ Moa ve ny fireharehantsika no manakana antsika tsy handray ny fahasoavan’Andriamanitra?

❓ Moa ve isika mitady fomba lehibe sy mahatalanjona, nefa tsy mankato izay efa nolazain’ny Teniny?

❓ Rehefa tsy araka ny sitrapontsika no fiasan’Andriamanitra, mbola hatoky Azy ve isika?

━━━━━━━━━━━━━━━

✝️ Famaranana

Namàna nijery an’i Jordana ka niteny:

« Tsy tsara noho ny ranon’ny Israely rehetra...va ny onin'i Damaskosy?»

Fa tsy ny hatsaran’ny rano no olana.

🌿 Ny olana dia ny fireharehana sy ny tsy fankatoavana.

Rehefa nanaiky izy, nidina tao Jordana ary nankatò ny tenin’Andriamanitra, dia nahita ny herin’Andriamanitra.

Toy izany koa amintsika:

🙏 Aza avela hanakana anao tsy hankatò ny fireharehana.

🙏 Aza terena hanaraka ny fomba eritreretinao Andriamanitra.

🙏 Matokia ny Teniny, na dia tsotra aza ny zavatra angatahiny.

✝️ Ary indrindra, aza mitady famonjena amin’ny herinao manokana, fa hinoy sy ekeo ny famonjena nataon'i Jesosy Kristy ho anao. Raiso Izy ho Tompo sy Mpamonjy.

🙏 Mampianara anay Tompo ô: hiala amin'ny fireharehana, fa izany no hitomboanay amin'ny finoana ary mampianatra anay hankatò ny Teninao na dia tsy araka ny eritreritray aza. 🙏

Agape Ministry

26/10/2026

26/10/2026

23/10/2026

21/10/2026

19/10/2026

16/10/2026

16/10/2026

14/10/2026

Address

Telephone

Website

Alerts

Shortcuts

Share

Listing takedown request